ހަ ފަހަރު ވޯޓު ލައިފި؛ މަހިބަދޫ ކައުންސިލަށް ނާއިބެއް ނުހޮވުނު

އައު ކައުންސިލަރުން ހުވައިކޮށް، ތިން ބައްދަލުވުން ބާއްވައިގެންވެސް އދ. މަހިބަދޫ ކައުންސިލްގެ ނާއިބު ރައީސް ކަމަށް ބޭފުޅަކު ނުހޮވި ކައުންސިލް ހިންގުމަށް ބުރޫ އަރައިފިއެވެ.

ކައުންސިލްތަކުގެ އައު ދައުރު އިއްޔެ ފަށާފައިވާއިރު، ގާނޫނުގައިވާގޮތުން، ކައުންސިލަރުން ހުވާކުުރުމަށް ފަހު ފުރަތަމަ ބައްދަލްވުމުގައި ކުރަންޖެހޭ  ރަސްމީ ފުރަތަމަ މަސައްކަތަކީ ކައުންސިލަށް ނާއިބެއް އިންތިހާބު ކުރުމެވެ.

މަހިބަދޫ ކައުންސިލްގެ ނާއިބުގެ މަގާމަށް ހުޅުވާލުމުން ތިން ބޭފުޅަކު ކުރިމަތިލި އެވެ. އެއީ ކޮންގްރެސްގެ ޕާޓީގެ މެންބަރު މުޙައްމަދު މައުމޫން އާއި، އެމްޑީޕީގެ މެންބަރު، ޒަޢީމާ މުޙައްމަދުގެ އިތުރުން އަމިއްލަގޮތުން ވާދަކޮށް ގޮނޑި ކާމިޔާބުކުރި ބުންޏާމީން ހަސަން އެވެ.

ްެއެ މެންބަރުންގެ މެދުގައި ނެގި ވޯޓުގައި ކޮންގްރެސް އާއި އެމްޑީޕީގެ މެންބަރަށް ދެ ވޯޓް އަދި އަމިއްލަ މެންބަރަށް އެއް ވޯޓު ލިބުނެވެ.

އެހެންކަމުން އެލްޖީއޭއިން އެންގީ ދެ ވޯޓް ލިބުނު ދެ މެންބަރުންގެ މެދުގައި އަލުން ވޯޓް ނެގުމަށެވެ.

އެ ބައްދަލުވުމުގައި ތިން ފަހަރުމަތީން ވޯޓު ނެގިިއރުވެސް ކޮންމެ މެންބަރަކަށް ލިބުނީ ދެ ވޯޓެވެ. ދެން ލަނީ ބާތިލް ވޯޓެކެވެ. އިއްޔެ ހެނދުނުގެ ބައްދަލުވުމުގައި ގޮތެއް ނުނިންމުމުން ރޭގައިވެސް އަލުން ވޯޓު ނެގިއެވެ.

ނަމަވެސް ނާތީޖާ ނެރެވޭ ގޮތް ނުވުމުން ރޭގެ މީޓިން ނިންމައި، މިއަދު މެންދުރު ވަނީ ތިންވަނަ ބައްދަލުވުން ބާއްވާފައެވެ. އެ ބައްދަލުވުމުންވެސް ނަތީޖާއެއް ނުނެރެވުނެވެ.

އެހެންކަމުން، ހަތަރު ވަނަ ބައްދަލުވުން މިރޭ ބާއްވަން ވަނީ ތާވަލްކޮށްފައެވެ.

ނާއިބެއް ހޮވުމުގެ މަސައްކަތް ނުނިމޭތީ މަހިބަދޫ ކައުންސިލްގެ ގާނޫނީ ޒިންމާތައް އަދާކުރުމަށް ވަނީ ހުރަސްތަކެއް ކުރިމަތިވެފައެވެ.