އެތެރެކުރި ސިނގިރޭޓުތައް ގެއްލުނީ އެގްޒޮޓިކްގައި އޮތް ހިއްސާ ދޫކުރި ފަހުން: މެންބަރު ސިރުހާން

އެގްޒޮޓިކް އެންޓަޕްރައިސަސްގެ ބޮންޑެޑް ވެއާ ހައުސްއަކުން 500 އަށް ވުރެ ގިނަ ކޭސް ސިނގިރެޓު ގެއްލުނީ އެ ކުންފުނީގައި އޮތް ހިއްސާ ދޫކުރި ފަހުން ކަމަށް ހިތާދޫ ދާއިރާގެ ޕީއެންސީ މެންބަރު މުޙައްމަދު ސިރުހާން ވިދާޅުވެއްޖެއެވެ.

އިއްޔެ މަޖިލީހުން ބޭއްވި ޤައުމީ ސަލާމަތާއި ބެހޭ ކޮމެޓީ (241 ކޮމެޓީ)ގައި ރާއްޖެއަށް ވަގަށް އެތެރެކުރި ސިނގިރޭޓުތަކެއް، އެގްޒޮޓިކް އެންޓަޕްރައިސަސްގެ ބޮންޑެޑް ވެއާ ހައުސްއަކުން ގެއްލުނު އިރު، އެ ކުންފުނީގެ ހިއްސާ މެންބަރު ސިރުހާނަށް ދީފައިވާކަމަށް އެ ކޮމެޓީގެ ރިޕޯޓެއްގައި ވަނީ ބުނެފައެވެ.

އެކަމާއި ގުޅިގެން މެންބަރު ސިރުހާން ރޭ ނެރުއްވި ބަޔާނެއްގައި ވިދާޅުވީ، އެގްޒޮޓިކް އެންޓަޕްރައިސަސް އަކީ  ރާއްޖޭގައި ރަޖިސްޓްރީކޮށްގެން ހިންގަމުން އައި ކުންފުންޏެއް ކަމަށާއި، އޭނާ އެ ކުންފުންޏާއި ގުޅުމުގެ ކުރިން ވެސް އެ ކުންފުންޏަކީ ކަސްޓަމްސްގައި ބޮންޑެޑް ވެއާހައުސްތަކެއް ހިންގަމުން އައި ކުންފުންޏެއް ކަމަށެވެ. އަދި އެ ކުންފުނީގެ ހިއްސާދާރެއްގެ ގޮތުގައި ގުޅިވަޑައިގެންނެވީ 2023 ވަނަ އަހަރު، ލިބުނު ފުރުސަތެއްގައި ކަމަށް ސިރުހާން ވިދާޅުވިއެވެ.

އެހެން ނަމަވެސް ސިޔާސީ ދާއިރާއަށް ވަދެވަޑައިގެން، ސިޔާސީ މަސައްކަތްތަކަށް ވަގުތު ދެއްވުމަށްޓަކައި އެ ކުންފުނީގައި އޮތް ހިއްސާ އާއި އެކު އިތުރު ވިޔަފާރިތަކުގައި އޮތް ހިއްސާ ވެސް ދޫކޮށްފައިވާ ކަމަށް މެންބަރު ވިދާޅުވިއެވެ.

އަޅުގަނޑު އެގްޒޮޓިކް އެންޓަޕްރައިސަސްގެ ބޯޑު ޑިރެކްޓަރަކަށް އަދި ހިއްސާދާރަކަށް ހުރި މުއްދަތުގައި ދިވެހިރާއްޖޭގެ ޤާނޫނާއި ޚިލާފަށް އެއްވެސް މުޢާމަލާތެއް އެ ކުންފުނިން ކޮށްފައިނުވާނެ ކަމުގެ ޔަގީންކަން މި ފުރުސަތުގައި ދިވެހި ލޮބުވެތި ރައްޔިތުންނަށް އަރުވަމެވެ

ހިތާދޫ ދާއިރާގެ ޕީއެންސީ މެންބަރު މުޙައްމަދު ސިރުހާން

ސިރުހާން ވިދާޅުވީ އެ ކުންފުނިން ވަކިވެވަޑައިގެންނެވީ އެ ކުންފުނީގެ އޮޑިޓެއް ކުރުމަށް ފަހުގައި ކަމަށާއި، އެ އޮޑިޓުގައި އެ ކުންފުނީގެ ބޮންޑެޑް ވެއާ ހައުސް ހިމެނޭހެން ކުންފުނީގެ ގުދަންތަކުގަިއ ހުރި މުދަލުގެ ތަފްސީލު ވަރަށް ސާފުކޮށް އެގޭނެ ކަމަށެވެ. އަދި އެ އޮޑިޓުން ވެސް އެ ކުންފުނީގެ އެއްވެސް ބޮންޑެޑް ވެއާ ހައުސްއަކުން ޤަވާއިދާ ޚިލާފަށް އެއްވެސް މުދަލެއް ބޭރުކުރެވިފައިނުވާނެ ކަން ސާފުވާނެ ކަމަށް ސިރުހާން ވިދާޅުވިއެވެ.

އެހެންކަމުން ސިނގިރޭޓު ވަގަށް ބޭރުކުރި މަރުޙަލާގައި އެގްޒޮޓިކް އެންޓަޕްރައިސަސްގެ ހިއްސާ އޭނާއަށް ދީފައިވާކަމަށް ބުނެ ދެކެވޭ ވާހަކަތަކަކީ އެއްވެސް ހަގީގަތެއް ނެތް ވާހަކަތަކެއް ކަމަށް ސިރުހާން ވަނީ ވިދާޅުވެފައެވެ.

އެގްޒޮޓިކް އެންޓަޕްރައިސަސްގެ ހިއްސާދާރަކަށް އަޅުގަނޑު ވުމުގެ ކުރިން، އަދި އެ ކުންފުނީގެ ހިއްސާ އަޅުގަނޑު ދޫކޮށްލި ފަހުން އެ ކުންފުނިން ގޯސްކަމެއް ކޮށްފައިވާނަމަ އެކަމަކީ އަޅުގަނޑާއި އެއްވެސް ގުޅުމެއް އޮތް ކަމެއް ނޫނެެވެ،

ހިތާދޫ ދާއިރާގެ ޕީއެންސީ މެންބަރު މުޙައްމަދު ސިރުހާން

ސިރުހާން ވަނީ އެ މައްސަލައިގައި އޭނާ އާއި ގުޅުވަން މަސައްކަތްކުރަނީ ސިޔާސީ ގޮތުން އޭނާ ބަލިކަށިކުރުމަށް މަސައްކަތްކުރަމުންދާ ދަނޑިވަޅެއްގައި ކަމުގައި ފާހަގަކުރައްވާފައެވެ. އަދި 241 ކޮމެޓީގެ ރިޕޯޓުން ވެސް އެކަމާއި އޭނާ އާއި ގުޅުމެއް ނެތް ކަން ސާފުވާނެ ކަމަށާއި، އެހެން ކަމުން އެ ރިޕޯޓު އިސްލާހު ކުރުމަށް މެންބަރު ވަނީ ގޮވާލައްވާފައެވެ.

ސިރުހާން އެފަދައިން ވިދާޅުވިއިރު 241 ކޮމިޓީ ރިޕޯޓުގައި އޮތް ގޮތުން، 2023 ވަނަ އަހަރުގެ ޑިސެމްބަރު 3ގައި އެގްޒޮޓިކް އެންޓަޕްރައިސަސްގެ ބޮންޑެޑް ވެއާހައުސް ކަސްޓަމްސްގައި ރަޖިސްޓްރީކުރިއިރު އެ ކުންފުނީގެ ބޯޑް އޮފް ޑިރެކްޓަރުންގެ ގޮތުގައި ތިބީ ލުބްނާ ހުސައިން މަނިކާއި އަބްދުﷲ ހަސަން ކިޔާ ދެ މީހެކެވެ.

އެހެން ނަމަވެސް އޭގެ ފަހުން 2023 ވަނަ އަހަރުގެ ޑިސެމްބަރު 9 ގައި ސިނގިރޭޓު ޝިޕްމަންޓު އެތެރެކުރިއިރު، އެ ކުންފުނީގެ ބޯޑް އޮފް ޑައިރެކްޓަރުންގެ ގޮތުގައި ތިބީ ލުބްނާ ހުސައިން މަނިކާއި ސިރުހާނެވެ.