ފުލުހުންގެ ބެލުމުގެދަށުގައި ހުރި ބައެއް ތަކެތީގެ ވެރިފަރާތް ހޯދަނީ

އެކި މައްސަލަތަކުގައި ފުލުހުންގެ ބެލުމުގެދަށަށް ގެނެސްފައިވާ ބައެއް ތަކެތީގެ ވެރިފަރާތް ހޯދުމުގެ މަސައްކަތް ކުރަމުން އަންނަކަމަށް ދިވެހި ފުލުހުންގެ ޚިދުމަތުން ބުނެފި އެވެ.

ފުލުހުން ބުނިގޮތުގައި މި ތަކެއްޗަކީ ހޮވައިގެން ގެނެސްފައިވާ ތަކެއްޗާއި، ތުހުމަތު ކުރެވިގެން ހުއްޓުވައި ސުވާލުކުރި ބައެއް މީހުންގެ އަތުން ފެނިފައިވާ ތަކެތިކަމަށެވެ. މީގެ ތެރެއިން ބައެއްތަކެއްޗަކީ ތުހުމަތުކުރެވޭ އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެވުނު މީހުންގެ އަތުން ނެގުނު ތަކެއްޗެވެ. އެތަކެތި ފުލުހުންގެ ބެލުމުގެ ދަށަށް ގެންގޮސްފައިވަނީ ވެރިފަރާތް އެ މީހުންނަށް ބުނެދެވިފައި ނުވުމުގެ ސަބަބުންނެވެ.

ވެރިފަރާތް ހޯދުމަށް ފުލުހުން އިއުލާނުކުރި ތަކެތީގެ ތެރޭގައި ހިމެނެނީ، ފައިސާ އާއި، އައުޓްބޯޑު އިންޖީނާއި، ކޮންސްޓްރަކްޝަން ބިޑި ގޯންޏެއްގެ އިތުރުން އެކި ކަހަލަ ކަރަންޓް އާލާތްތަކެވެ.

ވެރިފަރާތް ހޯދުމަށް އިއުލާނުކުރި އެއްޗެހީގެ ތަފްސީލް:

މާފަންނު ޕޮލިސް

- ޖުލައި 12 ވަނަ ދުވަހު މާފަންނު ޕޮލިސް ސްޓޭޝަން ކައިރިން ހޮވައިގެން ގެނެސްފައިވާ 520 ރުފިޔާ.

- ޖުލައި 12 ވަނަ ދުވަހު މ. ފަރުމާގެ ކައިރިން ހޮވައިގެން ގެނެސްފައިވާ ކޮންސްޓްރަކްޝަން ބިޑި ގޯންޏެއް.

- ޖުލައި 12 ވަނަ ދުވަހު ބޮޑުތަކުރުފާނުމަގު ސްޓީލް ހާޑްވެއާ ކައިރިން ހޮވައިގެން ގެނެސްފައިވާ އައުޓްބޯޑް އިންޖީނެއް.

- ޖުލައި 11 ވަނަ ދުވަހު އައިޖީއެމް ހޮސްޕިޓަލު ތެރެއިން ހޮވައިގެން ގެނެސްފައިވާ 100 ރުފިޔާ.

- ޖޫން 27 ވަނަ ދުވަހު ބޮޑުތަކުރުފާނުމަގު، ވަދުފޮށި ކައިރިން ވައްކަމުގެ ތުހުމަތުގައި ހުއްޓުވައި ސުވާލުކުރި މީހެއްގެ އަތުން ފެނިފައިވާ ވަގަށް ނަގާފައިވާ ކަމަށް ބެލެވޭ ކަޓް އޮފްއަކާއި ގްރޭންޑަރަކާއި، ބްލޯވަރެއް އަދި ވެލްޑިންގ މެޝިނެއް.

މި ތަކެތީގެ ވެރިފަރާތުން 9660183 އަށް ގުޅުއްވައި އިންސިޑެންޓް ނަންބަރާއެކު މައުލޫމާތު ހިއްސާކުރުމަށްފަހު ކާކުކަން އެނގޭނެ ލިޔުމަކާއެކު މާފަންނު ޕޮލިސް ސްޓޭޝަނަށް ހާޒިރުވެ ތަކެއްޗާއި ހަވާލުވުމަށް ފުލުހުން ވަނީ އެދިފަ އެވެ.

ގަލޮޅު ޕޮލިސް

- ޖުލައި 17 ވަނަ ދުވަހު ހުޅުމާލެ މާލެ ހައިވޭއިން ހޮވައިގެން ގެނެސްފައިވާ ސެމްސަންގ ބްރޭންޑުގެ މޯބައިލް ފޯނެއް. ރުފިޔާ.

- ޖުލައި 16 ވަނަ ދުވަހު ހޮވައިގެން ގެނެސްފައިވާ ޗިޕްސް ފޮށިގަނޑެއް.

މި ތަކެތީގެ ވެރިފަރާތުން 9631696 އަށް ގުޅުއްވައި އިންސިޑެންޓް ނަންބަރާއެކު މައުލޫމާތު ހިއްސާކުރުމަށްފަހު ކާކުކަން އެނގޭނެ ލިޔުމަކާއެކު ގަލޮޅު ޕޮލިސް ސްޓޭޝަނަށް ހާޒިރުވެ ތަކެއްޗާއި ހަވާލުވުމަށް ފުލުހުން ވަނީ އެދިފަ އެވެ.