މިއަދަށް ހަމަވާ ލޯނެއްގެ މުއްދަތު އިންޑިއާއިން ދަންމާލަދީފި

ސްޓޭޓް ބޭންކް އޮފް އިންޑިއާއިން ނަގާފައިވާ ލޯނެއްގެ މުއްދަތު އިންޑިއާއިން ދަންމާލަދީފިއެވެ.

ފިނޭންސުން ބުނީ މި ލޯނަކީ، ސްޓޭޓް ބޭންކް އޮފް އިންޑިއާ (އެސްބީއައި) އިން ސަބްސްކްރައިބްކޮށްފައިވާ 50 މިލިއަން ޑޮލަރުގެ ޓްރެޜަރީ ބިލެކެވެ. މި ދަރަނީގެ މުއްދަތު ހަމަވާންއޮތް ދުވަހަކީ މިއަދެވެ. ފިނޭންސުން ބުނީ އެ ދަރަނި އަނބުރާ ދެއްކުމުގެ މުއްދަތު އިންޑިއާއިން އިތުރުކޮށްދިނުމުން ދައްކައިދެނީ އެޤައުމުގެ ސަރުކާރުން ދިވެހިރާއްޖެއަށް ދެމުންގެންދާ ދެމެހެއްޓެނިވި އިތުބާރާއި އެހީތެރިކަން ކަމަށެވެ.

އިންޑިއާ ސަރުކާރާއެކު އެކަމުގެ މުއާމަލާތްތައް ކުރިއަށްގެންގޮސްފައިވަނީ، ދިވެހިރާއްޖެއަށް ކަނޑައަޅުއްވާފައި ހުންނަވާ އިންޑިއާގެ ހައި ކޮމިޝަނަރ ޖީ. ބާލާސުބްރަމަނިއަން އާއެކުގައެވެ. އެމަނިކުފާނުގެ އަރިހުގައި ޖޮއިންޓް ސެކްރެޓަރީ ސޫޖާ ކޭ. މެނޮން އަދި އިންޑިއާގެ ޚާރިޖީ ވުޒާރާގެ އިސް އޮފިޝަލުން ބައިވެރިވެވަޑައިގެންނެވިއެވެ. ފިނޭންސް މިނިސްބޓްރީގެ ފަރާތުން މާލީ ވަޒީރު މޫސާ ޒަމީރު ވަނީ މި ބައްދަލުވުމުގައި ބައިވެރިވެ ވަޑައިގަންނަވާފައެވެ.

މި ބައްދަލުވުމުގައި މަޝްވަރާތައް މައިގަނޑު ގޮތެއްގައި އަމާޒުކުރެވިފައިވަނީ އިންޑިއާ ސަރުކާރުގެ ލައިންސް އޮފް ކްރެޑިޓް (އެލްއޯސީ) ގެ ދަށުން ފައިނޭންސްކުރެވޭ މުހިންމު ތަރައްޤީގެ މަޝްރޫޢުތަކުގެ ޕޯޓްފޯލިއޯއަށެވެ. ފިނޭންސުން ބުނީ، މި ބައްދަލުވުމުގައި  ދެ ޤައުމު މިހާރު ކުރިއަށްގެންދަން ހުރި ކަންކަން ތަންފީޒުކުރުމުގައި ދިމާވާ މައިގަނޑު ގޮންޖެހުންތަކާ މެދު މަޝްވަރާކޮށް ދިވެހި ރައްޔިތުންގެ މަންފާއަށްޓަކައި އެ މަޝްރޫޢުތައް ކާމިޔާބުކަމާއެކު ނިންމުމަށް އަވަސް ފިޔަވަޅުތަކެއް އެޅުމާ ގުޅޭ ގޮތުން މަޝްވަރާކޮށްފައިވާކަމަށެވެ.

މީގެއިތުރުން، މިބައްދަލުވުމުގައި ދެ ޤައުމުގެ ދެމެދުގައި ވިޔަފާރީގެ ގުޅުން އިތުރަށް ހަރުދަނާކުރުމަށް އޮތް ފުރުޞަތުތަކާ މެދު މަޝްވަރާކުރުމާއި ދެފަރާތުންވެސް ވަނީ އިޤްތިޞާދީ އެއްބާރުލުމަށް އައު ފުރުޞަތުތައް ހޯދުމަށް ވަނީ ވާހަކަތައް ކުރިއަށްގެންގޮސްފައެވެ.