80 ވޯޓާއެކު މަޖިލީހުގެ ނައިބު ރައީސް ކަމަށް ނާޒިމް އިންތިހާބުވެވަޑައިގެންފި

މިއަދު ހުވާކުރެވުނު 20 ވަނަ ރައްޔިތުންގެ މަޖިލީހުގެ ނައިބު ރައީސް ކަމަށް 80 މެމްބަރުންގެ ވޯޓާއިއެކު ދިއްގަރު ދާއިރާގެ މެމްބަރު އަހުމަދު ނާޒިމް އިންތިހާބުވެވަޑައިގެންފިއެވެ.

ވިހިވަނަ ރައްޔިތުންގެ މަޖިލީހުގެ ނައިބު ރައީސް ކަމަށް މަޖިލީހުގެ ސުޕަ މެޖޯރިޓީ އޮތް ޕީއެންސީގެ ފަރާތުން ދިއްގަރު ދާއިރާގެ މެންބަރު އަހުމަދު ނާޒިމްގެ ނަން ފޮނަދޫ ދާއިރާގެ މެންބަރު އަބްދުއްރަހީމް އަބްދުالله ހުށަހެޅުއްވިއިރު، މި ހުށަހެޅުމަށް ބާރަށު ދާއިރާގެ މެންބަރު އިބްރާހިމް ޝުޖާއު ވަނީ ތާއިދު ކުރައްވާފަ އެވެ.

ހަމައެއާއިއެކު، އިދިކޮޅު އެމްޑީޕީގެ ފަރާތުން ނައިބު ރައީސަކަށް ހުށަހަޅުއްވާފައިވަނީ މަރަދޫ ދައިރާގެ މެންބަރު އަހުމަދު ދީދީގެ ނަމެވެ. ވައިކަރަދޫ ދާއިރާގެ މެންބަރު ހުސައިން ޒިޔާދުގެ މި ހުށަހެޅުއްވުމަށް މާވަށު ދާއިރާގެ މެންބަރު އަހުމަދު ޝާކިރު ތާއީދު ކުރެއްވިއެވެ.

މަޖިލީހުގެ ނައިބު ރައީސް ހޮވުމަށްޓަކައި ކުރިއަށް ދިޔަ ސިއްރު ވޯޓްގައި ނާޒިމް ނައިބު ރައީސްކަމަށް އިންތިހާބުކުރަން 80 މެމްބަރުން ވޯޓް ދެއްވިއިރު، އަހުމަދު ދީދީ އިންތިހާބުކުރަން ވޯޓު ދެއްވީ 12 މެމްބަރުންނެވެ.

މީގެ އިތުރުންވެސް މިއަދުގެ ޖަލްސާގައި މަޖިލީހުގެ ރައީސް ވެސް ހޮވާފައިވާއިރު، ރައްޔިތުންގެ މަޖިލީހުގެ ރައީސް ގެ މަގާމަށް އިންތިހާބުވެވަޑައިގެންފައިވަނީ ފޮނަދޫ ދާއިރާގެ މެމްބަރު އަބްދުއްރަހީމް އެވެ.

މިއަދު ހެނދުނު 9 ޖެހިއިރު، 20 ވަނަ ރައްޔިތުންގެ މަޖިލީހަށް 93 ދާއިރާއަކުން އިންތިހާބުވެވަޑައިގެންނެވި މެމްބަރުން ހުވާކުރައްވާފައިވާއިރު، އޭގެ ތެރެއިން 75 މެންބަރުންނަކީ ވެރިކަން ކުރާ ކޯލިޝަންގެ މައި ޕާޓީ ޕީއެންސީއަށް ނިސްބަތްވާ މެންބަރުންނެވެ.

މިފަހަރުގެ މަޖިލީހުގައި ސަރުކާރު ކޯލިޝަންގައި ހިމެނޭ އެމްއެންޕީގެ އެއް މެންބަރު، އެމްޑީއޭގެ ދެ މެންބަރުން އަދި ޖޭޕީގެ އެއް މެންބަރު ހިމެނޭއިރު، އިދިކޮޅު މައި ޕާޓީ އެމްޑީޕީއަށް ނިސްބަތްވާ 12 މެންބަރުންނާއި އަމިއްލަ ގޮތުން ވާދަކުރެއްވި 2 މެމްބަރަކު މިފަހަރުގެ މަޖިލީހުގައި ތިއްބަވާނެއެވެ.