ކުދިން ވޭޕް ގެންދާކަން ދެނެގަތުމަށް އިމާދުއްދީން ސްކޫލުގައި މެޓަލް ޑިޓެކްޓަރ އިންސްޓޯލް ކުރަނީ

ވޭޕް ގެންދާކަން ދެނެގަނެވޭނެ ގޮތް ފަހިކުރުމަށް އިމާދުއްދީން ސްކޫލުގައި މެޓަލް ޑިޓެކްޓަރ ހަރުކުރާނެ ކަމަށް އެ ސްކޫލްގެ ޕްރިންސިޕަލް ޑރ. ޢަލީ މަމްދޫހު ވިދާޅުވެއްޖެއެވެ.

މަމްދޫހު މިގޮތަށް ވިދާޅުވީ ޔުނިވަރސިޓީ މެލޭޔާ ސެންޓަރ ފޯ އެޑިކްޝަން ސައިންސް ސްޓަޑީޒްގެ ނިކޮޓީން އެޑިކްޝަން ރިސާރޗް ކޮލަބަރޭޓިންގ ގްރޫޕް (އެން.އޭ.އާރް.ސީ.ސީ) އިން އާދީއްތަ ދުވަހު ރާއްޖޭގައި ބޭއްވި ވޯކްޝޮޕްގައި ވާހަކަދައްކަމުންނެވެ.

ޓީޗަރުންނާއި ޕްރިންސިޕަލުންނަށް ހާއްސަ މި ވޯކްޝޮޕް ރާއްޖޭގައި ބާއްވާފައި ވަނީ “ހެބަޓް (ހެންޓީ، އެލަކް، ބަސްމީ އަސަޕް ޓެމްބަކައު) އިނިޝިއޭޓިވް: އެމްޕަވަރިންގ ޔޫތު ފޯރ އަ ޓޮބަކޯ އެންޑް ނިކޮޓީން ފްރީ ސްކޫލް” ޝިއާރުގެ ގެ ދަށުން ދުންފަތުގެ އިސްތިއުމާލުކުރުމާއި ވޭޕިންގ އަދި މަސްތުވާތަކެތީގެ ގެއްލުންތަކާ ބެހޭގޮތުން ދަރިވަރުން ހޭލުންތެރިކުރުމަށެވެ.

ޖެނުއަރީ 13 އިން 16 އަށް އިމާދުއްދީން ސްކޫލާއި ހުރާ ސްކޫލުގައި ކުރިއަށް ގެންދިޔަ ހަތަރު ދުވަހުގެ ހެބަޓް ޕްރޮގްރާމްގައި މިނިސްޓްރީގެ 80 އެއްހާ އޮފިސަރުންނާއި ސްކޫލް ހެޑުންނާއި ޓީޗަރުންނާއި ކައުންސެލަރުންނާއި ހެލްތްކެއާ ޕާސަނަލްގެ އިތުރުން 16 ސްކޫލެއްގެ 195 ދަރިވަރުން ބައިވެރިވެފައި ވެއެވެ.

މި ވޯކްޝޮޕްގައި ވާހަކަދައްކަވަމުން އިމާދުއްދީން ސްކޫލްގެ ޕްރިންސިޕަލް މަމްދޫހު ވިދާޅުވީ ދުންފަތުގެ ބާވަތްތައް އުފައްދާ ކުންފުނިތަކުން ޒުވާނުން ދުންފަތުގެ އިސްތިއުމާލު ކުރުމާއި ވޭޕިންއަށް ލޯބި ޖައްސަން ބޮޑު އިންވެސްޓްމެންޓެއް ކުރާ ކަމަށެވެ.

މިކަން ފާހަގަކުރައްވަމުން ޕްރިންސިޕަލް ވިދާޅުވީ އީ-ސިނގިރެޓް ދެނެގަންނަން ދަތި ގޮތަކަށް ދަރިވަރުން އެ އެއްޗެހި ސްކޫލަށް ވައްދާ ކަމަށެވެ. އެ އެއްޗެހި ގަލަން ފަދަ އެއްޗެހީގެ ސިފައިގައިވެސް މިހާރު ހުންނާތީ ޓީޗަރުންނަށް އެ އެއްޗެހި ފަސޭހައިން ދެނެގަންނަން އުނދަގޫ ކަމަށް އޭނާ ވިދާޅުވިއެވެ. އެހެންކަމުން މެޓަލް ޑިޓެކްޓާސް ސްކޫލްގައި އިންސްޓޯލްކުރުމާއި ބެހޭގޮތުން އޭނާ ވާހަކަދެއްކެވިއެވެ.

“ދަރިވަރަކު ސްކޫލަށް ގެނައި ނަމަވެސް ޓީޗަރުންނަށް އީ-ސިނގިރޭޓެއް ދެނެގަނެވޭ ގޮތެއް ނުވެދާނެ. އެހެންވެ އަޅުގަނޑުމެންގެ ސްކޫލުގައި މެޓަލް ޑިޓެކްޓަރު ހަރުކުރާނަން،” އޭނާ ވިދާޅުވި އެވެ.

މަމްދޫހު މިފަދައިން ވިދާޅުވެފައިވާއިރު މި ވޯކްޝޮޕްގައި ބައިވެރިވެވަޑައިގަތް ޑެޕިއުޓީ މިނިސްޓަރު އޮފް އެޑިއުކޭޝަން ޑރ. ފާޠިމަތު ނިޝާން ވަނީ ދުންފަތުގެ އިސްތިއުމާލުކުރުމާއި އީ-ސިނގިރޭޓް ބޭނުންކުރުމުގެ ނުރައްކާ ބޮޑުވަމުންދާތީ ސްކޫލްތަކަށް ވަސީލަތްތަކާއި ތަމްރީނުތައް ފޯރުކޮށްދިނުމުގެ މަސައްކަތް އެޑިއުކޭއޭޝަން މިނިސްޓްރީ އިން ފަށާނެ ކަމަށް ވިދާޅުވެފައެވެ.

މީގެ އިތުރަށްވެސް، އެން.އޭ.އާރް.ސީ.ސީގެ ޑެޕިއުޓީ ކޯޑިނޭޓަރު އަދި ހެބަޓް ޕްރޮގްރާމްގެ ލީޑް އެސޯސިއޭޓް ޕްރޮފެސަރ، ޑރ. ނޫރު އަމާނީ އަޙްމަދު ތާޖުއްދީން ވިދާޅުވީ ދުނިޔޭގެ ސިއްހަތު ޖަމިއްޔާއާ ގުޅިގެން ރާއްޖޭގައި އިތުރު ތަމްރީނުތައް ހިންގުމުގެ ޕްލޭންތައް އެބަހުރި ކަމަށެވެ.

"އަޅުގަނޑުމެން މިދަނީ އޮގަސްޓް މަހު ޓީމު ގެނައުމަށް މަޝްވަރާ ކުރަމުން،" ނޫރު އަމާނީ ވިދާޅުވި އެވެ.

ފެމިލީ މެޑިސިން ސްޕެޝަލިސްޓެއް ކަމަށްވާ ޑރ. ނޫރު އަމާނީ ވިދާޅުވީ އެން.އޭ.އާރް.ސީ.ސީ ހަތް މެމްބަރުންގެ ޓީމުގައި މެޑިސިން، ސައިކިއޭޓްރީ، ކައުންސެލިން، އެޑިއުކޭޝަން އަދި މާސް ކޮމިއުނިކޭޝަން ފަދަ އެކި ދާއިރާތަކުގެ ތަޖުރިބާކާރުން ހިމެނޭ ކަމަށެވެ.