އަނެއްކާވެސް ޓްރާންސްފޯމަރުތަކުން ވައްކަންކުރަން އުޅުނު މައްސަލައެއްގައި މީހަކު ހައްޔަރު ކޮށްފި

އަނެއްކާވެސް ޓްރާންސްފޯމަރުތަކުން ވައްކަންކުރަން އުޅުނު މައްސަލައެއްގައި މީހަކު ހައްޔަރު ކޮށްފިއެވެ.

ސްޓެލްކޯއިން އެކސްގައި ކުރި ޕޯސްޓެއްގައި ބުނީ، ރޭ ދަންވަރު 2:50 ހާއިރު މާފަންނު މަދުރަސާ ސަރަހައްދުގައި ހުރި ސްޓެލްކޯގެ ޓްރާންސްފޯމަރ ސަބްސްޓޭޝަނަށް ވަދެ، މީހަކު ވައްކަން އުޅުނު ކަމަށެވެ.

އަދި، ސަބްސްޓޭޝަނުގެ ސީސީޓީވީ ކެމެރާއިން ވައްކަން ކުރަން އުޅުނު މީހާ ފެނުމާ ގުޅިގެން ވަގުތުން ފުލުހުންނަށް އަންގާފައިވާ ކަމަށާ ފުލުހުން އެ ސަރަހައްދަށް ގޮސް އެމީހާ ހައްޔަރުކޮށްފައިވާ ކަމަށެވެ.

ސްޓެލްކޯއިން އިތުރަށް ބުނީ، މާލޭގެ ސަބްސްޓޭޝަންތަކަކީ 24 ގަޑިއިރު ކެމެރާއިން މޮނިޓަރ ކުރެވޭ ތަންތަން ނަމަވެސް، ހުޅުމާލޭގެ ދެވަނަ ފިޔަވަހީގަލެ ސަބްސްޓޭޝަންފަދަ ތަންތަނުން ކުރެވޭ މިފަދަ ވައްކަންތައް ހުއްޓުވުމަށް އާންމު ރައްޔިތުންގެ އެހީތެރިކަން ބޭނުންވާ ކަމަށެވެ.

"މިފަދަ ޢަމަލުތައް ހިންގާ ފަރާތްތަކުން، އެކަމަކީ އެމީހުންގެ ފުރާނައަށް ނުރައްކާވެދާނެ ކަމެއްކަން ދެނެގަނެ، އެފަދަ ޢަމަލުތަކުން ދުރުހެލިވުމަށް އިލްތިމާސްކުރަން،" ސްޓެލްކޯއިން ބުންޏެވެ.

މީގެއިތުރުން، ސްޓެލްކޯއިން ވަނީ ރައްޔިތުންނަށް ދަތިތަކެއް ކުރިމަތިވާ މިފަދަ ވައްކަންތަކުން ހޯދާ ތަކެތި ވިއްކާ އަދި ގަންނަ ފަރާތްތައްވެސް ހޯދައި، ޤާނޫނީ ފިޔަވަޅު އެޅުމަށް ކަމާބެހޭ އިދާރާތަކަށް އިލްތިމާސްކޮށްފައެވެ.