މޮޅު މީހާއަށް މޮޅު ގޮތް، ނިކަމެތި މީހާއަށް ނިކަމެތި ގޮތް: ޖާބިރު

އިސްރަށްވެހިންގެ އެލަވަންސް ބޮޑު ނުކުރަން ސަރުކާރުން ދައްކަމުން އަންނަ އުޒުރު ގަބޫލު ނުކުރެވޭ ކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.

ޖާބިރު ކުރެއްވި ޓްވީޓެއްގައި ވިދާޅުވީ، ދޮށީ އުމުރުގެ މީހުންނަށް ދޭ އެލަވަންސް ބޮޑު ކުރުމަށް ދައުލަތުގެ މާލީ ހާލަތު ތަން ނުދޭ ކަމަށް އެމްޑީޕީގެ މެމްބަރުން ވިދާޅުވިޔަސް، ސަރުކާރުން ރައްޔިތުންގެ ފައިސާ ހޭދަ ކުރަމުންދާ ގޮތަށް ބަލާއިރު އެވާހަކަ ގަބޫލު ނުކުރެވޭ ކަމަށެވެ. އަދި ރާއްޖޭގައި އޮންނަނީ މޮޅު މީހާއަށް މޮޅު ގޮތް، އަދި ނިކަމެތި މީހާއަށް ނިކަމެތި ގޮތް ކަމަށްވެސް ޖާބިރު ވިދާޅުވިއެވެ.

ޖާބިރު ވަނީ އުމުރުން ދުވަސްވީ ފަރާތްތަކަށް ދޭ އެލަވަންސް 10،000 ރުފިޔާއަށް ބޮޑު ކުރަން ޕެންޝަނާއި ބެހޭ ޤާނޫނަށް އިސްލާހު ގެނައުމުގެ ބިލެއް ރައްޔިތުންގެ މަޖިލީހަށް ހުށަހަޅުއްވާފައެވެ. އެ އިސްލާހަކީ އެއްވެސް ތާކުން ތާކު ނުޖެހޭ އިސްލާހެއްގެ ގޮތުގައި އެމްޑީޕީގެ މެމްބަރުން ވަނީ ސިފަ ކުރައްވާފައެވެ.

މަޖިލީހުގައި ކުރިއަށް ދިޔަ ބަހުސްގައި އެމްޑީޕީގެ މެމްބަރުން ވިދާޅުވީ، އުމުރުން ދުވަސްވީ މީހުންނަށް ދެމުން އަންނަ 5000 ރުފިޔާގެ އިނާޔަތް 10،000 ރުފިޔާއަށް ބޮޑު ކުރަން ޖާބިރު ހުށަހެޅުއްވީ ސަރުކާރުގެ މާލީ ހާލަތަށް ބެއްލެވުމެއް ނެތި ކަމަށެވެ.