މަޖިލީހަށް އިންތިޚާބު ކުރަން ޖެހެނީ މިލިއަނަރުން: ގާސިމް
ރައްޔިތުންގެ މަޖިލީހަށް އިންތިޚާބު ކުރަންޖެހެނީ ފައިސާގެ ގޮތުން ތަނަވަސް މިލިއަނަރުން ކަމަށް ރިޖުމްހޫރީ ޕާޓީގެ ލީޑަރު ގާސިމް އިބްރާހިމް މިއަދު ވިދާޅުވެއްޖެ އެވެ.
އދ. ދަނގެތީގައި ބޭއްވި ޖޭޕީގެ ޖަލްސާއެއްގައި ވާހަކަ ދައްކަވަމުން ގާސިމް ވިދާޅުވި ގޮތުގައި މަޖިލީހަށް މިލިއަނަރުން އިންތިޚާބު ކުރަން ޖެހެނީ އެބޭފުޅުން ރިޝްވަތަށް ނުހެއްލޭނީ އޭރުން ކަމަށް ވާތީ ކަމަށެވެ.
މި މޭރުމުން ވާހަކަ ދައްކަވަމުން ގާސިމް ވަނީ "އަމިއްލައަށް ކައިގެން ބޮއެގެން ނޫޅެވޭ ފެންވަރުގެ މީހުން" މަޖިލީހަށް ހޮވުމުން ވާނީ ކިހިނެއްތޯ ސުވާލު އުފައްދަވާފައެވެ.
"އެ މީހަކު އަމިއްލަ އަށް ކައިގެން ބޮއެގެން އުޅެވޭނެ ވަރު ނެތް މީހުން މަޖިލީހަށް ކުރިމަތިލައިގެން ހޮވުނީމަ ކިހިނެއްތޯ ވާނީ؟،" ޖޭޕީގެ ފަރާތުން ދަނގެތީ ދާއިރާއަށް ވާދަކުރައްވާ ކާނަލް ނާޒިމްގެ ކެމްޕެއިން ޖަލްސާގައި ގާސިމް ވިދާޅުވިއެވެ.
މަޖިލީހަށް ހޮވަން ޖެހޭނީ ފައިސާވެރިން ކަމަށް ވިދާޅުވެ ގާސިމް ވާހަކަ ދެއްކެވި އިރު ސޯޝަލް މީޑިޔާގައި ގިނަ ބަޔަކު އަންނަނީ މަޖިލީހަށް މަހުޖަނުން ހޮވުމާއި ދެކޮޅަށް ކެމްޕެއިން ކުރަމުންނެވެ.
އޭގެ ތެރޭގައި އެމްޑީޕީގެ އިސް ބޭފުޅުން ވެސް ހިމެނެއެވެ. އެބޭފުޅުން ވިދާޅުވަމުން ގެންދަވަނީ މަހުޖަނުންގެ ނުފޫޒުން މަޖިލިސް ސަލާމަތް ކުރަން ޖެހިފައިވާ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
