ފަރެސްމާތޮޑާގައި ހިންގި ގްރޫޕު މާރާމާރީއަކާއި ގުޅިގެން ތިން މީހަކު ހައްޔަރުކޮށްފި

ގދ. ފަރެސްމާތޮޑާގައި ހިންގި ގުރޫޕު މާރާމާރީ އަކާއި ގުޅިގެން ކޯޓު އަމުރެއްގެ ދަށުން ތިން މީހަކު ހައްޔަރުކޮށްފިއެވެ.

ފުލުހުން މިއަދު ބުނީ، މިމަހު 25 އަދި 27 ގައި ފަރެސްމާތޮޑާގައި މާރާމާރީތަކެއް ހިންގާފައިވާކަމުގެ މައުލޫމާތު ލިބިފައިވާ ކަމަށެވެ.

މި މާރާމާރީތައް ހިންގާފައިވަނީ އެރަށު މާތޮޑާ އާއި ފަރެސް އަވަށަށް ނިސްބަތްވާ ޒުވާނުންތަކެއްގެ މެދުގައި ކަމަށާއި މި މާރާމާރީތަކުގައި ތިން މީހަކަށް އަނިޔާވެގެން އެރަށު ސިއްހީ މަރުކަޒުގައި ފަރުވާ ދީފައިވާކަމަށް ފުލުހުން ބުންޏެވެ.

ފުލުހުން ބުނެފައިވާ ގޮތުަގައި އެ ތިން މީހުންނަށް ވެސް އެކިވަރުގެ އަނިޔާ ލިބިފައިވެއެވެ.

މި މާރާމާރީތަކާއި ގުޅިގެން 19 އަހަރާއި 18 އަހަރާއި 20 އަހަރުގެ ދިވެހި ތިން މީހަކު ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށާއި މި ތިން މީހުންގެ ބަންދަށް ތިނަދޫ މެޖިސްޓްރޭޓު ކޯޓުން ހަތް ދުވަހުގެ މުއްދަތު ޖަހާފައިވާކަމަށް ވެސް ފުލުހުން މައުލޫމާތު ދެއެވެ.

އަދި އެއީ އެރަށުގައި ސިލްސިލާކޮށް ހިންގަމުންދާ މާރާމާރީތަކެއް ކަމަށް ބެލެވޭ ކަމަށް ފުލުހުން ބުނެފައި ވެއެވެ. އެމައްސަލަ ފުލުހުން ތަހުގީގު ކުރަމުންދާކަމަށްވެސް ފުލުހުން ބުނެއެވެ.