އިބޫއަށް ފިޔަވަޅު ނޭޅީ ޝަކުވާއެއް ހުށަހަޅައިފައި ނެތީމައި: ހޫދު

ގްރޭޓާ މާލެ ކުންފުނީގެ މެނޭޖިން ޑިރެކްޓަރު އިބްރާހިމް ރަޝީދު (މާމިގިލީ އިބޫ) އާ މެދުގައި ރައީސުލްޖުމްހޫރިއްޔާގެ އޮފީހުން މިހާތަނަށް ފިޔަވަޅު އަޅައިފައި ނުވަނީ ތަހުގީގީ އިދާރާއަކުން ރައީސް އޮފީހަށް ޝަކުވާއެއް ހުށަހަޅާފައި ނުވާތީ ކަމަށް ރައީސް އޮފީހުގެ ތަރުޖަމާނު އިބްރާހީމް ހޫދު ވިދާޅުވެއްޖެއެވެ.

ހޫދު މިފަދައިން ވިދާޅުވީ މޯލްޑިވް ގޭހުގެ މެނޭޖިން ޑިރެކްޓަރު ޝަޒައިލް ޝިޔާމް، ސަސެޕްންޑްކޮށްފައި ހުންނަ މައްސަލައިގައި ބައެއް ފަރާތްތަކުން ސަރުކާރަށް ފާޑު ކިޔާ މައްސަލައިގައެވެ. ރައީސް އޮފީހުން ޝަޒައިލް ސަސްޕެންޑްކޮށްފައި ވަނީ މިއަހަރުގެ އޮކްޓޯބަރު 15 ގައެވެ.

ޝަޒައިލް ސަސްޕެންޑް ކުރި އިރު، އިބްރާހިމް ރަޝީދު (އިބޫ) އަށް ފިޔަވަޅު ނާޅާތީ ސަރުކާރަށް ފާޑުކިޔުން އަމާޒުވެފައިވާއިރު، އިބޫގެ މައްޗަށް ތުހުމަތުކުރަނީ، ތިލަފުށި ފަޅުތެރޭގައި އޮތް ބޯޓެއް ނަގަން ޕާކަވަން ކުންފުންޏާ ހަވާލުކުރީ ކޮރަޕްޝަނަށް މަގުފަހިވާ ގޮތަށް ކަމަށް ބުނެ ހުށަހަޅާފައިވާ މައްސަލައަކާއި ގުޅިގެންނެވެ.

އެމައްސަލަ މިހާރު ދަނީ އޭސީސީން ބަލަމުންނެވެ.

''ވޮއިސް'' އަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު އިބްރާހީމް ހޫދު ވިދާޅުވީ، ސަރުކާރުގެ އިދާރާތަކާއި ސަރުކާރުގެ ކުންފުނިތަކުގައި ތިބި މުވައްޒަފަކަށް ފިޔަވަޅު އަޅަނީ، އެމީހަކާއި މެދު ތަހުގީގީ އިދާރާއަކުން ރައީސް އޮފީހަށް ޝަކުވާއެއް ހުށަހެޅުމުން ކަމަށެވެ.

ހޫދު ވިދާޅުވީ، އެފަދަ ޝަކުވާއެއް ނެތި އެއްވެސް މުވައްޒަފެއްގެ މައްޗަށް ފިޔަވަޅު ނޭޅޭނެ ކަމަށެވެ. އެގޮތުން ޝަޒައިލްގެ މައްޗަށް ފިޔަވަޅު އެޅީ، އޭނާގެ ޝަކުވާއެއް ރއީސް އޮފީހަށް ހުށަހެޅުމުން ކަމަށް ވިދާޅުވިއެވެ. ނަމަވެސް އިބޫއާއި ގުޅޭ ގޮތުން އޭސީސީން ވެސް އަދި އެހެން އެއްވެސް ފަރާތަކުން ޝަކުވާ ހުށަހަޅާފައި ނުވާކަމަށް ހޫދު ވިދާޅުވިއެވެ.