ދެ ދުވަސް ތެރޭ މަސައްކަތް ނިންމައި ކުންފުނީގެ ބިލު ، މަޖިލީހުގެ އަގުލަބިއްޔަތުން ފާސްކޮށްފި

ދެ ދުވަހުން ކުންފުނީގެ ގާނޫނަށް އިސްލާހު ގެނައުމަށް ސަރުކާރުގެ ފަރާތުން ހުށަހެޅި ބިލުގެ މަސައްކަތް ނިންމައި ރައްޔިތުންގެ މަޖިލީހުން އެ ބިލު ފާސްކޮށްފި އެވެ.

ކުންފުނީގެ ގާނޫނަށް ސަރުކާރުގެ ފަރާތުން އިސްލާހު ހުށަހަޅާފައި ވަނީ ފޭދޫ ދާއިރާގެ މެމްބަރު އިސްމާއިލް ނިޒާރު އެވެ.

ކުންފުނީގެ ގާނޫނުގައި މިހާރު އޮންނަ ގޮތުން ހިއްސާދާރުންގެ ހާއްސަ އާންމު ޖަލްސާއަކަށް ނޯޓިސް ފޮނުވަން އެކަމަށް އެދި ހުށަހަޅާތާ 21 ދުވަސް ތެރޭގައެވެ. ނަމަވެސް ނިޒާރު ހުށަހެޅުއްވި އިސްލާހުގައި ވަނީ އެ މުއްދަތު ތިން ދުވަހަށް ކުރު ކުރުމަށެވެ.

އަދި ހާއްސަގޮތުން ކުރާ އާންމު ޖަލްސާއެއް ބޭއްވުމުގެ ނޯޓިސް ފޮނުވަން ޖެހެނީ 14 ދުވަސް ކުރިންކަމަށް މިހާރު އޮތް ނަމަވެސް ސަރުކާރުން ހުށަހަޅާފައިވާ އާ އިސްލާހުގައި ވަނީ އެ މުއްދަތު ވެސް ހަތް ދުވަހަށް ކުރު ކުރުމަށް ހުށަހަޅާފައެވެ.

މީގެ އިތުރުން، ޕަބްލިކް އަދި ޕްރައިވެޓް ކުންފުނިތަކުގެ މެނޭޖިން ޑިރެކްޓަރުންނާއި ޑިރެކްޓަރުންގެ މަގާމު ހުސްވެއްޖެނަމަ އެ މަގާމަށް 30 ދުވަސް ތެރޭގައި މީހުން އައްޔަން ކުރަން އެންގުމަށް ރަޖިސްޓްރާ އޮފް ކޮމްޕެނީސްއަށް ދީފައިވާ ބާރު 10 ދުވަހަށް ކުރުކުރުމަށް ސަރުކާރުން އިސްލާހު ހުށަހަޅާފައިވެއެވެ.

ސަރުކާރުގެ ފަރާތުން މި އިސްލާހުތައް މަޖިލީހަށް ހުށަހެޅީ 11 ސެޕްޓެންބަރުގަ އެވެ. އެ ބިލާ ގުޅޭ ބަހުސް އިއްޔެ ދައުރުން ބޭރުން ބޭއްވި ޖަލްސާގައި ކުރިއަށް ގެންގޮސް، އިގުތިސާދީ ކޮމިޓީއަށް ފޮނުވައި ކޮމިޓީން ބިލު ފާސްކުރަން ފެންނަކަމަށް އިއްޔެ ކަނޑައަޅާފައުވާއިރު، ކޮމިޓީގެ ރިޕޯޓަށް އެއްވެސް މެންބަރަކު ބަހުސް ނުކުރުމުން، މިއަދު ބިލަށް ވޯޓަށް ވަނީ އަހާފައެވެ.

އަދި މިއަދު ނެގި ވޯޓުގައި ހުރިހާ މެންބަރުންގެ އިއްތިފާގުން އެ އިސްލާޙު ވަނީ ފާސްކޮށްފައިވެ އެވެ.