ދިގު މާޒީގައި ތ.އަތޮޅު ރާޑަރުން ކައްސާލާ ފަހަތަށް ގޮސްފައި އޮތް އޮތުން ނިމުމަކަށް ގެންނާނަން: ރައީސް މުޢިއްޒު

ދިގު މާޒީގައި ތ. އަތޮޅު ރާޑަރުން ކައްސާލާ ފަހަތަށް ގޮސްފައި އޮތް އޮތުން ނިމުމަކަށް ގެނެސްދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ކޮޅުމަޑުލަށް ކުރައްވާ ދަތުރުފުޅުގައި މިއަދު ތ. ކަނޑޫދޫ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ ތ އަތޮޅަކީ މިވީހާ ތަނަށްވެސް އަޅާ ނުލެވިފައި އޮތް ރަށެއް ނަމަވެސް، އެމާނިކުފާނުގެ ސަރުކާރުން އެ އަތޮޅަކީ ތަރައްގީ ވެފައިވާ ރަށްތަކެއް ހިމެނޭ އަތޮޅަކަށް ހަދައި ދެއްވާނެ ކަމަށެވެ.

އަޅުގަނޑު ދޭން ބޭނުންވާ ޔަގީން ކަމަކީ، މި ދިގު މާޒީގައި މި އަތޮޅު މިހާބޮޑަށް ރާޑަރުން ކައްސާލައި ފަހަތަށް ގޮސްފައި އޮތް އޮތުން އަޅުގަނޑު ނިމުމަކަށް ގެނެސްދޭނަމޭ. އިރާދަކުރެއްވިޔާ މި ރަށަކީ ތަރައްގީގައި އެންމެ ކުރީ ސަފުގައި، ފުރުސަތުތައް ލިބިދޭ ތަރައްގީ ވެފައި ހުރި ރަށްތަކެއް ހިމެނޭ އަތޮޅަކަށް އަޅުގަނޑުމެންގެ ސަރުކާރުން ހަދައިދޭނަމޭ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މިއާއެކު ރައީސް މުޢިއްޒު ވިދާޅުވީ ކަނޑޫދޫ ރައްޔިތުންނަށް ހުރި ދަތިތަކުގެ ވާހަކަ ކައުންސިލުން ފާހަގަކޮށްފައިވާ ކަމަށާއި، އެއީ ޝަކުވާ ކުރުން ނޫން ކަމަށެވެ. އެހެނީ ރައްޔިތުން ވެރިޔަކު ހޮވަނީ ރައްޔިތުން ބޭނުންވާ ތަރައްޤީގެ މަޝްރޫއުތައް ހިންގާ، ރައްޔިތުން ބޭނުންވާ ކަންތައްތައް ކޮށްދެއްވުމަށް ކަމަށް ރައީސް ވިދާޅުވިއެވެ.

އެގޮތުން ކަނޑޫދޫގައި ހުއްޓިފައި ހުރި ކަންކަމާއި، ނުކުރެވި ހުރި ކަންކަންވެސް ކޮށްދެއްވާނެ ކަމަށް ރައީސް ވަނީ ވިދާޅުވެފައެވެ.

ހޮސްޕިޓަލުގެ މަސައްކަތް އަވަސްކޮށް، ހޮސްޕިޓަލް ނިމިގެންދާނީ ލެބޯޓްރީއަކާއެކު. އެކަން ވެސް ވެގެންދާނެ. ހުއްޓިފައި ހުރި މަޝްރޫއުތަކުގައި ދިމާވާ މައްސަލަތަކުގެ ވާހަކަ އަޅުގަނޑު ކުރިން ވެސް ފާހަގަކޮށްފައިވާނެ. ކުންފުނިތައް ވަރަށް ބޮޑަށް އޮތީ މިސްމެނޭޖްކޮށްފައި. ނަރުދަމާއި އާއި ބަނދަރުގައި އުޅަނދުފަހަރުތަކަށް ވަކި ޖެޓީއެއް ކަނޑޫދޫގައި ހަދައިދޭނަން. ޖުމްލަކޮށް ބަނދަރަށް ގެންނަން ބޭނުންވާ ބަދަލުތައް އަޅުގަނޑު ގެނެސްދޭނަން

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

މީގެ އިތުރުން ރައީސް ވިދާޅުވީ ތަރައްޤީގެ ސަފުގައި ކުރިއަރައިގެންދާނެ ރަށަކަށް ކަނޑޫދޫ ހައްދަވާދެއްވާނެ ކަމަށާއި ރައްޔިތުން އެދޭ އަމާޒަށް ރައްޔިތުން ބޭނުންވާ މިންވަރަށް ކަންތައްތައް ކޮށްދެއްވާނެ ކަމަށެވެ.

ޖުމްލަކޮށް ކަނޑޫދޫ ރައްޔިތުންގެ މާޔޫސްކަން ނިމުމަކަށް ގެނެސް، މި ސަރުކާރުން އެ ރައްޔިތުންނަށް ހިނިތުންވުން ގެނެސްދެއްވާނެ ކަމުގެ ޔަޤީންކަން ރައީސް ޑރ. މުއިއްޒު ވަނީ ކަނޑޫދޫގެ ރައްޔިތުންނަށް ދެއްވާފައެވެ.