އޭސީސީން މައްސަލަ ނިންމާތާ 3 ދުވަސް ތެރޭގައި ފްލެޓް އެގްރިމެންޓުގައި ސޮއިކުރެވޭނެ: އެފްޑީސީ

މިދިޔަ ސަރުކާރުން ހުޅުމާލެއިން ދޫކުރި ފުލެޓްތައް ލިބޭ މީހުންގެ ލިސްޓާއި ގުޅޭ ގޮތުން އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅާފައިވާ މައްސަލަ ނިންމާތާ 3 ދުވަސް ތެރޭގައި ފްލެޓު އެގްރިމެންޓުގައި ސޮއިކުރަން ފެށޭނެ ކަމަށް، ފަހި ދިރިއުޅުން ކޯޕަރޭޝަން (އެފްޑީސީ) އިން މިއަދު ބުނެފިއެވެ.

އެފްޑީސީން މިފަދައިން ބުނެފައިވަނީ އެ ކޯޕަރޭޝަންގެ ފަރާތުން ސޯޝަލް މީޑިއާގައި އާއްމުކުރި ކުރު ވީޑިއޯ އެއްގައެވެ.

އެ ވީޑިއޯގައި ބުނެފައިވަނީ ފްލެޓްގެ އެގްރިމެންޓުތައް ޕްރިންޓުކޮށް ނިންމާފައިވާ ކަމަށާއި، ލިސްޓުގެ ކަންކަން ނިމޭތާ ތިން ދުވަހުގެ ތެރޭގައި ސޮއިކުރަން ފެށޭނެ ކަމަށެވެ.

އިބުރާޙިމް މުޙައްމަދު ޞާލިޙް ސަރުކާރުން އިއުލާންކުރި ގެދޮރުވެރިޔާ ސްކީމްގެ ދަށުން ހުޅުމާލޭގައި އަންނަނީ 4،000 ފްލެޓު އަޅަމުންނެވެ. އެފުލެޓްތަކުގެ މަސައްކަތް ނުނިމުނު ނަމަވެސް  ނަމަވެސް، މިދިޔަ ނޮވެމްބަރު މަހުގެ 17 ގައި އެ ވެރިކަން ނިމުނުއިރު، އެ ސަރުކާރުން ވަނީ ފްލެޓު ލިބޭ މީހުންގެ ދާއިމީ ލިސްޓު އާއްމުކޮށް ބައެއް މީހުންނަށް ލިޔުން ވެސް ދީފައެވެ.

ބައެއް މީހުންނަށް ލިޔުން ދިނުމުގައި ކަރްޕްޝަނަށް މަގުފަހިވާ ގޮތަށް ކަންތައްތަކެއް ހިނގަފައިވާކަމަށް ބުނެ އޭސީސީއަށް ބަޔަކު ހުސައެޅި މައްސަލައަކާއި ގުޅިގެން މިހާރު އެސީސީން އަންނަނީ އެމައްސަލަ ތަޙްޤީގު ކުރަމުންނެވެ.

އެ މައްސަލަ އާއި ގުޅޭގޮތުން އޭސީސީން މީގެ ކުރިން ބުނެފައިވަނީ އެ މައްސަލައަކީ ވަރަށް ހައްސާސީ މައްސަލައަކަށް ވާތީ އެ މައްސަލަތައް ވީހާ އަވަހަކަށް ނިންމަން އެ ކޮމިޝަންގެ ތަހުގީގު ޓީމުތަކުން ވަރަށް ބާރަށް މަސައްކަތް ކުރަމުން ގެންދާކަމަށެވެ.