ފެންނަނީ ޑިޕްލޮމަސީގައި މި ސަރުކާރުގެ ތަޖުރިބާ ނެތްކަން: ޝާހިދު

ފެނިގެންދަނީ ޑިޕްލޮމެސީގައި މިސަރުކާރުގެ ތަޖުރިބާ ނެތްކަން ކަމަށް އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، އިންޑިއާ އާއި ރާއްޖޭގެ ޒަމާންވީ ގުޅުން ބަދަހިވަމުން އަންނަތަން ފެނުމުން އުފާކުރައްވާ ކަމަށާއި، އިންޑިއާއިން ދިވެހި ރައްޔިތުންނާއެކު ސާބިތުކަމާއެކު ދެމިތިބީތީ ޝުކުރު އަދާކުރައްވާކަމަށެވެ.

ޝާހިދު ވިދާޅުވީ،  ކުރީގެ ރައީސް އިބްރާހީމް މުހައްމަދު ޞާލިޙުގެ ވެރިކަމުގައި ފައްޓަވާފައިވާ މަޝްރޫއުތައް ކާމިޔާބުވެ، ކުރިއަށް ދާތަން ފެންނާތީ އުފާކުރައްވާ ކަމަށެވެ.

މީގެ ތެރޭގައި، ރޫޕޭ ކާޑު ތައާރަފްކުރުމާއި، ހަނިމާދޫ އެއާޕޯޓުގެ އައު ރަންވޭ އިފްތިތާހްކުރުމާއި، އެންޓި ކޮރަޕްޝަން ކޮމިޝަނާއި، ޖުޑީޝަލް ސާވިސް ކޮމިޝަން އަދި ކުޅިވަރާއި ޒުވާނުންނާ ގުޅުން ހުރި އެމްއޯޔޫތައް ދެމެހެއްޓުން ހިމެނޭކަން ޝާހދު ފާހަގަކުރެއްވިއެވެ.

ހަމައެއާއިއެކު، އައްޑޫ ސިޓީގައި ކޮންސުލޭޓެއް ހުޅުވުމަށް އޭރު މިސަރުކާރުން އިދިކޮޅުގައި ތިބެ ދެކޮޅު ހެދިނަމަވެސް، މިހާރު އެކަމާއި ގުޅޭ މަޝްވަރާތައް ކުރިއަށްގެންދާތީ އުފާކުރައްވާކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ، ބައިނަލްއަގްވާމީ ގުޅުންތައް، ދޮގާއި މަކަރާއި ހީލަތުން ނުހިންގޭނެކަން ހާމަވަމުންދާކަމަށާއި، އެކަން ސަރުކާރަށް އިހުސާސްވަމުންދާކަމަށެވެ. އަދި ޑިޕްލޮމެސީގައި މި ސަރުކާރުގެ ތަޖުރިބާ ނެތްކަން ފެންނަމުންދާކަމަށް ވިދާޅުވެ ޝާހިދު ވަނީ ސަރުކާރަށް ފާޑު ވިދާޅުވެފައެވެ.