ކުޑަކުދިންގެ ބަރަހަނާ މަންޒަރުތައް ޑައުންލޯޑުކުރި މައްސަލައެއްގައި ފިރިހެނެއްގެ މައްޗަށް ދައުވާކުރަން ފޮނުވައިފި

ކުޑަކުދިންގެ ބަރަހަނާ މަންޒަރު ހިމެނޭ ވީޑިއޯއާއި ފޮޓޯ ޑައުންލޯޑުކުރި މައްސަލައެއްގައި 32 އަހަރުގެ މީހަކަށް ދައުވާކުރުމަށް ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާކަމަށް ފުލުހުންގެ ޚިދުމަތުން ބުނެފިއެވެ.

ފުލުހުންގެ ކްރައިމް އިންވެސްޓިގޭޝަން ކޮމާންޑުން މިއަދު ބޭއްވި ނޫސްވެރިންގެ ބައްދަލުވުމެއްގައި ފުލުހުން ބުނެފައިވަނީ މިހާރަކަށް އައިސް އޮރިޔާން މަންޒަރު ވީޑިއޯކޮށް ބްލެކްމެއިލް ކުރާ މައްސަލަތައް އިތުރުވަމުންދާކަން ފާހަގަކުރެވިފައިވާ ކަމަށެވެ. އެގޮތުން ކައިވެނި ކޮށްގެން އުޅޭ ފަރާތްތަކާއި ރަށްޓެހިވެގެން އުޅޭއިރު ނަގާފައި ހުންނަ ބަރަހަނާ މަންޒަރު ދައްކައިދޭ ފޮޓޯއާއި ވީޑިއޯ ބޭނުން ކޮށްގެން ބްލެކްމެއިލް ކުރާ މައްސަލަތައް ގިނައިން ފާހަގަކުރެވެމުންދާ ކަަން ފާހަގަކޮށްފައި ވެއެވެ.

ހަމަ އެހެންމެ، ވީޑިއޯ ކޯލްކޮށްގެން ބަރަހަނާ ވުމާއި ފަހުން، އެ ވީޑިއޯ މެދުވެރިކޮށް ބްލެކްމެއިލް ކުރުމާއި، އަދި ސޯޝަލް މީޑިއާ މެދުވެރިކޮށް މެސެޖުކޮށް، ގެސްޓް ހައުސް ތަކުން ބައްދަލު ކުރަން ދިޔުމުމް ގަދަކަމުން ބަރަހަނާކޮށް، ފޮޓޯ ނަގައިގެން ބްލެކްމެއިލް ކުރާ މައްސަލަތައްވެސް ރިޕޯޓް ކުރެވޭ ކަމަށް ފުލުހުން ވިދާޅުވިއެވެ.

މީގެ އިތުރުން ކުޑަކުދިންގެ ބަރަހަނާ މަންޒަރު ހިމެނޭ ފޮޓޯއާއި ވީޑިއޯ ސޯޝަލް މީޑިއާ މެދުވެރިކޮށް ޑައުންލޯޑުކުރި މައްސަލައެއްގެ މައުލޫމާތު ބޭރުގެ ޤާނޫނު ތަންފީޒުކުރާ އިދާރާތަކަކުން ފުލުހުމްނަށް ދީފައިވާ ކަމަށް ބުނެފައިއެވެ. އަދި އެ މައުލޫމާތު ފުލުހުންނާއި ހިއްސާ ކުރުމާއި ގުޅިގެން ދެ މައްސަލައެއްގެ ތަހުގީގު ފަށާފައިވާ ކަމަށްވެސް ފުލުހުން ބުންޏެވެ.

އޭގެ ތެރެއިން އެއް މައްސަލައިގެ ތަހުގީގު ނިންމައި ނިމިދިޔަ އަހަރުގެ އޮކްޓޯބަރ މަހުގެ ތެރޭގައި ޕީޖީ އޮފީހަށް ހުށަހަޅާފައުވާ ކަމަށާ އެ މައްސަލާގައި ދައުވާ ކުރަން ފޮނުވީ 32 އަހަރުގެ ދިވެހި ފިރިހެނަކަށް ކަމަށް ބުނެފައިވެއެވެ.

ފުލުހުން ބުނީ އޭގެ ދެވަނަ މައްސަލައިގެ ތަހުގީގު މިހާރުވެސް ކުރިއަށްދާ ކަމަށެވެ.

އެ މައްސަލައިގެ ތަފްސީލް ހިއްސާ ކުރައްވަމުން ފުލުހުންގެ ކްރައިމް އެންޑް އިންވެސްޓިގޭޝަން ޓީމުން އިތުރަށް ބުނީ އެ މައްސަލާގައި ޑައުންލޯޑުކޮށްފައިވާ ފޮޓޯތަކާއި ވީޑިއޯތަކުން ފެންނަ ކުދިންގެ އުމުރުފުރާއަށް ބަލާއިރު 2 އަހަރުކަމަށް ބެލެވޭ ކުދިންނާއި ހަމައިން ފެށިގެން 18 އަހަރާ ދެމެދުގެ އެކި އުމުރުފުރާގެ ކުދިންގެ ވީޑިއޯއާއި ފޮޓޯ ޑައުންލޯޑުކޮށްފައިވާކަން ފާހަގަކުރެވިފައިވާކަމަށެވެ.

ސޯޝަލް މީޑިއާ މެދުވެރިކޮށް ކުޑަކުދިންގެ ބަރަހަނާ މަންޒަރުތައް ރާއްޖެއަށް ނިސްބަތްވާ ސިމްކާޑުތަކާއި އައިޑީތައް ބޭނުންކޮށްގެން ޑައުންލޯޑުކުރާ މައްސަލައަކީ ފުލުހުންގެ ޚިދުމަތުން ސީރިއަސް މައްސަލައެއްގެ ގޮތުގައި ބަލަމުންދާ ކަމެއް ކަމަށް ފުލުހުން ބުންޏެވެ.

އަދި ކުރިއަށް އޮތް ތަނުގައި މިފަދަ މައްސަލަތައް ތަހުގީގުކޮށް ބެލުމަށް ފުލުހުންގެ ޤާބިލުކަން އިތުރުކުރުމުގެ ގޮތުން ފުލުހުންގެ ތެރެއިން އެފަދަ މައްސަލަތައް ތަހުގީގުކުރާ އޮފިސަރުންނަށް އިތުރު ތަމްރީނުތައް ދިނުމުގެ މަސައްކަތް މިއަހަރު ތެރޭގައި ފެށިގެންދާނެ ކަމުގައި ފުލުހުންގެ ޚިދުމަތުން ބުނެފައިވެއެވެ.