މިމަހު އެކަނިވެސް 340 ބިދޭސީއަކު ޤައުމަށް ފޮނުވާލެވިއްޖެ: ރައީސް

ނުގަވައިދުން އުޅޭ ބިދޭސީން ހޯދުމަށް ކުރިއަށްގެންދާ އޮޕަރޭޝަނުގައި މިމަހުގެ މިހާތަނަށް 340 ބިދޭސީއަކު ރާއްޖެއިން ފޮނުވާލާފައިވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ނުގަވައިދުން އުޅެމުންދާ ބިދޭސީން ހޯދުމަށް ސަރުކާރުން ކުރިއަށްގެންދާ މަސައްކަތްތަކާ ބެހޭގޮތުން ތ.ގުރައިދޫގައި ބޭއްވި ޖަލްސާގައި ވާހަކަދައްކަވަމުން ރައީސް ވިދާޅުވީ ރާއްޖޭގައި ގަވައިދާ ހިލާފަށް މަސައްކަތްކުރަމުންގެންދާ ބިދޭސީން ހޯދައި އެމީހުން ފޮނުވާލުމުގެ މަސައްކަތަކީ ސަރުކާރުން ހާއްސަ އިސްކަމެއް ދީގެން ކުރަމުން އަންނަ މަސައްކަތެއްކަމަށެވެ. މިގޮތުން ފަށާފައިވާ މަސައްކަތްތަކުގެ ނަތީޖާ ފެންނަމުންދާކަމަށްވެސް ރައީސް ވަނީ ފާހަގަކުރެއްވާފައެވެ.

ރައީސް ވިދާޅުވީ، ގަވާއިދާ ހިލާފަށް އުޅޭ ބިދޭސީން ހޯދުމަށް މިފަހުން ގައުމީ ފެންވަރުގައި ފެށި އޮޕަރޭޝަނުގައި ވޭތުވެދިޔަ ފަސް ދުވަހުގެ ތެރޭގައި މާލެއިން އެކަނިވެސް 474 ވިޔަފާރިއެއް ބަލާފާސްކޮށްފައިވާކަމަށެވެ. އެކަމުގެ ތެރެއިން 959 ބިދޭސީންގެ މައުލޫމާތުތައް ބެލިއިރު ނުގަވައިދުން އުޅުނު 108 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންދެވިފައިވާކަން ރައީސް ވިދާޅުވިއެވެ.

އެމީހުން ޑިޕޯޓް ކުރުމުެގ މަސައްކަތް ދަނީ ކުރިއަށް. އަޅުގަނޑުމެން ބޭނުމެއްނޫން ދިވެހިންގެ މަސައްކަތުގެ ތެރެއަށް އެމީހުން އައިސް މިގޮތަށް އުޅޭކަށް

ރައީސް ވިދާޅުވިއެވެ

ރައީސް ވިދާޅުވީ މިމަހުގެ މިހާތަނަށް 110 ބިދޭސީއަކު ރާއްޖެއިން ޑީޕޯޓްކޮށްފައިވާއިރު، ޑިޕޯޓްކުރަން ތައްޔާރުވަމުންދަނިކޮށް އަމިއްލައަށް އެދިގެން 230 މީހަކު އެމީހުންގެ ގައުމަށް ފޮނުވާލާފައިވާކަމަށެވެ.

ޤަވައިދާ ހިލާފަށް އުޅޭ ބިދޭސީން ހޯދުމުގެ އޮޕަރޭޝަން މިމަހުގެ 21 ވަނަ ދުވަހު ފަށާނޭކަން އިއުލާނުކުރައްވާފައިވަނީ ފ. ނިލަންދޫގައި ބޭއްވި ޖަލްސާގައެވެ. ރައީސް ވިދާޅުވެފައިވަނީ، ޤަވާއިދާ ހިލާފަށް އުޅޭ ބިދޭސީންގެ މައްސަލައަކީ މިހާރު ރާއްޖޭގައި އެންމެ ބޮޑު އެއް މައްސަލަ ކަމަށާއި، ނުގަވައިދުން އުޅެމުންދާ ބިދޭސީންގެ ސަބަބުން ދިވެހިންނަށް ލިބެންޖެހޭ ފުރުސަތުތައް ހަނިވެފައިވާކަމަށެވެ.

މި އޮޕަރޭޝަން ރާއްޖޭގައި މީހުން ދިރިއުޅޭ ހުރިހާ ރަށެއްގައި ކުރިއަށްގެންދާނޭކަމަށާއި، ހާއްސަ ގޮތެއްގައި ބޮޑެތި އާބާދީތައް ދިރިއުޅެމުންދާ ރަށްތައް ބަލާނޭކަމަށް ރައީސްގެ ވާހަކަފުޅުގައި ފާހަގަކުރެއްވިއެވެ.