މާލެ ސިޓީ ކައުންސިލަށް އަލަށް އިންތިހާބުވި ތިން މެމްބަރުން ހުވާކުރައްވައިފި

މާލެ ސިޓީ ކައުންސިލަށް އަލަށް އިންތިހާބުވި ތިން މެމްބަރުން ހުވާކުރައްވައިފިއެވެ.

އަލަށް އިންތިހާބުވި ތިން ކައުންސިލަރުން ހުވާކުރުމަށްޓަކައި މިއަދު މާގިރީގައި ބޭއްވި ރަސްމިއްޔާތުގައި ތިން މެމްބަރުންނަށް ހުވާ ލައްވައިދެއްވާފައިވަނީ ޑްރަގް ކޯޓުގެ ގާޒީ މުހައްމަދު ސަމީރުއެވެ.

މިދިޔަ މަހުގެ 20 ގައި ބޭއްވި ބައި އިލެކްޝަނުގައި މާލެ ސިޓީ ކައުންސިލުގެ ތިން ގޮނޑިވެސް ވެރިކަން ކުރާ ޕީއެންސީން ކާމިޔާބު ކުރިއިރު، އަލަށް ހުވާ ކުރެއްވި ތިން މެމްބަރުންނަކީ:

1) އަލީ އައިމަން – ހުޅުމާލެ ދާއިރާ

2) ފާތިމަތު ޝައުފާ ސަލީމް – ހެންވޭރު ހުޅަނގު ދާއިރާ

3) ފާތިމަތު އިޝާން އަލީ – މައްޗަންގޮޅި މެދު ދާއިރާ

މި ތިން ދާއިރާގެ ގޮނޑި ހުސްވީ މީގެ ކުރިން އެ ދާއިރާގެ ގޮނޑިތަކުގައި ތިއްބެވި މެމްބަރުން މަޖިލީހަށް އިންތިހާބުވެވަޑައިގަތުމާއި ގުޅިގެންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން މާލެ ސިޓީގެ މޭޔަރު އާދަމް އާޒިމް ވިދާޅުވީ، އޭނާ މޭޔަރު ކަމަށް އިންތިޚާބުވި ދުވަހުން ފެށިގެން މަސައްކަތް ކުރައްވައިފައިވަނީ ވަކި ފިކުރަކަށް ބެލުމެއް ނެތި، މާލޭގެ ރައްޔިތުންގެ ލާބައާއި މަންފާއަށް ޓަކައި ކަމަށާއި، ރައްޔިތުންގެ ވޯޓުން ހޮވޭ މެންބަރުންނަށް އޮތް ހިތްހަމަޖެހުމަކީ، އެ މީހެއްގެ ގާބިލުކަމާއި އިޚުލާސްތެރިކަން ބަލައިގަންނަ ގިނަ ބަޔަކު ތިބިކަން އިހުސާސުވުން ކަމަށެވެ.

"މީގެ ސަބަބުން މި ގާބިލްކަމާއި އިޚުލާސްތެރިކަން ދެމެހެއްޓުމަށް ގަދައަޅައި އަޒުމާއި އިޚުލާސްތެރިކަމާއެކު މަސައްކަތް ކުރަން ޖެހޭ. ތެދުވެރިކަމާއި އަމާނާތްތެރިކަމާއެކު މަސައްކަތް ކުރަން ޖެހޭ. ވެރިއަކަށް ލިބިވަޑައިގެންފައިވާ އިޚުތިޔާރުގެ ދަށުން މަގާމަކަށް އައްޔަން ކުރާ ބޭފުޅަކަށް މި އިހުސާސް ކުރެވޭ ގޮތް ތަންކޮޅެއް ކުޑަވާނެ،"

އާޒިމް ވިދާޅުވިއެވެ.

އެހެންކަމުން އާޒިމް ވަނީ ރައްޔިތުންގެ އުއްމީދުތަކުގައި ކުލަ ޖެއްސުމަށާއި މާލޭ ސިޓީ ކައުންސިލްގެ ސިޔާސަތުތައް ކަނޑައެޅުމުގައި އާ ކައުންސިލަރުން އެއްބާރުލުން ދެއްވުމަށް އެދިވަޑައިގެންފައެވެ.