ފްރާންސްގެ މުސްލިމު ޢާއިލާ ފޮނުވާލާތީ ގިނަބައެއް ކަންބޮޑުވުން ފާޅުކުރަންފަށައިފި

ދިވެހިރާއްޖޭގައި ވިސާ ނެތި މީގެ 12 އަހަރު ކުރިން ފެށިގެން ދިރިއުޅެމުން އަންނަ ފްރާންސްގެ މުސްލިމު އާއިލާ ރާއްޖެއިން ފުރުވާލުމަށް ނިންމި ނިންމުމާއި ގުޅިގެން ގިނަ އަދަދެއްގެ ދިވެހިން ކަންބޮޑުވުން ފާޅުކުރަންފަށައިފިއެވެ.

ތ. ވޭމަންޑޫގައި މިވަގުތު ދިރިއުޅެމުން އަންނަ ފްރާންސްގެ މި އާއިލާގައި ހިމެނެނީ ދެމަފިރިންނާއި އެމީހުންގެ 5 ދަރިންނެވެ. އެއީ 18 އަހަރު ނުފުރޭ 3 ފިރިހެން ކުދިންނާއި 2 އަންހެން ކުދިންނެވެ. މީގެތެރެއިން 2 ކުދިން ވިހާފައިވަނީ ރާއްޖެއަށް ދިރިއުޅުން ބަދަލުކުރި ފަހުންނެވެ. އެމީހުން ރާއްޖޭގައި ދިރިއުޅެން ފަށާފައިވަނީ، އިސްލާމްވުމަށްފަހު އަމިއްލަ ޤައުމުގައި އުޅެން ދަތިތަކެއް ހުރުމުންނެވެ.

އެގޮތުން އެންމެ ފުރަތަމަ، ރާއްޖެ އައިސް އެމީހުން ދިރިއުޅުނީ، ގދ. އަތޮޅާއި ލާމު އަތޮޅުގެ ރަށެއްގައެވެ. އެފަހުން ތ. އަތޮޅު ތިމަރަފުށީގައި އުޅުމަށްފަހު އެއަތޮޅު ވޭމަންޑޫއަށް ދިރިއުޅުން ބަދަލުކުރީއެވެ. އެރަށުގައި ދިރިއުޅެމުންދާތާ މިހާރު 6 މަސްދުވަސް ވެއްޖެއެވެ. ވިސާ ނެތުމުން ކުދިން ސްކޫލަށްވެސް ނުފޮނުވައި ކިޔަވައިދެނީ ގޭގައެވެ.

މި އާއިލާގެ ކަންކަން ރާއްޖޭގެ ނޫހަކުން އާއްމުންގެ ސަމާލުކަމަށް ގެނައުމުން، އިމިގްރޭޝަން ކޮންޓްރޯލަރ މުޙައްމަދު ޝަމްޢާން ވަހީދު ވަނީ، ދިވެހިރާއްޖޭގެ އިމިގްރޭޝަންގެ ޤާނޫނާއި ޚިލާފަށް ފްރާންސަށް ނިސްބަތްވާ 6 މީހުންގެ ޢާއިލާއެއް ރާއްޖޭގައި ދިރިއުޅެމުންދާ ކަމުގެ މައުލޫމާތު 'އިމިގްރޭޝަން ވޮޗް' އަށް 18 ޖުލައި 2024 ވަނަ ދުވަހު ލިބިފައިވާ ކަމަށެވެ.

އަދި އެ މައްސަލަ ބެލުމަށްފަހު 2024 އޮކްޓޫބަރު 23 ވަނަ ދުވަހު އެ މައްސަލާގައި ހިމެނޭ އިސްފަރާތް އިމިގްރޭޝަންގެ އިދާރާއަށް ހާޒިރު ކުރެވިފައިވާ ކަމަށްވެސް ބުންޏެވެ.

”އެ ފަރާތްތަކުގެ ޕާސްޕޯޓުގެ މުއްދަތު ހަމަވެފައިވާތީ، މި ޢާއިލާ ރާއްޖެއިން ފުރުވާލުމަށް ބޭނުންވާ ޓްރެވަލް ޑޮކިއުމަންޓު ހޯދުމުގެ މަސައްކަތް މިނިސްޓްރީ އޮފް ފޮރިން އެފެއަރޒާއި ގުޅިގެން މި އިދާރާއިން ކުރަމުންދާ ކަމުގައި ދަންނަވަން. މި ފަރާތްތަކުގެ ޓްރެވަލް ޑޮކިއުމަންޓް ލިބުނުހާ އަވަހަކަށް ފުރުވާލުމަށް ވަނީ ހަމަޖެހިފަ. އިމިގްރޭޝަން ޤާނޫނާއި ޚިލާފަށް ދިވެހިރާއްޖޭގައި އުޅުމަށް އެއްވެސް ފަރާތަކަށް ފުރުސަތެއް ނުދެވޭނެ". އިމިގްރޭޝަން ކޮންޓްރޯލަރ މުހައްމަދު ޝަމްއާން ވަހީދު އިއްޔެ ވިދާޅުވެފައިވެއެވެ.

ސަރުކާރުގެ މި ނިންމުމާއި ގުޅިގެން ގިނަ ބަޔަކު އަންނަނީ ކަންބޮޑުވުން ފާޅުކޮށް އާއިލާގެ ހައްގުގައި އަޑު އުފުލަމުންނެވެ.

އެގޮތުން، މީހަކު ފޭސްބުކުގައި ކުރި ޕޯސްޓެއްގައި ބުނީ، ފްރާންސްގެ ޢާއިލާ، އަނބުރާ ފްރާންސަށް ފުރުވާލުމަކީ، އަނިޔާގެ ތެރެއަށް އެމީހުން ދޫކޮށްލުން ކަމަށާ އެކަން އެގޮތަށް ކޮށްގެން ނުވާނެ ކަމަށެވެ.

”ޒިންމާ ވާނެ ފަރާތެއް ބޭނުންވާނަމަ، ރައްޔިތުން މިތިބީ، އެ ޢާއިލާގެ ޒިންމާ ނެގުމަށް ތައްޔާރަށެވެ. އަނބުރާ ފޮނުވާ ނުލާށެވެ. މިކަމުގައި ސަރުކާރުގެ އިހުމާލުވެސް އެބަ އޮތެވެ. ވީމާ އެ ޢާއިލާއަށް، އަދި އެއް ފުރުޞަތު ދިނުމަކީ، އިސްލާމީ އަޚުވަންތަ ކަމުގެ ގޮތުން ބެލިޔަސް، ސަރުކާރުން ކުރަންޖެހޭ ކަމެކެވެ.“ އެމީހާ ބުންޏެވެ.

މީގެ އިތުރުން، ފްރާންސްގެ ޢާއިލާއަށް އެ ޤައުމުގައި އިސްލާމްދީނަށް އުުޅުމަށް ހުރަސް އެޅޭނެކަން އެނގޭއިރު އެމީހުން ފޮނުވާލުމަކީ ދީނަށް ވެވޭ ބޮޑު ޚިޔާނާތެއްކަމަށް ގިނަ ބަޔަކު ބުނެފައުލިވެއެވެ. އެގޮތުން، ފްރާންސްގެ މީހަކާއި އެމީހާގެ ޢާއިލާ އަލަށް އިސްލާމް ވެއްޖެ ނަމަ އެކި ގޮތްގޮތުން އެމީހަކާއި އެމީހެއްގެ ޢާއިލާއަށް އުނދަގޫ ކުރާ ކަމަށާ، ކޮންމެވެސް ހަރުކަށި ޖަމާޢަތަކާ ގުޅުން އޮތް ކަމަށް ހަދައި މުއްދަތެއް ނެތް ގޮތަށް ތަހުގީގު ނިމޭން ދެނޭ ކިޔައިފައި ޖަލަށް ވެސް ލާކަން ފާހަގަކޮށްފައިވެއެވެ.

މި މައްސަލާގައި ދީނީ ޢިލްމުވެރިންވެސް އަންނަނީ ވަރަށް ބޮޑަށް ކަންބޮޑުވުން ފާޅުކުރައްވަމުންނެވެ. އެގޮތުން، ޝެއިޚް އާދަމް ނިޝާން ކުރެއްވި ޕޯސްޓެއްގައި ވިދާޅުވީ، އިސްލާމްދީން ޤަބޫލުކޮށްގެން އަންނަ މުސްލިމުން، ކާފަރުންނާ ޙަވާލުކުރުމަކީ ކަނޑައެޅިގެން ނަހީ ކުރައްވާފައިވާ "ޙަރާމް ކަމެއްކަން" އެއްވެސް ޝައްކެއް ނެތި ކީރިތި ޤުރްއާނުގެ ނައްޞުންނާއި، ޞައްޙަ ޙަދީޘުން އެނގި ކަށަވަރުވެއެވެ. އަދި اللهގެ ވަޙީ ބަސްފުޅާއި، ކީރިތި ނަބިއްޔާގެ ޞައްޙަ ޙަދީޘް ބަސްފުޅުގެ މައްޗަށް އިސްކުރެވޭނެ އެއްވެސް ޤާނޫނެއް ނޯންނާނެ ކަމަށް ވިދާޅު ގުރުޢާނާ ސުންނަތުނަ އެކަމުގެ ދަލީލު ވަނީ ދައްކަވާފައެވެ.

الله ތަޢާލާ ވަޙީ ކުރައްވާފައިވެއެވެ:

{یَـٰۤأَیُّهَا ٱلَّذِینَ ءَامَنُوۤا۟ إِذَا جَاۤءَكُمُ ٱلۡمُؤۡمِنَـٰتُ مُهَـٰجِرَ ٰ⁠تࣲ فَٱمۡتَحِنُوهُنَّۖ ٱللَّهُ أَعۡلَمُ بِإِیمَـٰنِهِنَّۖ فَإِنۡ عَلِمۡتُمُوهُنَّ مُؤۡمِنَـٰتࣲ فَلَا تَرۡجِعُوهُنَّ إِلَى ٱلۡكُفَّارِۖ } [سُورَةُ المُمۡتَحنَةِ: ١٠]

"އޭ އީމާންވެއްޖެ މީސްތަކުންނޭވެ! ތިޔަބައިމީހުންގެ ގާތަށް މުއުމިނު އަންހެނުން ހިޖުރަކޮށްފައި އަންނަހިނދު، ތިޔަބައިމީހުން އެކަނބަލުން އިމްތިޙާން ކުރާށެވެ! އެކަނބަލުންގެ އީމާންކަން، الله މޮޅަށް ދެނެވޮޑިގެންވެއެވެ. އެކަނބަލުންނީ، ޙަޤީޤަތުގައި މުއުމިނުންކަން ތިޔަބައިމީހުންނަށް އެނގިއްޖެނަމަ، ކާފިރުންގެ ގާތަށް ތިޔަބައިމީހުން އެކަނބަލުން އަނބުރައި ފޮނުވައިނުލާށެވެ!"

އަދި ކީރިތި ނަބިއްޔާ ﷺ ޙަދީޘް ކުރައްވާފައިވަނީ:

"المسلمُ أخو المسلمِ لا يظلِمُه ولا يُسلِمُه" رواه البخاري ومسلم (متفق عليه)

"އެއް މުސްލިމަކީ އަނެއް މުސްލިމެއްގެ އަޚެކެވެ. އޭނާ އަނެއް މުސްލިމް އަޚާއަށް އަނިޔާވެރި ނުވާނެއެވެ. އަދި އަނެއް މުސްލިމް އަޚާ ކާފަރުންނާ ޙަވާލުވެސް ނުކުރާނެއެވެ."

އަދިވެސް އެހެން އިލްމުވެރިން މިކަމާ ދެކޮޅު ހައްދަވާއިރު، ފްރާންސް އަކީ އާއްމު ތަންތަނާއި ސުކޫލުތަކުގައި، މޫނު ބުރުގާ އާއި ބުރުގަލުގެ އިތުރުން، އަބާޔާ ލުންވެސް މަނާ ގައުމެއްކަން ފާހަގަކޮށްލަންޖެހެއެވެ.