ބަޔަކު ރުއްސަން ރިޕޯޓެއް ނެރުން އިރު ގިޔާމަތް ދުވަހުން ދޭނެ ޖަވާބަކާ މެދު ވިސްނާލިންތޯ: ޑރ. އިޔާޒު

ބަޔަކު ރުއްސަން ފާޑެއްގެ ރިޕޯޓެއް ނެރުނު އިރު ގިޔާމަތް ދުވަހުން ﷲ ގެ ހަޒުރަތުގައި ދޭނެ ޖަވާބަކާއި މެދު ވިސްނާލިންތޯ އައްޝައިހު ޑރ. މުހައްމަދު އިޔާޒު އަބްދުއްލަތީފު ސުވާލު އުފައްދަވައިފިއެވެ.

އިޔާޒު މިފަދައިން ވިދާޅުވެފައި މިވަނީ އަނިޔާވެރި ގޮތަކަށް މަރާލާފައިވާ ޑރ. އަފްރާޝީމް އަލީގެ މަރުގެ ރިޕޯޓު، ރިޔާސީ ކޮމިޝަނުން ތަހުގީގުކުރުމަށްފަހު، ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހުގެ ރައީސަށް އަރުވާފައި ވަނިކޮށެވެ. ލީކުވެފައިވާ އެ ރިޕޯޓުގައިވާ ގޮތުން ޑރ. އަފްރާޝީމް އަވަހާރަކޮށްލާފައިވަނީ ރާއްޖޭގައި ހަރަކާތްތެރިވާ ހައްދު ފަހަނައެޅި ދީނީ ޖަމާއަތަކުންނެވެ.

މަރުތައް ތަހުގީގުކުރާ ކޮމިޝަނުން އަފްރާޝީމުގެ މަރު ތަހުގީގު ކުރުމަށްފަހު މިދިޔަ ހަފުތާގެ ބުރާސްފަތި ދުވަހު ރައީސް އަށް ރިޕޯޓު ފޮނުވުމުން، އެމަނިކުފާނު ވަނީ އެރިޕޯޓު ކަމާގުޅޭ މުއައްސަސާތަކަށް ފޮނުއްވައިފައެވެ.

އިޔާޒު މިރޭ ކުރެއްވި ޓުވީޓެއްގައި ވަނީ، ދައުލަތުގެ ބައިތުލްމާލުން ބޮޑު މުސާރަދީފައި، ތިމާއާއި ބޮޑު މަސައްކަތެއް ހަވާލުކުރުމުން، ހަވާނަފުސަށް ހެއްލި، ބަޔަކު ރުއްސުމަށް ފާޑެއްގެ ރިޕޯޓެއް ނެރުނީމައި މާދަމާ (ގިޔާމަތް ދުވަހު) ﷲ ގެ ހަޒުރަތުގައި ދޭނެ ޖަވާބަކީ ކޮބައިކަމާ މެދު އެންމެ ފަހަރަކުވެސް ވިސްނެވިންތޯ ސުވާލު ކުރައްވައިފައެވެ.

އިޔާޒު ކުރެއްވި އިތުރު ޓުވީޓެއްގައި ވިދާޅުވީ މިއަދުގެ ހާލަތަކީ ވެރިން ނުބައިކަންތައް ކުރީމައި، އެކަމުގެ ޒިންމާ ކަމާ ނުގުޅޭ ބައެއްގެ ބޮލުގައި އަޅުވާފައި ވެރިން އެކަމުން ރެކިގެން ތިބުން ކަމަށެވެ.

ނަމަވެސް އަބަދު އެގޮތަށް ނޫޅެވޭނެ ކަމަށާއި އެފަދަ ވެރިން ހަނދާނުގައި ބަހައްޓަންވާނެ ކަމަށް އިޔާޒު ވިދާޅުވިއެވެ.

2012 ވަނަ އަހަރު އޮކްޓޯބަރު މަހުގެ އެއްވަނަ ދުވަހުގެރޭ އަވަހާރަކޮށްލި، ޑރ. އަފްރާޝީމްގެ މަރުގެ މައްސަލަ ކުރީގެ ރައީސް ޑރ. މުހައްމަދު ވަހީދުގެ ސަރުކާރުން ތަހުގީގު ކުރިއެވެ. އަދި ރައީސް ޔާމީނުގެ ސަރުކާރުގައިވެސް އެމައްސަލަ ތަހުގީގު ކުރިއެވެ. އެމައްސަލައިގައި ބަޔަކު މީހުންގެ މައްޗަށް ދައުވާވެސް ކުރިއެވެ. ނަމަވެސް ކުށް ސާބިތުވާ ވަރަށް ހެކި ނެތުމުން އެ މީހުން ވަނީ ދޫވެފައެވެ. އެމައްސަލައިގައި ކުށް ސާބިތުވީ ހ. ލޮބީ ހުސެއިން ހުމާމް އަހުމަދުގެ މައްޗަށެވެ. ހުމަމު އަދިވެސް ހުރީ ޖަލު ބަންދުގައެވެ.

އެނގިފައިވާ ގޮތުގައި މަރު ކޮމިޝަންގެ ރިޕޯޓުގައި އަފްރާޝީމު އަވަހާރަކޮށްލުމުގައި ބައިވެރިވެފައިވަނީ، އެމަރާ ގުޅިގެން ކުށް ސާބިތުވެފައިވާ ހ. ލޮބީ ހުސެއިން ހުމާމް އަހުމަދާއި އެދައުވާގައި ކުށް ސާބިތު ނުވާ ކަމަށް ކަނޑައަޅާފައިވާ ހ. ހިކޯސްޓް އަލީ ޝާން (ސަޓޯ) އެވެ.