ސިއްހީ ޓެސްޓްތައް ހެދުމަށްފަހު ރައީސް ޔާމީން ޖަލަށް ގެންގޮސްފި

މަނީލޯންޑަރިންގެ ކުށް ސާބިތުވެ، ފަސް އަހަރަށް ޖަލަށްލުމަށް ހުކުމް ކޮށްފައިވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމް އަނބުރާ ޖަލަށް ގެންގޮސްފިއެވެ.

އިތުބާރުހުރި ފަރާތަކުން ''ވޮއިސް'' އަށް މައުލޫމާތުދެމުން ވިދާޅުވީ، ރައީސް ޔާމީން އަނބުރާ ޖަލަށް ގެއްދިޔައީ މިއަދު ހެނދުނު އެމަނިކުފާނުގެ މެޑިކަލް ޓެސްޓްތަކެއް ހެދުމަށްފަހު، މެންދުރުކުރީގެ ވަގުތެއްގައި ކަމަށެވެ.

ކޯޓުން ކުރި ހުކުމާއެކު އެމަނިކުފާނު އެންމެ ފުރަތަމަ ގެންދިޔައީ މާލޭ ޖަލަށެވެ. ނަމަވެސް މިއަދު ޑޮކްޓަރަށް ދައްކައި ޓެސްޓްތައް ހެދުމަށްފަހު، ދެން ގެންދިޔައީ ކޮން ޖަލަކަށް ކަމެއް އޭނާ ހާމައެއް ނުކުރައްވައެވެ.

ރައީސް ޔާމީން ހެދި މެޑިކަލް ޓެސްޓްތަކަކީ، ޖަލަށް ގެންދާ ކޮންމެ މީހަކާ މެދު ވެސް އަމަލުކުރާ އުސޫލުން ހެދި ޓެސްޓްތަކެކެވެ.

ޔާމީންގެ މައްޗަށް މަނީ ލޯންޑްރިންގެ ދައުވާ ކުރީ އެމްއެމްޕީއާރުސީގެ ޚިޔާނާތުގެ ފައިސާ ވަން އެސްއޯއެފްގެ އެކައުންޓަކުން އެމަނިކުފާނަށް އެއް މިލިއަން ޑޮލަރު ޖަމާކުރި މައްސަލައިގަ އެވެ. އެ ފައިސާ އެންޓި ކޮރަޕްޝަން ކޮމިޝަން (އޭސީސީ) އާ އެކު ހެދި އެސްކްރޯ އެކައުންޓެއްގައި ބެހެއްޓުމަށް އެމަނިކުފާނު އެއްބަސްވެ ވަޑައިގަތުމަށް ފަހު އެހެން ފައިސާތަކެއް އެސްކްރޯ އެކައުންޓަށް ޖަމާކޮށް އަދި އެސްއޯއެފް އިން ޖަމާކުރި ފައިސާ އިސްލާމިކް ބޭންކްގެ ޖެނެރަލް އިންވެސްޓްމަންޓް އެކައުންޓަކަށް ބަދަލުކޮށް، އޭގެ އަސްލު އޮޅުވާލި ކަމަށް ދައުވާގައިވެ އެވެ.

އެމައްސަލައިގައި އެމަނިކުފާނުގެ މައްޗަށް ފަސް އަހަރަށް ޖަލަށްލުމަށް ހުކުމްކޮށް، ފަސް މިލިއަން ޑޮލަރު ދެއްކުމަށް ކުރިމިނަލް ކޯޓުގެ ހުކުމުގައި ވެއެވެ.