ޑްރަގް އެޑިކްޓުންގެ އައްޑާއަކަށް ބަދަލުވެފައިވާ މ. ރަބީއުވިލާ ތަޅާލަން ފަށައިފި

މާލޭގައި ފަޅަށް ހުންނަ ގެއެއް ކަމަށްވާ އަދި ފަހުން މަސްތުވާތަކެތި ބޭނުންކުރާ މީހުންގެ އައްޑާއަކަށް ބަދަލުވެފައިވާ މ. ރަބީއުވިލާ ތަޅާލުމުގެ މަސައްކަތް ސަރުކާރުން މިއަދު ފަށައިފިއެވެ.

ސަރުކާރުގެ އިސް އޮފިޝަލަކު ވިދާޅުވި ގޮތުގައި، މި މަސައްކަތް ފެށީ ސީދާ ރައީސް ޑރ. މުހައްމަދު މުއިއްޒުގެ ހާއްސަ އިސްނެގުމަކަށް، އެ މަނިކުފާނުގެ އެންގެވުމުގެ މަތިންނެވެ. މި މަސައްކަތް ކުރަނީ ޕަބްލިކް ވަރކްސްއިންނެވެ.

ފަސް ފަންގިފިލާގެ މި ގެއަކީ ވަރަށް ގިނަ ދުވަސްވީ ބާ އިމާރާތެކެވެ. މި ގެ ހުރީ މީހުން ދިރިއުޅެން ހެޔޮނުވާވަރަށް ބައުވެފައެވެ. އެގޮތަށް ހުއްޓައި މިއަހަރުގެ އޭޕްރީލް މަހު މި ގޭގެ ހަތަރުވަނަ ފަންގިފިލާގައި އަލިފާން ރޯވެ، އިތުރަށް ގެއްލުން ލިބުނެވެ.

މެއި މަހު ވަނީ މަރުވެފައި އޮތް މީހެއްގެ ހަށިގަނޑު ވެސް މި ގެއިން ފެނިފައެވެ. އެ މީހާ މަރުވީ ޑްރަގް އޯވަޑޯސްވެގެން ކަމަށް ބެލެވެއެވެ.

މާލޭގައި ފަޅަށް ހުންނަ ބާ އިމާރާތްތަކުގައި މަސްތުވާތަކެތި ބޭނުންކުރާ މީހުން އުޅޭ މައްސަލަ ވަރަށް ބޮޑުވެފައިވާ ކަމަށް ފާހަގަކުރެވެއެވެ. މިފަދަ ގެތަކުގައި އަލިފާނުގެ ހާދިސާތައް އެކި ފަހަރު މަތިން ހިނގާފައިވެއެވެ.

ރައީސް މުއިއްޒު ވަނީ މިދިޔަ ހަފުތާގައި މާލޭ ސިޓީ ކައުންސިލާ ބައްދަލުކުރައްވައި، މާލޭގައި މިގޮތަށް ފަޅަށް ދޫކޮށްލައިފައި ހުރި ބާ އިމާރާތްތައް އަވަހަށް ތަޅާލުމަށް ބޭނުންވާ އެއްބާރުލުން ސަރުކާރުގެ ފަރާތުން ލިބޭނެ ކަމުގެ ޔަގީންކަން ދެއްވާފައެވެ.

ރަބީއުވިލާ ތަޅާލުމުގެ ކަންކަން ކުރިއަށްގެންދިއުމަށް ރައީސް ނިންމެވުމުގެ މައިގަނޑު ސަބަބަކީ އެ ގެ ހުރި ހާލަތުން އެ ސަރަހައްދުގައި އުޅޭ މީހުންނާއި އެ ގެ ހުންނަ ތަނުން ދަތުރުފަތުރުކޮށް އުޅޭ މީހުންގެ ރައްކާތެރިކަން ކަށަވަރުކުރުމަށެވެ. ސަރުކާރުން އެ ގެ ތަޅާލުމުގެ ކަންކަން ކުރިއަށްގެންދިއުމަށް ނިންމީ، އެ ގޭގެ ވެރިފަރާތުގެ އެދުމުގެވެސް މަތިންނެވެ. އެ ގެ ތަޅާލެވޭހާ ތަނަވަސްކަން ގޭގެ ވެރިފަރާތުގެ ނެތުމުން ރައީސްގެ އަރިހުން އެކަމަށް އެދިފާކަންވެސް ފާހަގަކޮށްލެވެއެވެ.