ހުޅުމާލޭގައި އަޅާ މަސް ބަންދުކުރާ ފެސިލިޓީއަށް ލޯން ހަމަޖެހި އިދާރީ މަސައްކަތް ދަނީ ކުރިއަށް: މިފްކޯ

އައިއެސްޑީބީގެ ލޯނުގެ ދަށުން ކަނޑުއޮތްގިރީގައި ހެދުމަށް ހަމަޖެހިފައިވާ މަސް ޕްރޮސެސްކުރާ ފެސިލިޓީ ހުޅުމާލޭގައި ހެދުމަށް ހަމަޖެހި، އޭގެ މަސައްކަތް ފެށުމަށް ކުރަންޖެހޭ އިދާރީ މަސައްކަތްތައް ކުރިއަށްދާ ކަމަށް ސަރުކާރުގެ މަސް ކުންފުނި މިފްކޯ އިން ބުނެފިއެވެ.

އިސްލާމިކް ޑިވެލޮޕްމަންޓް ބޭންކު (އައިއެސްޑީބީ) އާއި ދިވެހި ސަރުކާރާއި ގުޅިގެން މިފްކޯގެ ކެޕޭސިޓީ އިތުރުކުރުމަށްޓަކައި ހަމަޖެހިފައިވާ 65 މިލިއަން ޑޮލަރުގެ ލޯނުގެ ދަށުން ކަނޑުއޮތްގިރީގައި ހެދުމަށް ނިންމާފައި އޮތީ 35 ޓަނުގެ މަސް ޕްރޮސެސްކުރާ ޔުނިޓެކެވެ.

މި މަޝްރޫއުގެ މުއާމަލާތްތައް ފެށިގެން އައިއިރު، މި ދެންނެވުނު ފެސިލިޓީ ކަނޑުއޮތްގިރީގައި ހެދުމަށް ހަމަޖެހިފައިވީނަމަވެސް، ކެބިނެޓްގެ ނިންމެވުމަކާއެކު މިފްކޯއިން ނިންމީ ހުޅުމާލެއިން ބިމެއް ލިބޭގޮތަށް ކަނޑުއޮތްގިރި ދޫކޮށްލާށެވެ. އަދި ކެބިނެޓްގެ ނިންމެވުމާ އެއްގޮތަށް، ފިޝަރީޒް މިނިސްޓްރީގެ އެހީއާއެކު، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ވަނީ މިފްކޯއަށް މި ފެސިލިޓީ ގާއިމްކުރަން ބިމެއް ހަމަޖައްސާފައި ކަމަށް މިފްކޯއިން ބުނެފައިވެއެވެ.

އެހެންކަމުން މި މަޝްރޫއުތަކުގެ ތެރޭގައި ހިމެނޭ، ކަނޑުއޮތްގިރީގައި "ކުރެހި" މަސް ޕްރޮސެސް ޔުނިޓުގެ މަސައްކަތް ދެން ކުރިއަށް ގެންދާނީ ލޮޖިސްޓިކުގެ ފަސޭހަކަމާއެކު އެކްސްޕޯޓް ކުރެވޭ ސަރަހައްދެއް ކަމުގައިވާ ހުޅުމާލޭގައި ކަމަށްވެސް ބުނެފައިވެއެވެ.

މިއާއެކު މިފްކޯއިން ބުނީ މަސްބަންދުކުރާތަން އެޅުމަށް ލޯނު ހަމަޖެހިފައިވާ ކަމަށާއި މަސައްކަތް ފެށުމަށްޓަކައި ކުރަންޖެހޭ އިދާރީ މަސައްކަތްތައް މިހާރު ކުރަމުންދާ ކަމަށެވެ. އަދި އުންމީދަކީ ފެސިލިޓީން ފަސޭހަކަމާއެކު މަސް ޕްރޮސެސް ކުރުމުގެ ހިދުމަތް ފޯރުކޮށްދިނުންކަމަށްވެސް މިފްކޯއިން ބުންޏެވެ.