އިމްރާން މަޖިލީހުގައި އިތުރުފުޅު ހެއްދެވުމުން އިތުބާރު ނެތްކަމުގެ ވޯޓެއް ނަގަންޖެހޭ: ހުސައިން މުހައްމަދު

ހ. ހާޖަރާގެ އަބްދުﷲ ލުތުފީ ރާއްޖެ ގެނައުމާއި ގުޅޭ ގޮތުން ރައްޔިތުންގެ މަޖިލީހުގައި ހޯމް މިނިސްޓަރު އިމްރާން އަބްދުﷲ އިތުރުފުޅު ހެއްދެވި ކަމަށް ވިދާޅުވެ، އިމްރާންގެ އިތުބާރު ނެތް ކަމުގެ ވޯޓެއް ނަގަންޖެހޭ ކަމަށް ފަރެސް މާތޮޑާ ދާއިރާގެ މެންބަރު ހުސައިން މުހައްމަދު ލަތީފު ވިދާޅުވެއްޖެއެވެ.

މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން ހުސައިން ވިދާޅުވީ ލުތުފީ މާލެ ގެނައުމަށް ކުރީގެ ސަރުކާރުން ގިނަ މަސައްކަތްތަކެއްކޮށް، އޭނާ މާލެ ގެނައުމަށް ހުރިހާ ކަމެއް ނިމިފައިވަނިކޮށް، އޭރުގެ ހޯމް މިނިސްޓަރު އުމަރު ނަސީރު އެކަމަށް ހުއްދަ ނުދެއްވުމުން ނުގެނެވުނު ކަމަށް އިމްރާން ވިދާޅުވެ އިމްރާން އިތުރުފުޅު ހެއްދެވިކަން މިހާރު ސާބިތުވެފައިވާކަމަށެވެ. އެހެންކަމުން މިއީ އިތުބާރު ނެތްކަމުގެ ވޯޓެއް ނަގަންޖެހޭ ސަބަބެއް ކަމަށް ހުސައިން ވިދާޅުވިއެވެ.

ލުތުފީ މާލެ ނުގެނެވިގެން އުޅޭ މައްސަލައިގައި ޖަވާބުދާރީ ކުރުވުމަށް އިއްޔެ އޮތް ރައްޔިތުންގެ މަޖިލީހުގެ ޖަލްސާއަށް އިމްރާން ވަނީ ހާޒިރުކުރައްވައި ޖަވާބުދާރ ކުރުވާފައެވެ.

އިމްރާން ވިދާޅުވެފައިވަނީ ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް ލުތުފީ ގެންނަން ގިނަ މަސައްކަތްތައް ކުރެވި، ގާތްގަނޑަކަށް ނިމުމަކާ ހަމައަކަށް އާދެވުނު ނަމަވެސް އެއިރު ލުތުފީ އަނބުރާ ނުގެނެވުނީ އޭނާ އަނބުރާ ރާއްޖެ ގެނައުމަކީ މުހިއްމު ކަމެއް ނޫން ކަމަށް ވިދާޅުވެ އެއިރުގެ ހޯމް މިނިސްޓަރު އުމަރު ނަސީރު އެ ކަމުގެ ހުއްދަ ނުދެއްވުމުން ކަމަށެވެ.

އިމްރާންގެ އެވާހަކައަކީ ކަނޑައެޅިގެން ހެއްދެވި އިތުރުފުޅެއް ކަމަށް ކުރީގެ ޕޮލިސް ކޮމިޝަނާ އަދި މަޖިލީހުގެ ތިމަރަފުށީ ދާއިރާގެ މެންބަރު، އަބްދުﷲ ރިޔާޒްވެސް ވަނީ ވިދާޅުވެފައެވެ. ރިޔާޒު ވިދާޅުވީ ފިލައިގެން އުޅޭ މީހަކު ހޯދުމަށް ހޯމް މިނިސްޓަރުގެ ހުއްދަ ފުލުހުން ހޯދާކަށް ނުޖެހޭނެ ކަމަށާއި ގާނޫނުގައިވާ ގޮތަށް ކަން ކުރުމަކީ ފުލުހުންގެ މައްޗަށް ލާޒިމުކަމެއް ކަމަށެވެ.

އަދި ކުރީގެ ޕޮލިސް ކޮމިޝަނާ ހުސެއިން ވަހީދު ފޭސްބުކްގައި ކުރެއްވި ޕޯސްޓެއްގައި ވިދާޅުވީ، މިނިސްޓަރު އިމްރާންގެ ވާހަކައަކީ އަމިއްލަ ހިޔާލީ ވާހަކައެއް ކަމަށެވެ. އަދި އުމަރު މިނިސްޓަރު ކަމުގައި އެފަދަ ވާހަކައެއް ދައްކާފައިނުވާ ކަމަށާއި ލުތުފީ ހޯދަން ރައީސް އަބުދުﷲ ޔާމީނާއި އުމަރު ނަސީރު މަސައްކަތް ކުރެއްވި ކަމަށް ހުސައިން ވަހީދު ވިދާޅުވިއެވެ.

ހުސައިން ވަހީދަށް ފަހު ޕޮލިސް ކޮމިޝަނަރުކަން ކުރެއްވި އަހުމަދު އަރީފް ވަނީ އިމްރާން މަޖިލީހުގައި ދެއްކެވި ވާހަކަތައް ދޮގު ކުރައްވާފައެވެ. އުމަރު ކުރެއްވި މަސައްކަތް ގާތުން ދުށް އެކަމުގައި ބައިވެރިވި ބޭފުޅެއްގެ ހައިސިއްޔަތުން އަރީފް ވިދާޅުވީއި އިމްރާން ހެއްދެވީ ކަނޑައެޅިގެން އިތުރުފުޅެއް ކަމަށާއި ލުތުފީ ގެންނަން އުމަރު ގިނަ މަސައްކަތްތަކެއް ކުރެއްވި ކަމަށެވެ.

ބޭސްފަރުވާއަށް ކަމަށް ބުނެ ލުތުފީ ޖަލުން ފޮނުވާލީ ކުރީގެ ރައީސް މުހައްމަދު ނަޝީދުގެ ސަރުކާރުގައި 2010 ވަނަ އަހަރުގެ ޖެނުއަރީ 16 ގައެވެ. އޭގެ ފަހުން އޭނާ އުޅުނީ ލަންކާގައި ފިލައިގެންނެވެ.

ލުތުފީ މިރޭ 9:30 ގައި މާލެ ގެންނާނެ ކަމަށް މިރޭ ފުލުހުން ބުނެފައިވެއެވެ.