ހިޔާ 15 ވަނަ ޓަވަރުގެ އެޕާޓްމަންޓަކުން ދުންއަރާތީ, އެމްއެންޑީއެފުން ހަރަކާތްތެރިވެއްޖެ

ހިޔާ 15 ވަނަ ޓަވަރުގެ އެޕާޓްމަންޓަކުން ދުންއަރާކަމަށް ބަޔަކު ރިޕޯޓްކުރުމާއި ގުޅިގެން އެމްއެންޑީއެފްގެ ފަޔަރ އެންޑް ރެސްކިއުޓީމުން ހަރަކާތްތެރިވެއްޖެއެވެ.

ހިޔާ ޓަވަރު 15 ގައި އުޅޭމީހަކު ވޮއިސްއާ މައުލޫމާތު ހިއްސާކުރަމުން ބުނީ، ދުން އެރީ 12 ވަނަ ފަންގިފިލާގައި ހުރި އެޕާޓްމަންޓަކުންކަމަށެވެ. އެއީ ހޫނުކުރަން އުދާފައިހުރި ގަރުދިޔަ ތެއްޔެއް މާ ގިނައިރުވުމުންނެވެ. ނަމަވެސް ނުރައްކާތެރި ހާދިސާއެއް ހިނގުމުގެ ކުރިން އުނދުން ނިއްވާލާފައިވާކަމަށް އޭނާ ބުންޏެވެ. ނަމަވެސް އުނދުން ނިއްވާލީ އެމްއެންޑީއެފް މީހުންކަމެއް ނުވަތަ އެގޭ މީހުން ގެއަށް އައިސްކަމެއް އަދި ސާފެއް ނުވެއެވެ.

ގަރުދިޔަތެލި ހޫނުކުރަން އުދާފައި އޭނާ ދިޔައީ ތިރިއަށް. ކޮންމެވެސް ކުއްޖަކު ހަވާއަރުވާތަނަށް ގެންދަން މީހަކާ ހަވާލުކުރަންކަމަށް ވަނީ. އޭނާ ބުނާގޮތުންނަމަ ހުޅުގަނޑުވެސް ކުޑަކޮށްފައި ދިޔައީ. ނަމަވެސް ގަރުދިޔަ އެތި ކެކިގެންގޮސް އަވަދިވެފައި ހުރީ. އެހާބޮޑަށް ކެކިގެންގޮސް އަނެއްއަތަށް އެޅީމަ ދުމާއެއްޗެހި ބޭރުއެވީ. އަލިފާން ރޯނުވިކަން ނަސީބެއް މުޅި ފްލެޓްތެރޭގައި ހުރީ ވަސް ހިފާފައި

ވޮއިސްއާ މައުލޫމާތު ހިއްސާކުރި މީހާ ބުންޏެވެ.

އުނދުން މައްޗަށް އެއްޗެހި ހޫނުކުރަން އުދާފައި ގެއިން ބޭރަށްދިއުމުން މީގެ ކުރިންވެސް ހިޔާ ފްލެޓްގައި ނުރައްކާތެރި ހާދިސާތައް ހިނގާފައި އެބަހުއްޓެވެ. މީގެކުރިން ހިނގި މިފަދަ އެކި ހާދިސާތަކުގައި ބަދިގޭ ކަބަޑްސެޓާއި އެޕާޓްމަންޓަށްވެސް ބޮޑެތި ގެއްލުންތައް ލިބިފައި އެބަހުއްޓެވެ.

އެގޮތުން މިއަހަރުގެ ޖުލައިމަހުގެ 3 ވަނަ ދުވަހުވެސް މިފަދަ ހާދިސާއެއް ޓަވަރު 15 ގެ 10 ވަނަ ފަންގިފިލާގެ އެޕާޓްމަންޓެއްގައި ވަނީ ހިނގާފައެވެ. އެފަހަރުގެ އެ ހާދިސާ ހިނގަން ދިމާވީ، ގަރުދިޔަތެލި ކައްކަން އުދާފައި ގޭމީހުން ބޭރަށް ދިއުމުންނެވެ. އެފަހަރު އެމްއެންޑިއެފްގެ ފަޔަރ ޓީމުން އައިސް އެ އެޕާޓްމަންޓް ދޮރު ވައްޓާލައިގެން ވަންނަން ތައްޔާރުވެސް ވިއެވެ. ނަމަވެސް ދޮރު ހަލާކުކޮށްލަން ތައްޔަރުވިތަނުން އެގޭ މީހުން އައިސް ދޮރު ހުޅުވައި އެންމެފަހުން އުނދުން ނިއްވާލީއެވެ.

އޭގެ ފަހުން ހިޔާ ޓަވަރު 14 ގެ އެޕާޓްމަންޓެއްގައިވެސް ވަނީ އެފަދަ ހާދިސާއެއް ހިނގާފައެވެ. އެ ހާދިސާގައި ބަދިގޭ އުނދުން ބަހައްޓާ އަށީގައި ޖަހާފައިހުރި ތަށިމުށިތައްވެސް ހުރީ ފަޅައިގެންގޮސްފައެވެ. ހިޔާގައި މިހާތަނަށް ހިނގި އެންމެ ނުރައްކާތެރި އެއް އަލިފާނުގެ ހާދިސާއަކީ މިއަހަރުގެ އޭޕްރިލްމަހުގެ 22 ވަނަ ދުވަހު ހިޔާ ޓަވަރު 11 ގެ ފަންގިފިލާއެއްގެ އެޕާޓްމަންޓެއްގައި ހިނގި ހާދިސާއެވެ. އެ ހާދިސާގައި  އެ އެޕާޓްމަންޓްގެ އެއް ކޮޓަރި ވަނީ ބޭނުން ނުކުރެވޭވަރަށް އަނދާފައެވެ.

އެ ހާދިސާގައި ޑިޒާސްޓާއިން ވަނީ އެ އެޕާޓްމަންޓުގައި އުޅުނު 7 މީހަކަށް ވަގުތީ ގޮތުން ބޯހިޔާވަހިކަންވެސް ފޯރުކޮށްދީފައެވެ. ހިޔާ ޓަވަރުތަކަކީ ބޯހިޔާވަހިކަން ފޯރުކޮށްދިނުމަށް ރާއްޖޭގައި އެންމެ އުސްކޮށް ހަދާފައިވާ އިމާރާތްތަކެވެ.