އައު ދިރާސީ އަހަރު ދަރިވަރުން ސުކޫލަށް ވެއްދޭ އުމުރުފުރާ އިއުލާން ކޮށްފި!
ލިޔުންތެރިޔާ
ޚަދީޖާ އަރުފާ
2024 ވަނަ އަހަރުގެ އައު ދިރާސީ އަހަރުގައި ދަރިވަރުން ސުކޫލަށް ވެއްދޭނެ، އަދި އެއް ސުކޫލުން އަނެއް ސުކޫލަށް ބަދަލު ކުރެވޭނެ އުމުރުފުރާތައް އިއުލާން ކޮށްފިއެވެ.
ތަޢުލީމީ ވުޒާރާއިން އިއްޔެ ސުކޫލުތަކަށް ފޮނުއްވި ސާކިޔުލާގައި ވާގޮތުން، 26 މެއި 2024 ގައި ފެށުމަށް ހަމަޖެހިފައިވާ އައު ދިރާސީ އަހަރުގައި ދަރިވަރުން ސުކޫލަށް ވައްދައި، އެއް ސުކޫލުން އަނެއް ސުކޫލަށް ބަދަލު ކުރެވޭނީ އަންނަނިވި އުސޫލުގެ މަތީން ނެވެ.
• ބޭބީ ނާސަރީ-- 31 ޑިސެމްބަރު 2023 އަށް 2 އަހަރު ފުރި 3 އަހަރު ނުފުރުން
• ނާސަރީ-- 31 ޑިސެމްބަރު 2023 އަށް 3 އަހަރު ފުރި 4 އަހަރު ނުފުރުން
• އެލްކޭޖީ-- 31 ޑިސެމްބަރު 2023 އަށް 4 އަހަރު ފުރި 5 އަހަރު ނުފުރުން
• ޔޫކެޖީ-- 31 ޑިސެމްބަރު 2023 އަށް 5 އަހަރު ފުރި 6 އަހަރު ނުފުރުން. މިހެން އިން ނަމަވެސް 2023-2024 ގެ ދިރާސީ އަހަރުގައި އެލްކޭޖީ ފުރިހަމަ ކުރި ދަރިވަރުން ޔޫކޭޖީއަށް ބަދަލު ކުރެވޭނެ ކަމަށްވެސް މިނިސްޓްރީން ބުނެފައިވެއެވެ.
• ގްރޭޑް 1 -- 31 ޑިސެމްބަރު 2023 އަށް 6 އަހަރު ފުރި 7 އަހަރު ނުފުރުން. މިހެން އިން ނަމަވެސް 2023-2024 ގެ ދިރާސީ އަހަރުގައި ޔޫކޭޖީ ފުރިހަމަ ކުރި ދަރިވަރުން ގްރޭޑް 1 އަށް ބަދަލު ކުރެވޭނެ ކަމަށް މިނިސްޓްރީން ބުނެފައިވެއެވެ.
އެޑިއުކޭޝަން މިނިސްޓްރީން ބުނީ، އެ މިނިސްޓްރީގެ އުސޫލުގައިވާ ގޮތުގެ މަތީން އެއްވެސް ދަރިވަރަކު އެ ދަރުވަރެއް ހުރި ގްރޭޑްގައި ރިޕީޓް ނުކުރެވޭނެ ކަމަށެވެެ.
ނަމަވެސް ޚާއްސަ ހާލަތެއް ދިމާވެގެން ނުވަތަ މަގުބޫލު އުޒުރަކާއި އެކު، އެ ދަރިވަރަކުގެ ބެލެނިވެރިޔާ ބޭނުންވެއްޖެ ނަމަ، ސުކޫލުގައި އެދުމުން މިނިސްޓްރީ މެދުވެރިކޮށް ކުއްކާ ރިޕީޓް ކުރެވޭނެ ކަމަށް އެ ސާކިޔުލާގައި ބުނެފައިވެއެވެ.
ދިރާސީ އައު އަހަރު 2026 ވަނަ އަހަރު ޖަނަވަރީގައި ފެށުމަށް ތައްޔާރު ވާއިރު، މި އަހަރު ދިރާސީ އައު އަހަރު ފަށާ ތާރީޚްވެސް ވަނީ މެއި މަހަށް ބަދަލު ކުރެވިފައެވެ.
ކުރިން އޮތީ އޯގަސްޓް މަހުގައި ދިރާސީ އައު އަހަރު ފަށާ ގޮތަށެވެ. އެގޮތަށް އޮންނައިރު ސުކޫލަށް ވައްދާ އުމުރު ބަލަނީ އޮގަސްޓް މަހުން ފެށިގެންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
