ޓާމިނަލް ހުޅުވާ ހަފުލާގެ ކަންކަން އިސްރާއީލަށް ފަންޑުކުރާ ކުންފުންޏަކަށް ހަވާލުކުރި ކަމަށް ބުނެ ފަތުރަނީ ދޮގެއް
ލިޔުންތެރިޔާ
އަހުމަދު ހަމީދު އާދަމް
ވީއައިއޭގެ އާ ޓާމިނަލް ހުޅުވާ ހަފުލާގެ ކަންކަން އިންތިޒާމު ކުރުމަށް އިސްރާއީލަށް ފަންޑުކުރާ ކުންފުންޏަކަށް ހަވާލުކުރި ކަމަށް ބުނެ ފަތުރަނީ ދޮގެއް ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޑެޓް (އެމްއޭސީއެލް) އިން ބުނެފި އެވެ.
ރާއްޖެޓީވީން ވަނީ ވީއައިއޭގެ އާ ޓާމިނަލް ހުޅުވާ ހަފުލާގެ ކަންކަން އިންތިޒާމު ކުރުމަށް އިސްރާއީލަށް ފަންޑުކުރާ ކުންފުންޏަކަށް ހަވާލުކުރި ކަމަށް ބުނެ ހަބަރު ފަތުރާފަ އެވެ. ފަސް މިލިއަން ޑޮލަރަށް އެކަން ހަވާލުކޮށްފައި ވަނީ ބަނާނާ ސްޕްލިޓް ކިޔާ ކުންފުންޏަކާ ކަމަށް ވެސް ބުނެފައިވެ އެވެ.
އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުހައްމަދު ލަމްއާން "ވޮއިސް" އާ ވާހަކަ ދައްކަމުން މިރޭ ވިދާޅުވީ ރާއްޖެ ޓީވީން ފަތުރަމުން ދަނީ ބުހުތާނު ދޮގު ކަމަށެވެ. އެކަން ކުށްވެރިކުރާ ކަމަަށްވެސް ވިދާޅުވި އެވެ. އަދި ވިދާޅުވީ ގައުމީ މިފަދަ ބޮޑު ކަމެއްގައި ބުހުތާނު ދޮގު ފަތުރާ އާންމުންގެ މެދުގައި ފިތުނަަފަސާދަ އުފެއްދުމުގެ މައްސަލަ މީޑިއާގެ ކަމާގުޅޭ އިދާރާތަކަށް ހުށައެޅުމަށް ނިންމާފައިވާ ކަމަށެވެ. ލަމްއާން ވިދާޅުވީ ވީއައިއޭ އާ ޓާމިނަލް ހުޅުވުމުގެ ކަންކަން އިންތިޒާމުކޮށް ކުރިއަށްގެންދަނީ އެމްއޭސީއެލުންކަމަށެވެ.
ވީއައިއޭގެ އާ ޓާމިނަލް ހުޅުވުމަށް ވަރަށް ބޮޑަށް ދަނީ ތައްޔާރު ވަމުންނެވެ. އެއީ މިހާތަނަށް ރާއްޖޭގައި ބޭއްވޭ އެންމެ ކުލަގަދަ ރަސްމިއްޔާތަށް ހެދުމަށް ސަރުކާރުން ދަނީ މަސައްކަތް ކުރަމުންނެވެ.
އާ ޓާމިނަލް ހުޅުވުން އޮތީ މި މަހުގެ 26 ވަނަ ދުވަހު އެވެ. އެއީ ދިވެހިރާއްޖޭގެ މިނިވަން ކަމަށް 60 އަހަރު ފުރޭ އުފާވެރި މުނާސަބަތެވެ. އާ ޓާމިނަލް ހުޅުއްވައި ދެއްވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
