މާވަށަށް ކަރަންޓް ދިނުމަށް އައު އިންޖީނެއް ގެންގޮސް ބެހެއްޓުމުގެ މަސައްކަތް ފަށައިފި

ލ.މާވަށަށް ދިމާވެފައިވާ ކަރަންޓްގެ މައްސަލަ ހައްލުކުރުމަށް ފެނަކަ ކޯޕަރޭޝަނުން އެރަށަށް އައު އިންޖީނެއް ގެންގޮސް އެ އިންޖީނު ބެހެއްޓުމުގެ މަސައްކަތް ފަށައިފިއެވެ.

މިކަމާ ގުޅޭގޮތުން ފެނަކައިން އެކްސްގައި ކުރި ޕޯސްޓެއްގައި ބުނެފައިވަނީ، ދެމެހެއްޓެނިވި ގޮތެއްގައި ކަރަންޓުގެ ޚިދުމަތް ދިނުމަށް ކުރެވެމުންދާ މަސައްކަތްތަކުގެ ތެރެއިން، މާވަށުގެ ކަރަންޓް ހާލަތު ރަނގަޅުކުރުމުގެ ގޮތުން ކެޕޭސިޓީ އިތުރުކުރުމަށް އެރަށަށް 800ކވ ގެ އައު އިންޖީނެއް ގެންގޮސްފައިވާކަމަށެވެ.

އިންޖީނު ބެހެއްޓުމުގެ މަސައްކަތް ވަރަށް ބާރަށް ކުރިއަށްދާކަމަށާއި، ކުރިއަށްއޮތް ހަފްތާއެއްހާ ދުވަހުގެ ތެރޭގައި އިންޖީނު އިންސްޓޯލްކުރުމުގެ މަސައްކަތް މުޅިން ނިންމާލައި ހިދުމަތްދޭން ފަށާނޭކަމަށް ފެބަކައިން ބުންޏެވެ.

މާވަށުގެ ކަރަންޓް ހާލަތު ރަނގަޅުކުރުމަށް އެރަށަށް އައު އިންޖީނެއް ގެންގޮސް އިންސްޓޯލްކުރުމުގެ މަސައްކަތް ފަށާފައިވާއިރު ސަރުކާރުން މިހާރުވެސް ވަނީ މާވަށުގައި ސޯލާރ ޕީވީ ނިޒާމް ޤައިމްކުރުމުގެ މަސައްކަތް ކުރުމަށް ކުރަންޖެހޭ މަސައްކަތްތައް ފަށާފައެވެ. މާވަށުގައި 15 މެގަވޮޓްގެ ސޯލަރ ޕީވީ ނިޒާމު ޤާއިމުކުރުމަށް ވަނީ ނިންމާފައެވެ.

މި މަސައްކަތްކުރާނޭ ކޮންޓްރެކްޓަރަކު ހޮވުމުގެ މަސައްކަތް މިއަހަރުގެ ފުރަތަމަ ކުއާޓަރުގެ ތެރޭގައި ކުރެވިގެންދާނޭކަމަށް ތިވާމެއްޓާބެހޭ ވުޒާރާއިން ކުރިން ވަނީ ބުނެފައެވެ.