ޝަހުޒާންއާ ލީވާން ވަކި ގޮޅިއަކަށްލީ އެމީހުން ތިބި ގޮޅިން ފޯނެއް ފެނިގެން: އިހުސާން

ކޯޓުގެ ހުރުމަތް ކެނޑި މައްސަލައެއްގައި ޖަލަށްލީ ދެ ނޫސްވެރިން ކަމަށްވާ މުހައްމަދު ޝަހުޒާން އާއި މުހައްމަދު ލީވާން ވަކި ދެ ގޮޅިއަކަށް ބަދަލުކުރީ، އެމީހުން ތިބި ގޮޅިން މޯބައިލް ފޯނެއް ފެނިގެން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.

ޝަހުޒާން ޖަލުން މިނިވަންވުމަށްފަހު ވާހަކަދައްކަމުން އިއްޔެ ވަނީ، އެމީހުން ވަކި ގޮޅިތަކަކަށް ބަދަލުކުރީ ރައީސް މުއިއްޒު އަންގަވައިގެން އެއްވެސް ސަބަބަކާ ނުލައި ކަމަށް ތުހުމަތުކޮށްފައެވެ.

ނަމަވެސް ސަރުކާރުން ވަނީ އެ ތުހުމަތުތައް ދޮގުކޮށްފައެވެ.

އެގޮތުން މިނިސްޓަރު އިހުސާން އެކްސްގައި ކުރެއްވި ޕޯސްޓެއްގައި މިނިސްޓަރު ވިދާޅުވީ، ޖަލުން މިނިވަންވުމަށްފަހު ޝަހުޒާން ދައްކަމުންދާ ވާހަކަތަކަކީ 100 އިންސައްތަ ދޮގު ވާހަކަތަކެއް ކަމަށެވެ.

އިހުސާން ވިދާޅުވި ގޮތުގައި، 15 މެއި 2026 ވީ ދުވަހުގެ ރޭގަނޑު 19:35 ހާއިރު، އާންމު ފަރާތަކުން ލިބުނު މައުލޫމާތަކާ ގުޅިގެން ކަރެކްޝަންސްގެ އޮފިސަރުން ވަނީ ޝަހުޒާން އާއި ލީވާން ބަންދުކޮށްފައި ތިބި ގޮޅި ފާސްކޮށްފައެވެ. އެމީހުންގެ ހާޒިރުގައި ގޮޅި ފާސްކުރިއިރު، ގޮޅީގައި ހުރި ކަބަޑެއްގެ ތެރޭގައި ހުރި އެއްޗެހީގެ ތެރެއިން މޯބައިލް ފޯނެއް ފެނިފައިވާ ކަމަށް މިނިސްޓަރު ވިދާޅުވިއެވެ.

މި މައްސަލައާ ގުޅިގެން، ޖަލުގެ އުސޫލުތަކާ އެއްގޮތަށް އެ ދެމީހުން މޮނިޓަރު ކުރުމަށްޓަކައި ވަކި ދެ ގޮޅިއަކަށް ބަދަލުކުރި ކަމަށާއި، އަދި ވަކި ވަގުތުތަކެއްގައި ގޮޅި ފާސްކުރަމުންދިޔައީ ވެސް އުސޫލުގެ ތެރެއިން ކަމަށް މިނިސްޓަރު ފާހަގަކުރެއްވިއެވެ.

"މިކަންކަމަކީ ވަކި ގައިދީއަކަށް ނުވަތަ ވަކި ފަރާތަކުން އަންގައިގެން ކުރާ ކަންކަމެއް ނޫން. އަމުދުން ޖަލުގެ މިފަދަ ކަންކަމަކީ ރައީސުލްޖުމްހޫރިއްޔާ ގޮތް ނިންމަވާ ކަންކަމެއް ނޫން. އަދި އަލްހުގަނޑުގެ ވަޒީރުކަމުގައި ރައީސް (ޑރ. މުހައްމަދު މުއިއްޒު) ދުވަހަކުވެސް ޖަލުގެ މިފަދަ ކަންކަމާ އެއްވެސް މިންވަރަކަށް އިރުޝާދެއް ދެއްވާފައެއް ނުވޭ،" އިހުސާން ވިދާޅުވިއެވެ.

މީގެ އިތުރުން މިނިސްޓަރު ވިދާޅުވީ، ރާއްޖޭގެ ތަފާތު ތިން ނޫސްވެރިއަކު މިކަމާ ގުޅޭގޮތުން ސުވާލުކުރުމުން އެ މައުލޫމާތު ސާފުކޮށްދެއްވާފައިވާނެ ކަމަށެވެ. ނަމަވެސް އެއިން އެއްވެސް ފަރާތަކުން އެ ހަގީގަތް ހާމަކޮށްފައިނުވާތީ މިނިސްޓަރު ވަނީ ކަންބޮޑުވުން ފާޅުކުރައްވާފައެވެ. ޖަލަށް ވައްދަން މަނާ ތަކެތި ފެނުނު މި މައްސަލަ މިހާރު މޯލްޑިވްސް ޕޮލިސް ސާވިސްއިން ދަނީ ތަހުގީގު ކުރަމުންނެވެ.

ޝަހުޒާން އާއި ލީވާން ޖަލަށްލާފައިވަނީ "އަދަދު" ނޫހުން ނެރުނު ޑޮކިއުމެންޓްރީއާ ގުޅޭ އެއްވެސް ވާހަކައެއް ދެއްކުން ކޯޓުން މަނާކޮށްފައި ވަނިކޮށް، އެއާ ހިލާފުވެ ކޯޓުގެ ހުރުމަތް ކެނޑިކަމަށް ކަނޑައަޅައިގެންނެވެ. އެ މައްސަލާގައި ޝަހުޒާން 15 ދުވަހަށް އަދި ލީވާން 10 ދުވަހަށް ޖަލަށްލުމަށް ކޯޓުން ހުކުމްކުރިއެވެ.