މުޅި ހަޔާތް ހޭދަކުރީ އެމްޑީޕީއަށްޓަކައި، ގެއަށް އެނބުރި އައުމުގެ އުފާ ލިބިއްޖެ: ނަޝީދު

އެމަނިކުފާނުގެ މުޅި ހަޔާތް ހޭދަކުރެއްވީ އެމްޑީޕީއަށްޓަކައި ކަމަށާ އެމަނިކުފާނުގެ އެންމެ ބޮޑު އުންމީދަކީ އެމްޑީޕީއަށް ކާމިޔާބު ލިބުން ކަމަށް ކުރީގެ ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.

ރައީސް ނަޝީދު މިހެން ވިދާޅުވީ އެމަނިކުފާނާއި ދަ ޑިމޮކްރެޓްސްގެ އިސް ބޭފުޅުންނާއި ބައެއް އާންމުން އެމްޑީޕީއާ އަލުން ގުޅުމަށް މިރޭ ސަލްޓަންޕާކު ގައި ބޭއްވި ޖަލްސާގައި ވާހަކަ ދައްކަވަމުންނެވެ.

ނަޝީދު ވިދާޅުވީ އެމްޑީޕީގައި ދެ އަހަރު ދުރުގައި ހުންނެވުމަށް ފަހު މިރޭ އަލުން އެނބުރި އެމްޑީޕީއާ ގުޅުމަކީ އިންތިހާއަށް އުފާވާ ކަމެއް ކަމަށެވެ. ވިދާޅުވީ އެނބުރި ގެއަށް އައުމުގެ އުފާ ލިބިވަޑައިގެންފައިވާ ކަމަށެވެ. މިރޭގެ ޖަލްސާގައި ނަޝީދު ވަނީ އެމްޑީޕީއަށް ވަރަށް ބޮޑަށް ތައުރީފު ކުރައްވާފަ އެވެ.

ވިދާޅުވީ ރައްޔިތަކަށް ހެވެއް ހޯދައިދޭން މަސައްކަތް ކުރާނެ ޕާޓީއެއް އެމްޑީޕީ ނޫނީ ނެތް ކަމަށެވެ. އަދި ވިދާޅުވީ އެމްޑީޕީއާ އެމަނިކުފާނު ސިޔާސީ މަސައްކަތަށް ނިކުމެ އޮތީ އެންމެ މަގްސަދެއްގައި ކަމަށެވެ. އެއީ ރައްޔިތުންނަށް ހެޔޮ ގޮތް ހޯދައިދިނުން ކަމަށް ވިދާޅުވި އެވެ.

"އަޅުގަނޑުމެން ނިކުމެ ކުރާ މަސައްކަތަކީ މާތް މަގްސަދެއްގައި ކުރާ މާތް މަސައްކަތެއް," ގިނަ ބަޔަކު ބައިވެރިވި ފޯރިގަދަ ޖަލްސާގައި ނަޝީދު ވިދާޅުވި އެވެ.

އެމަނިކުފާނު ވިދާޅުވީ ރާއްޖެއަށް މިއަދު އޮތް އެންމެ ބޮޑު ގޮންޖެހުމަކީ ދަރަނި ބޮޑުވުމުގެ މައްސަލަ ކަމަށެވެ. އަންނަ އަހަރަކީ ދަރަނީގެ ގޮތުގައި ދެ ބިލިއަން ޑޮލަރުގެ އަނބުރާ ދައްކަން ޖެހޭ އަހަރެއްކަން ފާހަގަ ކުރައްވާ އެމަނިކުފާނު ވިދާޅުވީ އިގްތިސާދު ކުރިއަރާ ދާނެ ގޮތެއް ނެތި ހުއްޓިފައިވާ ކަމަށެވެ.

މުސާރަ ދިނުން ނޫން ކަމެއް ސަރުކާރުން ނުކުރާ ކަމަށާ ގައުމު އޮތް ހާާލަތު ރަނގަޅު ކުރަން އެމްޑީޕީއާއެކު ހުރިހާ ރައްޔިތުން މަސައްކަތް ކުރަން ޖެހޭ ކަމަށް ވެސް އެމަނިކުފާނު ވިދާޅުވި އެވެ.

ނަޝީދު ވިދާޅުވީ އެމްޑީޕީއަކީ ރައްޔިތުންގެ ސަލާމަތް ހޯދައިދޭނެ ޕާޓީ ކަމަށެވެ. އަދި ވިދާޅުވީ ދަރަނި ދައްކާނެ ގޮތް އެ ބޭފުޅުންނަށް އެނގިވަޑައިގަންނަވާ ކަމަށާ އަދި ރާއްޖޭގެ އާންމު ހާލަތު ރަނގަޅު ކުރަން ދެން ކުރަން އޮތީ ކޮން ކަމެއްްވެސް އެނގިވަޑައިގަންނަވާ ކަމަށެވެ.

"މި ޕާޓީއަކީ ހިސާބު ޖަހާ ޕާޓީއެއް. މި ޕާޓީއަކީ ރަނުން ރަނަށް މިން އަޅާނެ ޕާޓީއެއް," ރައީސް ނަޝީދު މިރޭ ވިދާޅުވި އެވެ.