ފާއިތުވެދިޔަ 2 ދުވަހުގެ ތެރޭގައި 72 ސައިކަލާއި 5 ކާރަށް ފިޔަވަޅު އަޅައިފި

ފާއިތުވެދިޔަ 2 ދުވަހުގެ ތެރޭގައި ފުލުހުން 72 ސައިކަލާއި 5 ކާރަށް ފިޔަވަޅު އަޅައިފިއެވެ.

ފުލުހުން ވަނީ 8 ސެޕްޓެމްބަރުން ފެށިގެން 10 ސެޕްޓެމްބަރާއި ހަމައަށް ހުޅުމާލެ އާއި މާލޭގައި ކޮށްފައިވާ މަސައްކަތުގެ ހިސާބު އާއްމުކޮށްފައެވެ.

މިގޮތުން 8 ސެޕްޓެމްބަރު ގެ ހަވީރު 18:00 އިން ސެޕްޓެމްބަރު މަހުގެ 9 ވަނަ ދުވަހުގެ 18:00 އާއި ހަމައަށް ހުޅުމާލޭގައި ފުލުހުން ވަނީ 229 ސައިކަލާއި 30 ކާރު ހުއްޓުވައި، ބަލާފާސްކޮށްފައިއެވެ. އޭގެ ތެރެއިން 2 ކާރާއި 53 ސައިކަލަށް ފިޔަވަޅު އަޅާފައިވާއިރު، 8 ސައިކަލެއް ލައިންސަންސާއި ނުލައި ދުއްވާކަން ފުލުހުންނަށް ވަނީ ފާހަގަކުރެވިފައެވެ.

ހަމައެއާއިއެކު، 3 ކާރަކާއި 14 ސައިކަލެއް ޓޯކުރިއިރު، 37 ސައިކަލެއްގެ ވެރިފަރާތަށް ނަސޭހަތްދީފައިވާއިރު، 5 ސައިކަލެއް ނުރައްކާތެރިކޮށް ދުއްވާފައިވާކަމަށް ފުލުހުން ވަނީ ހާމަކޮށްފައެވެ.

މިމަހުގެ 9 ވަނަ ދުވަހުގެ 18:00 އިން 10 ވަނަ ދުވަހުގެ 18:00 އަށް ފުލުހުން މާލޭގައި ކޮށްފައިވާ މަސައްކަތަށް ބަލާއިރު، 22 ސައިކަލަކާއި 10 ކާރެއް ވަނީ ހުއްޓުވައި، ބަލާ ފާސްކޮށްފައެވެ. އޭގެ ތެރެއިން 3 ކާރާއި 19 ސައިކަލަށް ފިޔަވަޅު އަޅާފައިވާއިރު، 2 ކާރާއި 15 ސައިކަލެއް ލައިންސަންސާއި ނުލައި ދުއްވާކަން ފުލުހުންނަށް ވަނީ ފާހަގަކުރެވިފައެވެ.

މީގެ އިތުރުންވެސް، 3 ކާރަކާއި 19 ސައިކަލެއް ޓޯކުރިއިރު، 7 ކާރަކާއި 3 ސައިކަލެއްގެ ވެރިފަރާތަށް ނަސޭހަތްދީ، 1 ކާރާއި 3 ސައިކަލެއް ނުރައްކާތެރިކޮށް ދުއްވާފައިވާކަމަށް ފުލުހުން ވަނީ ހާމަކޮށްފައެވެ.

ދާދި ފަހުން ކައިރި ކައިރީގައި ވަރަށް ނުރައްކާތެރި އެކްސިޑެންޓްތަކެއް ހިނގާފައިވާއިރު، މަގުމަތީގެ ސަލާމަތާއި ރައްކާތެރިކަން އިތުރުކުރުމަށް ފުލުހުން ކުރަމުން އަންނަ މަސައްކަތް ވަރުގަދަކޮށްފައިވާކަން ފާހަގަކޮށްލަން ޖެހެއެވެ.