ސްޕޯޓްސް ކޯޕަރޭޝަން އުވާލިއިރު، ގެއްލުން 43 މިލިއަން ރުފިޔާއަށްވުރެ މަތީގައި

މޯލްޑިވްސް ސްޕޯޓްސް ކޯޕަރޭޝަން އުވާލިއިރު އެތަނަށް ލިބުނު ގެއްލުން 43 މިލިއަން ރުފިޔާއަށްވުރެ ބޮޑުކަމަށް އޮޑިޓަރ ޖެނެރަލްގެ އޮފީހުން ބުނެފިއެވެ.

ދައުލަތުގެ އޮޑިޓަރު ނެރުއްވާފައިވާ މޯލްޑިވްސް ސްޕޯޓްސް ކޯޕަރޭޝަން ލިމިޓެޑްގެ މާލީބަޔާނުގެ އޮޑިޓްގައި ބުނެފައިވަނީ، 2024 ވަނަ އަހަރު ނިމުނުއިރު، 43.4 މިލިއަން ރުފިޔާއަށް އަރާކަމަށެވެ. އޮޑިޓަރ ޖެނެރަލްގެ އޮފީހުން ނެރެފައިވާ ރިޕޯޓަށް ބަލާއިރު، މާލީ އެ އަހަރުގެ ނިޔަލަށް ކުންފުނީގެ އިކުއިޓީގެ ގޮތުގައި ހުރީ 783,606 ރުފިޔާއެވެ. ފަހުން ސަރުކާރަށް މާލީ ބުރަޔަކަށް ވެފައި އޮތް ސްޕޯޓްސް ކޯޕަރޭޝަން ހިންގަމުން ގެންގޮސްފައިވަނީ، ސަރުކާރުން ކުންފުނި ހިންގުމަށް މާލީ އެހީ ދޭނެކަމަށް ބަލައިގެންނެވެ.

އޮޑިޓުން އެނގެން އޮތްގޮތުގައި އެކުންފުނީގެ އެންމެ ފަހު ދެ މާލީ އަހަރުވެސް ނިންމާލީ ގެއްލުމުގައެވެ. އެގޮތުން 2023 ވަނަ އަހަރު 4.9 މިލިއަން ރުފިޔާ ލިބުނުއިރު، ޖެހިގެން އައި އަހަރު 3.9 މިލިއަން ރުފިޔާގެ ގެއްލުން ވަނީ ލިބިފައެވެ.

ސްޕޯޓްސް ކޯޕަރޭޝަނަކީ، ރާއްޖޭގެ ކުޅިވަރުގެ ގާނޫނުގެ ދަށުން ކުޅިވަރުގެ ވަސީލަތްތައް ތަރައްގީކޮށް، އަމިއްލަ ފައިމައްޗަށް ތެދުވެގެން ހިނގާ ކުންފުންޏަކަށް ހެދުމަށް ރައީސް ޔާމީނުގެ ވެރިކަމުގައި 2016 ވަނަ އަހަރު އުފެއްދި ކުންފުންޏެކެވެ. ނަމަވެސް ކުޅިވަރު ޤާނޫނަށް ގެނައި އިސްލާހްތަކާއެކު މިދިޔަ އަހަރުގެ މެއިމަހު ސްޕޯޓްސް ކޯޕަރޭޝަން ވަނީ އުވިފައެވެ.

ސަރުކާރުގެ 100 އިންސައްތަހިއްސާ އޮންނަ ސްޕޯޓްސް ކޯޕަރޭޝަން އުވާލާފައިވަނީ އެކުންފުންޏަށް ލިބެމުންދިޔަ ގެއްލުންތަކާއެކު، ކުންފުނިން ދެމެހެއްޓެނިވި ގޮތެއްގައި އާމްދަނީ ހޯދޭނެ މަގެއް ނެތުމުގެ ސަބަބުންނެވެ.