މަޖިލީހުގެ ދައުރު އަނެއްކާވެސް ދަންމައިލައިފި

މުހިންމު މަސައްކަތްތަކެއް ނިންމުމަށް ކަމަށް ބުނެ، ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ މުއްދަތު މިމަހު 27 ގެ ނިޔަލަށް އިތުރުކުރުމަށް މަޖިލީހުން މިއަދު ފާސްކޮށްފިއެވެ.

މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ދައުރު ދަންމާލުމަށް ފާސްކުރީ ވޯޓުގައި ބައިވެރިވެވަޑައިގެންނެވި 67 މެންބަރުންގެ ތެރެއިން 58 މެންބަރުންގެ އަޣުލަބިއްޔަތުންނެވެ. މި ނިންމުމާ ދެކޮޅަށް ވޯޓު ދެއްވީ ނުވަ މެންބަރުންނެވެ.

މިއީ މި ހިނގާ ދެވަނަ ދައުރުގެ މުއްދަތު އިތުރުކުރި ދެވަނަ ފަހަރެވެ. މީގެކުރިން މި މަހުގެ 15 އަށް ދައުރު ހަމަވާން އޮއްވައި، ފުރަތަމަ ފަހަރަށް ދައުރު ދަންމާލީ މި މަހުގެ 20 ވަނަ ދުވަހުގެ ނިޔަލަށެވެ. އެ ފަހަރު އެގޮތަށް ފާސްކުރީ ވޯޓުގައި ބައިވެރިވެވަޑައިގެންނެވި 58 މެންބަރުންގެ އިއްތިފާގުންނެވެ.

ދައުރު ދަންމާލަން ޖެހުނު ސަބަބާ ގުޅޭގޮތުން ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުالله ވިދާޅުވީ، ދައުރު އިތުރުކުރަން ހުށަހެޅުއްވީ މި ދައުރުގެ ތެރޭގައި ނިންމަންޖެހޭ ގިނަ އަދި މުހިންމު މަސައްކަތްތަކެއް ހުރުމުން، އެ މަސައްކަތްތައް ނިންމެވުމުގެ ބޭނުމުގައި ކަމަށެވެ.

ރައްޔިތުންގެ މަޖިލީހުގެ ގަވާއިދުގައިވާ ގޮތުން މަޖިލީހުގެ އަހަރީ މަސައްކަތްތައް ބެހިގެންވަނީ މައިގަނޑު ތިން ދައުރެއްގެ މައްޗަށެވެ. އެގޮތުން އަހަރުގެ ފުރަތަމަ ދައުރު ފެބްރުއަރީ 1 އިން ފެށިގެން މެއި 15 ގެ ނިޔަލަށް ހިނގާއިރު، ދެވަނަ ދައުރު އާންމު އުސޫލުން ކުރިއަށްދަނީ ޖޫން މަހުގެ 1 އިން އޮގަސްޓް 15 ގެ ނިޔަލަށެވެ. އަދި ފަހު ދައުރު ތާވަލުކުރެވިފައި ވަނީ އޮކްޓޫބަރު 1 އިން ނޮވެމްބަރު މަހުގެ ނިޔަލަށެވެ.