އަހަރުގެ މިހާތަނަށް, ދަރަނި ދައްކަން 4.4 ބިލިއަން ރުފިޔާ ހޭދަކޮށްފި

ދަރަނި އަދާކުރުމަށް އަހަރުގެ މިހާތަނަށް 4.4 ބިލިއަން ރުފިޔާ ހޭދަކޮށްފައިވާކަމަށް މާލީ ވުޒާރާގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީން ނެރެފައިވާ ދައުލަތުގެ ހަރަދު ބަރަދު ތަފާސްހިސާބު ތަކުގައިވާގޮތުން މިހިނގާ އޮކްޓޯބަރުމަހުގެ 16 ވަނަ ދުވަހުގެ ނިޔަލަށް ދަރަނި އަދާކުރުމަށް ކުރި ހޭދަ 4.4 ބިލިއަން ރުފިޔާގައި ހުރިއިރު މިދިޔަ އަހަރުގެ މި މުއްދަތުގެ ތެރޭގައި މި އަދަދު ހުރީ 2 ބިލިއަން ރުފިޔާގައެވެ. ފިނޭންސުން ބުނީ އަހަރުގެ މިހާތަނަށް އާއިރު ދަރަނި އަދާކުރުމަށް ކުރި ހޭދަ އިތުރުވުމުގެ މައިގަނޑު ސަބަބަކީ، މީގެ ކުރިން ދައުލަތުން ނަގާފައިވާ ލޯނުތަކަށް އިންޓަރެސްޓްގެ ގޮތުގައި ކުރި ހޭދަ އިތުރުވުން ކަމަށެވެ.

ފިނޭންސް މިނިސްޓްރީގެ ތަފާސްހިސާބުތަކުން ދައްކާގޮތުގައި މިއަހަރުގެ ދެވަކަ ކުއާޓަރު ނިމުނުއިރު ރާއްޖޭގެ ޖުމްލަ ދަރަނި ހުރީ، 148 ބިލިއަން ރުފިޔާގައެވެ. މީގެ ކުރިން ނަގާފައިވާ ދަރަނިތަކާއެކު ބޭރުގެ އެކި ފަރާތްތަކަށް އެކަނިވެސް 42 ބިލިއަނަށްވުރެ ގިނަ ރުފިޔާ ދައްކަންޖެހޭކަމަށް ތަފާސްހިސާބުތަކުން ދައްކައެވެ.

ކުރިއަށްއޮތް އަހަރު ވެގެންދާނީ ރާއްޖޭގެ ތާރީހުގައިވެސް އެންމެ ބޮޑު އަދަދަކުން ދަރަނިތައް ދައްކަންޖެހޭނެ އަހަރަށްކަމަށް މާލީ ވުޒާރާއިން ވަނީ ބުނެފައެވެ. އެގޮތުން ބޭރުގެ އެކި ފަރާތްތަކުން ނަގާފައިވާ ލޯނުތަކުގެ އިންޓަރެސްޓާއެކު 1 ބިލިއަނަށްވުރެ ގިނަ ޑޮލަރު ދައްކަންޖެހޭަނޭކަމަށް މާލީ ވުޒާރާއިން ފާހަގަކުރެއެވެ. އެއީ ދިވެހި ރުފިޔާއިން ބަލާނަމަ 15 ބިލިއަނަށްވުރެ ގިނަ ރުފިޔާއެވެ.

އަންނަ އަހަރު ދައްކަންޖެހޭ 1 ބިލިއަން ޑޮލަރުގެ ތެރޭގައި ހިމެނެނީ 2021 ވަނަ އަހަރު ވިއްކާފައިވާ ސަވަރިން ސުކޫކަށް ދައްކަންޖެހޭ 500 މިލިއަން ޑޮލަރެވެ.