ރަސޫލާ ﷺ ވެސް ގޭތެރޭގެ މަސައްކަތް ތަކުގައި އިސްދައުރެއް އަދާ ކުރެއްވި: އުސްތާޒާ ސާމިޔާ

މިއުއްމަތުގެ މާތް ނަބިއްޔާ صلى الله عليه وسلم އަކީ ގޭތެރޭގެ މަސައްކަތްތަކުގައި އިސްދައުރެއް އަދާކުރެއްވި ބޭކަލެއް ކަމުގައި މަޝްހޫރު އަންހެން ދީނީ ޢިލްމުވެރިޔާ އަލްއުސްތާޛާ ސާމިޔާ ޒަކަރިއްޔާ ވިދާޅުވެއްޖެއެވެ.

އުސްތާޒާ މިހެން ވިދާޅުވެފައި ވަނީ، ގޭތެރޭގައި ކައްކައި ތަށި ދޮވުމަކީ ފިރިމީހާ ފިރިހެންވަންތަ ކަމުން ބޭރުވެ، ”އަންހެންދުޅާވާ“ ކަމެއްގެ ގޮތުގައި ސިފަކޮށް ޝުޢައިބު ކިޔާ މީހަކު މީސްމީޑިއާގައި ކުރި ޕޯސްޓަކާއި ގުޅިގެން ގިނަ ބައެއްގެ ނުރުހުން އޭނާއަށް އަމާޒުވެފައިވާ ދަނޑިވަޅެއްގައެވެ.

އެގޮތުން، އުސްތާޒާ ސާމިޔާ ވިދާޅުވީ، ގޭތެރޭގައި މަސައްކަތް ކުރުމަކީ އަންހެން ވަންތަ ކަމެއް ނޫން ކަމަށާ އެއީ ފިރިހެންވަންތަ ކަން ގެއްލޭ ކަމެއްވެސް ނޫން ކަމަށެވެ.

”މިއުއްމަތުގެ މާތް ނަބިއްޔާ صلى الله عليه وسلم އަކީ ގޭތެރޭގެ މަސައްކަތްތަކުގައި އިސްދައުރެއް އަދާކުރެއްވި ބޭކަލެކެވެ.“ އުސްތާޒާ ސާމިޔާ ވިދާޅުވިއެވެ.

މިއާއެކު ސާމިޔާ ވިދާޅުވީ، ދީންފެތުރުމަކީ ފިރިހެނުންނަށް ޚާއްޞަކަމެއް ނޫން ކަމަށާ، މިއުއްމަތުގައި ދީން ފެތުރުއްވުމާއި، ފަތުވާ ދެއްވުމުގެ މޭސްތިރިއަކީ އަންހެނެއްކަމަށެވެ.

”އުއްމުލް މުއުމިނީނަ ޢާއިޝާ رضي الله عنها އަށް ވުރެ ވަކިން ބޮޑަށް، މީސްތަކުންނަށް ދީނުގެ ޙުކުމްތައް އުނގަންނައި ދެއްވައި ފަތުވާދެއްވި ޞަޙާބީއަކު ނެތެވެ. އެކަން ކުރުމަަށްޓަކާ ގޭތެރޭގެ މަސައްކަތުގައި ނޫޅެވޭނޭ ބުނުމަކީ ހަމަޖެހޭ ކަމެއް ނޫނެވެ.“ ސާމިޔާ ވިދާޅުވިއެވެ.

އުސްތާޒާގެ ފިރިކަލުން ޑރ. މޫސާ އަންވަރަކީވެސް ދީނީ ޢިލްމުވެރިއެއް ކަމަށާ،  އަދި މުޖުތަމަޢުގެ އެތައް ބަޔަކަށް ދީނުގެ މަޢުލޫމާތު ފޯރުކޮށް ދެއްވުމުގައި، ރެއާއި ދުވާލު މަސައްކަތް ކުރައްވާ ބޭކަލެއްކަބް ފާހަގަކުރައްވައި އިތުރަށް ވިދާޅުވީ، އެކަންކަން ކުރެއްވި ނަމަވެސް، ގޭތެރޭގެ މަސައްކަތްތަކުގައި އެހީތެރިވެ ދެއްވާ ކަމަށެވެ.

”ބަދިގެއަށް ވަދެ ކައްކާ ދެއްވައެވެ. ތެލިތަށިވެސް ދޮވެދެއްވައެވެ. ފުޅިތަކަށް ފެންވެސް އަޅައިދެއްވައެވެ. ގޭތެރެ ސާފުކުރުމުގައި އިސްދައުރެއް އަދާކުރައްވައެވެ. ބާޒާރުވެސް ކޮށްދެއްވައެވެ. އަޅުގަނޑުމެން ގޭތެރޭގެ ކަންކަން ކުރަނީ ބަހައިގެން، އެންމެންގެ ހިއްސާ އޮންނަ ގޮތަށެވެ. ގޭގެ މަސައްކަތްތައް ކުރާކަށް ނޯކަރަކު ނުގެންގުޅެމެވެ.“ ސާމިޔާ ވިދާޅުވުއެވެ.

އަދި އަނބިމީހާއަކީ ފިރިމީހާގެ ނޯކަރެއްވެސް ނޫނެވެ. އެއީ ހަޔާތުގެ ބައިވެރިޔާއެވެ. ލޯބިވާ އަނބިމީހާއެވެ.

އުސްތާޒާ ސާމިޔާ

ކަންމިހެން ހުރުމުން، އަނބިމީހާއަށް އެހީތެރިވެދީ ގޭތެރޭގެ ކެއިންބުއިމާއި، ސާފުކުރުމާއި، ދަރީންގެ ކަންކަމުގައި އެހީވެދިނުމަކީ އަންހެން ދުޅާވުން ކަމުގައި ވާނަމަ، ދެން ފިރިހެން ވަންތަ ކަމަކީ ކޮބައިތޯ އުސްތާޒާ ވަނީ ސުވާލު ކުރައްވާފައެވެ. އަދި އެއީ އަނބިމީހާ ކެއްކީމާ ކާލައިގެން ރަސްކަލެއް ހެން އުޅުންތޯ ސުވާލުކުރައްވައި ސާމިޔާ ވިދާޅުވީ، ފިރިމީހާ އަކީ ރަސްކަލެއް ނަމަ އަނބިމީހާއަކީ ރާނީއެއް ކަމަށެވެ.

ސާމިޔާ ވިދާޅުވި ގޮތުގައި، އަނބިންނަކީ ތިމާމެންގެ ޢިއްޒަތެވެ. އެހެންކަމުން، އެކަނަބލުންނަށް ލޯބިދީ އިޙްތިރާމް ކޮށް ހެޔޮކޮން ހިތުމަށް ނަޞޭޙަތްތެރިވެލެއްވިއެވެ. އަދި ކީރިތި ރަސޫލަާ صلى الله عليه وسلم ގެ އެންމެ ފަހުގެ ވަޞިއްޔަތަކީ ވެސް އަނބީންނަށް ހެޔޮކޮން ހިތުމަށް ކުރެއްވި ވަޞިއްޔަތްކަންވެސް ހަނދުމަކޮށްދެއްވިއެވެ.