ިގިލިލަންކަންފުށި ރިސޯޓްގެ ބޮޑު ބައެއްގައި ރޯވެއްޖެ

ގިލިލަންކަންފުށި ރިސޯޓްގައި ހުރި ދުނިޔޭގެ އެންމެ ބޮޑު ވޯޓާ ވިލާގައި ރޯވި އަލިފާންގަނޑު، ރިސޯޓްގެ އެހެން ވިލާތަކަށްވެސް ފެތުރިއްޖެއެވެ.

މި ރިސޯޓްގައި އަލިފާން ފުރަތަމަ ރޯވެފައިވަނީ ޕްރެޒިޑެންޝިއަލް ވޯޓަރ ވިލާގައެވެ. މި ތަނުގައި ރޯވެފައިވާކަމަށް އެމްއެންޑީއެފްއަށް މައުލޫމާތު ލިބިފައިވަނީ ރޭ 10:32 ހާއިރުގައެވެ.

މި ވިލާގައި ރޯވި އަލިފާންގަނޑުގެ އަސަރު، މި ރިސޯޓްގެ އެހެން ވިލާތަކަށްވެސް ވަނީ ކޮށްފައެވެ. ވޮއިސްއަށް މައުލޫމާތު ލިބިފައިވާ ގޮތުގައި މި ރިސޯޓްގެ ގިނަ ވޯޓާ ވިލާ ތަކުގައި ވަނީ ވަރަށް ބޮޑަށް އަލިފާން ރޯވެފައެވެ. ސޮނެވާއިން ހިންގާ މި ރިސޯޓްގެ ބޮޑުބަޔަކީ ވޯޓަރ ވިލާތަކެވެ. މި ރިސޯޓްގެ އެއްގަމުގައި ހުންނަނީ ރެސްޓޯރެންޓާއި ސްޓާފް އެކޮމޮޑޭޝަން ފަދަ ތަންތަންކަމަށް މައުލޫމާތު ލިބެއެވެ. މިތަންތަނަށްވެސް ކޮންމެވެސް ވަރަކަށް އަލިފާނުގެ އަސަރުކޮށްފައިވާ ކަމަށް މައުލޫމާތު ލިބެއެވެ.

މި އަލިފާންގަނޑު ނިއްވާލުމުގެ މަސައްކަތް އެމްއެންޑީއެފްއާއި އެ ރިސޯޓްގެ ފަރާތުން ދަނީ ކުރަމުންނެވެ. ހާދިސާއާއި ގުޅިގެން ރިސޯޓްގައި ތިބި ހުރިހާ ފަތުރުވެރިން އެހެންތަންތަނަށް ވަނީ ބަދަލުކުރެވިފައެވެ.

މި ރިސޯޓްގެ ހާލަތު ބައްލަވާލެއްވުމަށް ޓުއަރިޒަމް މިނިސްޓަރ އަލީ ވަހީދު ވަނީ ރިސޯޓަށް ވަޑައިގެންފައެވެ.