ނާއިބު ރައީސަށް ފުރިހަމަ އިތުބާރު އެބައޮތް, ބާކީއެއް ނުކުރަން: ރައީސް

ރައީސުލްޖުމްހޫރިއްޔާގެ ނާއިބު ހުސައިން މުހައްމަދު ލަތީފަށް ފުރަތަމަ ދުވަހު އޮތް އިތުބާރު އެގޮތުގައި އެބަ އޮތް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރީންގެ ބައްދަލްވުމުގައި ރައީސާއި ނާއިބު ރައީސްގެ ގުޅުން ހީނަރުވެފައިވާ ކަމަށް ބުނާ ވާހަކަތަކާއި ގުޅޭގޮތުން ސުވާލު ކުރުމުން އެމަނިކުފާނު ވިދާޅުވީ ނާއިބު ރައީސާއި ގުޅުން ވަރަށް ރަނގަޅު ކަމަށެވެ. އަދި އެމަނިކުފާނުގެ ރަނިން މޭޓަކަށް ވެވަޑައިގަތުމަށް ހުސައިން މުހައްމަދު ލަތީފަށް ދައުވަތު ދެއްވި ދުވަހު އޮތް އިތުބާރު މިހާރު ވެސް އެބަ އޮތް ކަަމަށެވެ. އަދި ކުރިއަށް އޮތްތާ ވެސް އެ އިތުބާރު އެ ގޮތުގައި ދެމި އޮންނާނެ ކަމަށް ވިދާޅުވި އެވެ.

ސަރުކާރުގެ ކަންކަމުން ނާއިބު ރައީސް ބާކީ ކޮށްފައިވާ ކަމަށް ބަޔަކު ބުނާތީ އެކަމަށް ވެސް އެމަނިކުފާނު ޖަވާބު ދެއްވި އެވެ.

ރައީސް ވިދާޅުވީ ނާއިބު ރައީސް "އެއްވެސް ވަރަކަށް ބާކީއެއް ނުކުރައްވަން" ކަމަށެވެ. އަދި ވިދާޅުވީ އެމަނިކުފާނުގެ ބަދަލުގައި ވަަރަށް ގިނަ ގައުމުތަކަށް ރަސްމީ އެކި އިވެންޓްތަކަށް ވަޑައިގަންނަވަނީ ނާއިބު ރައީސް ކަމުގައި ވިދާޅުވި އެވެ.

ހުސައިން ރަނިންމޭޓަކަށް ނެންގެވުމަށް ނިންމެވީ ރައީސް

ރައީސް ވިދާޅުވި ގޮތުގައި 2023 ވަނަ އަހަރުގެ ރިޔާސީ އިންތިހާބުގައި ވާދަކުުރުމަށް ޕީއެންސީގެ ރިޔާސީ ޓިކެޓް ލިބިވަޑައިގަތުމުން ރަނިންމޭޓަކަށް ހުސައިން މުހައްމަދު ލަތީފް ނެންގެވީ އެމަނިކުފާނު ކަމަށެވެ.

އެއީ އަމިއްލަފުޅު ނިންމެވުމެއް ކަމަށް ވެސް ވިދާޅުވި އެވެ. ހުށައެޅުއްވީ ވެސް އަމިއްލަފުޅަށް ކަމަށް ވިދާޅުވި އެވެ.

ރައީސް ވިދާޅުވީ އެ ހުށައެޅުއްވުމުން ހުސައިން ގަބޫލުކުރެއްވުމުން އެކަމާއިމެދު ކުރީގެ ރައީސް ޔާމީންގެ "އެޕްރޫވަލް" ހޯއްދެވި ކަަމަށެވެ.