ގައުމީ ސަލާމަތާާއި ބެހޭ ކޮމެޓީ ހޫނުވެ ގާސިމްއާއި މަވޯޓާ ޝަރީފްގެ ޒުވާބެއް!

ރާއްޖެއާއި އިންޑިޔާއާއި ދެމެދު ސޮއިކުރުމަށް ގަސްދުކޮށްފައިވާ "މިއުޗުއަލް ލީގަލް އެސިސްޓަންސް ޓްރީޓީ"ގެ އެއްބަސްވުން ދިރާސާކުރުމަށް ބޭއްވި ގައުމީ ސަލާމަތާއި ޚާރިޖީ ގުޅުންތަކާއި ބެހޭ ކޮމެޓީގެ ބައްދަލުވުން ހޫނުވެއްޖެއެވެ.

އެގޮތުން އެ ކޮމެޓީގެ މުގައްރިރު މަރަދޫ ދާއިރާގެ މެންބަރު މަވޯޓާ އިބްރާހިމް ޝަރީފާާއި ކޮމެޓީގެ މެންބަރު އަދި މާމިގިލީ  ދާއިރާގެ މެންބަރު ގާސިމް އިބްރާހިމްވަނީ ހޫނު ޒުވާބެއްކޮށް، އެކަކު އަނެކަކާާއި ދިމާލަށް ނުރަސްމީ ބަހުން މުއާމަލާތުކޮށްފައެވެ.

މި ޒުވާބު ހިނގާފައިވަނީ އެ ކޮމެޓީ ވީޑިޔޯކުރަމުން ގެންދަނިކޮށެވެ.

https://www.facebook.com/MioKamehDho/videos/908789382797303/?_rdc=2&_rdr

އެގޮތުން ގާސިމް ވާހަކަފުޅު ދައްކަވަން ފެށުމުން މަވޯޓާ ޝަރީފް ވަނީ ގާސިމަށް އަދި ފުރުސަތު ނުދެއްވާކަމަށް ވިދާޅުވެފައެވެ. އޭގެ ޖަވާބުގައި ގާސިމް ވަނީ "ކަލޭ ބޭނުންނުވިޔަސް އަހަރުން ވާހަކަދައްކާނަން" ކަމަށް ވިދާޅުވެފައެވެ.

މިގޮތަށް ވިދާޅުވުމުން ޝަރީފް ވަނީ އެބޭފުޅާ މުގައްރިރުކަމުގައި އިންނެވީ ގާސިމް ބޭނުންގޮތަކަށް އަމަލުކުރުމުގެ ފުރުސަތު ދޭކަށްނޫންކަމަށް ވިދާޅުވެފައެވެ. މި ޒުވާބު ކުރިއަށްދިޔަ އިރު، އެކަން ހުއްޓުވުމަށް އެއްވެސް އެހެން ބޭފުޅަކު މަސައްކަތް ކުރިތަން ފެނިފައެއް ނުވެއެވެ.

ގާސިމަށް ފުރުސަތު އެރުވުމުން ވާހަކަފުޅު ދެއްކެވުމަށް މަޑުކުރެއްވުމަށް އެދުމުންވެސް ގާސިމް ވަނީ މަވޯޓާ ޝަރީފާއި ދިމާލަށް އެއްޗެހި ވިދާޅުވެފައެވެ. އޭގެ ނަތީޖާއެއްގެ ގޮތުން ޝަރީފް ވަނީ ކޮމެޓީ ވަގުތީގޮތުން މެދު ކަނޑާލަން ޖެހިދާނެކަމަށް ވިދާޅުވެ ގާސިމްގެ އަރިހުން ކޮމެޓީގެ ބައްދަލުވުމުން ނިކުމެ ވަޑައިގަތުމަށް އެދިފައެވެ.

"ކަލޭ ބުންޏަސް ނުނިކުންނާނަން"، ރައްދުގައި ގާސިމް ވިދާޅުވިއެވެ.