ކުރިއަށް އޮތް 30 ދުވަހުގެ ތެރޭގައި ޕާކިން ބިލްޑިންތައް އަޅަން ބަޔަކާއި ހަވާލުކުރާނެ: ވަޒީރު

ކުރިޔަށް އޮތް 30 ދުވަހުގެ ތެރޭގައި މާލެ ސަރަޙައްދުގައި ޕާކިން ބިލްޑިންތައް އަޅާނެ ބަޔަކާއި ހަވާލުކުރާނެ ކަމަށް ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު ކެޕްޓަން މުޙައްމަދު އަމީން ވިދާޅުވެއްޖެއެވެ.

މިއަދުގެ މަޖިލީހުގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން ވަޒީރު ވިދާޅުވީ، ރައީސް ޑރ. މުޙައްމަދު މުޢިއްޒުގެ ރިޔާސީ ބަޔާނުގައި ވިދާޅުވި ގޮތަށް އެ ޕާކިން ބިލްޑިންގެ މަސައްކަތްތައް ކުރިޔަށްގެންދަނީ ޑިޒައިން، ބިލްޑް އެންޑް އޮޕަރޭޓް ކޮންސެޕްޓުގެ ދަށުން ކަމަށެވެ.

އަދި ވަކި މުއްދަތެއްގެ ތެރޭގައި އެ ބިލްޑިންތައް އަޅަން، ކުރިޔަށް އޮތް 30 ދުވަހުގެ ތެރޭގައި އެ މަސައްކަތްތައް ބަޔަކާއި ހަވާލުކުރާނެ ކަމަށް ވަޒީރު ވިދާޅުވިއެވެ.

ރައީސްގެ ރިޔާސީ ބަޔާނުގައި ވިދާޅުވެފައިވާ ފަދައިން ހަމަ ޕާކިން ބިލްޑިން އެޅުމުގެ ކަންތައް އަޅުގަނޑު މި ދެންނެވީ ޑިޒައިން ބިލްޑް އެންްޑް އޮޕަރޭޓް ކޮންސެޕްޓުގެ ދަށުން އަޅުގަނޑުމެން މި މަރުޙަލާތައް ކުރިޔަށް ގެންދަނީ. އިރާދަކުރެއްވިއްޔާ ކުރިޔަށް އޮތް 30 ދުވަހުގެ ތެރޭގައި މި ބިލްޑިން އަޅާނެ ފަރާތްތަކާއި ހަވާލުކުރެވި، މި އެޅުމުގައި ވެސް ވަކި މުއްދަތްތަކެއް ދީގެން ޕާކިން ބިލްޑިންގެ ކަންތައް ކުރިޔަށް ގެންދެވޭނެ

ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު ކެޕްޓަން މުޙައްމަދު އަމީން

ވަޒީރު އެފަދައިން ވިދާޅުވިއިރު، މި އަހަރުގެ ރިޔާސީ ބަޔާން އިއްވަމުން ރައީސް ވިދާޅުވީ، މާލޭގައި އެންމެ ބޮޑު އެއް މައްސަލަ ކަމަށްވާ ޕާކިން މައްސަލަ އަށް ހައްލެއް ހޯދުމުގެ ގޮތުން އިންޑިއާގެ ކޮންސެޝަނަލް ފައިނޭންސިން ނުވަތަ ކުޑަ އިންޓްރެސްޓުގައި ދޭ ލޯނުގެ އެހީގައި މާލޭގެ ހަތަރު ސަރަހައްދެއްގައި ތިމާވެއްޓާ ރަށްޓެހި އަދި އިއާދަކުރަނިވި ހަކަތައިން ޕަވަ ޖެނެރޭޓްކުރާ ޕާކިން ބިލްޑިންތަކެއް އެޅުމަށް ނިންމާފައިވާ ކަމަށެވެ.

އަދި އެ ޕްރޮޖެކްޓުގެ ޢަމަލީ މަސައްކަތް މި އަހަރު ފައްޓަވާނެ ކަމަށް ވެސް ރައީސް ވަނީ ވިދާޅުވެފައެވެ.

މާލޭގައި ޕާކިން ޖާގަ ތަނަވަސްކޮށްދިނުމަކީ ރައީސް މުއިއްޒުގެ ރިޔާސީ ވައުދެކެވެ. އޭގެ ތެރޭގައި ޕާކިން އިމާރާތް ނުވަތަ ޕާކިން ބިލްޑިން އެޅުން ވެސް ހިމެނެ އެވެ.