އިންތިޚާބުގެ އޮފިޝަލުންގެ ޓްރެއިނަރުން ތަމްރީނުކުރަން ފަށައިފި

މި އަހަރުގެ އޭޕްރީލްމަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ގާއިމުކުރާ ވޯޓުލާ މަރުކަޒުތަކުގައި ހަރަކާތްތެރިވާ އޮފިޝަލުން ތަމްރީނުކުރުމަށް ހަރަކާތްތެރިވާ ޓްރެއިނަރުންނަށް ބާއްވާ "ޓްރެއިނިންގ އޮފް ޓްރެއިނަރސް" (ޓީ.އޯ.ޓީ) ޕްރޮގުރާމު މިއަދު ފަށައިފިއެވެ.

މި ޕްރޮގްރާމު ކުރިއަށް ގެންދަނީ މާލޭގައި ހުންނަ ސެންޓަރ ފޯރ ހަޔަރ ސެކަންޑަރީ އެޑިއުކޭޝަން (ސީ.އެޗް.އެސް.އީ) އިމާރާތުގައެވެ. އިލެކްޝަނުން ބުނީ މި ތަމްރީނުތައް ޖަނަވަރީ 9 ވާ ހުކުރު ދުވަހުގެ ނިޔަލަށް ކުރިއަށްދާނޭކަމަށެވެ. މި ޓްރެއިނިންގ ޕްރޮގުރާމުގައި ރާއްޖޭގެ އެކި ސަރަހައްދުތަކުން ޖުމްލަ 95 ޓްރެއިނަރުންގެ އިތުރުން ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ ފަރާތުން ވެސް ބައިވެރިވެއެވެ.

ޓްރެއިނިންގ ޕްރޮގްރާމަށްފަހު މާލެއާއި، އަތޮޅުތަކުގައި ވޯޓުނަގާ އޮފިޝަލުން ތަމްރީނުކުރުމުގެ ޕްރޮގްރާމް މިމަހުގެ 11 ވަނަ ދުވަހުން ފެށިގެން ކުރިއަށްދާނެކަމަށްވެސް އީސީއިން ބުނެއެވެ.

ކޮމިޝަނުން ބުނީ މި ޕްރޮގްރާމުގެ ތެރެއިން ތަމްރީނުވާ އޮފިޝަލުން ރާއްޖެއާއި ރާއްޖެއިން ބޭރުގައި އިންތިޚާބު އޮންނަން ދުވަހު ވޯޓުލާ މަރުކަޒުތަކުގައި ހަރަކާތްތެރިވާ އޮފިޝަލުންގެ ތަމްރީނުތައް ކުރިއަށް ގެންދާނެ ކަމަށެވެ.

މި ޓްރެއިނިންގ ޕްރޮގްރާމްގެ މަޤުޞަދަކީ އިންތިޚާބު ކުރިއަށްދާއިރު މާލެއާއި، އަތޮޅުތަކުގައި އަދި ރާއްޖެއިން ބޭރުގައި ބެހެއްޓޭ ވޯޓުފޮށިތަކުގައި މަސައްކަތްކުރާ އޮފިޝަލުންނަށް، ޤާނޫނުތަކާއި ގަވާއިދުތަކުގައިވާ ގޮތުގެ މަތިން ވޯޓުނެގުމާއި ވޯޓުގުނުމުގެ މަސައްކަތްތައް ކުރިއަށް ގެންދާނެ ގޮތް ކިޔައިދިނުމާއި، އެފަރާތްތައް މިމަސައްކަތަށް ތައްޔާރުކުރުމެވެ.

ކުރިއަށްއޮތް ލޯކަލް ކައުންސިލް އިންތިހާބާއި އަންހެނުންގެ ކޮމިޓީ އިންތިހާބު ބޭއްވުމަށް ތާވަލްކޮށްފައިވަނީ އޭޕްރިލްމަހުގެ 4 ވަނަ ދުވަހުއެވެ.