އިންޑިއާ ކަނޑުގެ މައްސަލަތަކަށް ވަނުމުގެ ދައުރެއް ޗައިނާގެ ނޯންނާނެ: ރައީސް ނަޝީދު

އިންޑިއާ ކަނޑާއި ގުޅޭ ކަންކަމާއި ގުޅޭ މައްސަލަތަކުގެ ތެރެއަށް ވަނުމުގެ ދައުރު ޗައިނާއަށް ނެތް ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ވެސް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ސްރީލަންގައި ނެރޭ "މޯނިން" ނޫހަށް ދެއްވި ސުވާލާއި ޖަވާބުގެ އިންޓަވިއުއްގައި ނަޝީދު ވިދާޅުވީ އިންޑިއާ އާއި ރާއްޖެ މިހާރު ދުރުވެފައިވާ ކަމަށާ އޭގެ ސަބަބުން ރާއްޖެ އޮތީ ބަލިކަށިވެފައިކަމަށެވެ.

އިންޑިޔާ ކަނޑަށް ނިސްބަތްވާ ގައުމުތަކުގެ ކަންކަން ބަލައި މައްސަލަތައް ހައްލު ކުރުމަކީ އެ ގައުމުތަކުން ކުރަންޖެހޭ ކަމެއް. އެކަމުގައި ޗައިނާއަށް ވަކި ހާއްސަ ދައުރެއް ނޯންނާނެ. އަހަރެންނަށް އެނގޭ މިހެން ބުނުމުން ސިޔާސީ ބައެއް ފަރާތްތައް އަހަރެންގެ މި ވާހަކައަކީ ރަނގަޅު ވާހަކައެއް ކަމަށް ބަލައި ނުގަންނާނެކަން. އަޅުގަނޑަށް މައްސަލައެއްނެތް ނުގަތަސް. އެކަމަކު، އިންޑިޔާ ކަނޑުގެ ސަލާމަތާއި ރައްކާތެރި ކަމަކީ އިންޑިޔާ ކަނޑަށް ނިސްބަތްވާ ގައުމު ތަކުގެ ޒިންމާއެއް"

ކުރީގެ ރައީސް މުހައްމަދު ނަޝީދު

މިއާއެކު ނަޝީދު ވިދާޅުވީ، ރާއްޖެއާއި އިންޑިޔާއާއި ދެގައުމުގެ ބަދަހި ގުޅުމަށް ގިނަ އަހަރުތަކެއް ވެފައިވާ ކަމަށެވެ. އަދި އިންޑިޔާއާއި ދެކޮޅުވެރިވެ “އެހެން ބައެއް” ހޯދުމަކީ ބޭކާރު ކަމެއް ކަމަށާ އިންޑިޔާއިންވެސް ކުދި ގައުމުތަކަށް އެއްބާރުލުންދޭންޖެހޭނެ ކަމަށް އެމަނިކުފާނު ވިދާޅުވިއެވެ.

މިއާއެކު ނަޝީދު ވަނީ ޗައިނާއަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ވިދާޅުވީ، ޗައިނާއިން މިހާތަނަށްވެސް ކުރި ކަމަކީ ދިވެހި ރާއްޖޭގައި ކުރިއަށް ގެންދާ ޕްރޮޖެކްޓް ތަކުގެ އަގުތައް ބޮޑު ކުރުން ކަމަށާ، ސިނަމާލެ ބްރިޖު އެޅުމުގެ ނަމުގައި ޗައިނާއިން ދޫކޮށްފައި ލޯނުތައް އަނބުރާ ދައްކައި ނުނިމޭނެ ކަމަށާއި އެއީ ދަރަނި ދަންތުރައެއް ކަމަށެވެ.

"އަމިއްލަ ގައުމުގެ އެކްސްޕާޓުންނާއި, ތަކެއްޗާއި، ކަމަށް ބޭނުންވާ ފައިސާ އެތެރެކޮށް ބްރިޖެއް ވެސް އަޅައިފި. އެކަމަކު އޭގެއިން ގަސްދުގައި އެހެނިހެން ވިޔަފާރިތައް އެބަ ފެއިލްވޭ," ޗައިނާއަށް ފާޑުވިދާޅުވެ ނަޝީދު ވިދާޅުވެފައި ވެއެވެ.

ނަޝީދު ވިދާޅުވި ގޮތުގައި ރާއްޖެއާއި އިންޑިޔާއާއި އެކީގައި އުޅުން ނޫން ގޮތެއް ނެތެވެ. އަދި އިންޑިޔާއާއެކު މަސައްކަތް ކުރަން ދަސްކުރަން ރާއްޖެއިން ޖެހޭ ކަމަށާ ދެ ގައުމަކީ ހުރިހާ ގޮތަކުންވެސް ގުޅިލާމެހިފައިވާ ދެ ގައުމު ކަމަށާ އެކުގައި މަސައްކަތް ކުރި ވަރަކަށް ދެގައުމަށްވެސްވާ ފައިދާ ބޮޑުވާނެ ކަމަށެވެ.