ރައީސް މައުމޫންގެ މައްޗަށް ޓެރަރިޒަމްގެ ތުހުމަތު ޖާބިރު ކުރައްވައިފި

ކުރީގެ ރައީސް މައުމޫން އަބްދުލްގައްޔޫމްގެ މައްޗަށް ޓެރަރިޒަމްގެ ތުހުމަތު، ޑީއާރްޕީގެ ލީޑަރ އަދި ކާށިދޫ ދާއިރާގެ މެންބަރު އަބްދުﷲ ޖާބިރު ކުރައްވައިފިއެވެ.

ޖާބިރު މިހެން ވިދާޅުވީ ޓެރަރިޒަމް މަނާކުރުމުގެ ބިލަށް ރައްޔިތުންގެ މަޖިލީހުގެ މިއަދުގެ ޖަލްސާގައި ބަހުސްކުރައްވަމުންނެވެ.

އެބޭފުޅާ ވިދާޅުވީ ރައީސުލްޖުމްހޫރިއްޔާއަކު ވެސް މީހަކު އަތުން ލާރި ނަގައިގެން ހެއްކެއް ނެތޭ ކިޔައިގެން ހުންނަންޏާ އެމައްސަލަ ބެލޭނެކަމަށެވެ. އަދި އެއަށް ކިޔާނީ ޓެކުމާއި ފޭރުމާއި ވައްކަންކުރުންކަމަށް ޖާބިރު ވަނީ ވިދާޅުވެފައެވެ.

" އެއީ ޓެރަރިޒަމްގެ ހަރަކާތެއް. ނުލާހިކު ބުރަ މަސައްކަތް ކޮށްގެން މީހަކު ލާރި ހޯދީމަ އެލާރި ފޭރިގަނެގެން ވެރިކަމަށް ގެނެވުނީމާ އެމީހާއަށް މަކަރާއި ހީލަތް ހަދައި ދޯކާދީ، މިއަށް ކިޔަނީ ޓެރަރިޒަމް." ޖާބިރު ވިދާޅުވިއެވެ.

ޖާބިރު އިތުރަށް ވަނީ ދިވެހިރާއްޖޭގެ ކުރީގެ ރައީސުންނަށް އިތުބާރުނުކުރައްވާ ކަމަށް ވިދާޅުވެ، ނަމަވެސް މިހާރުގެ ރައީސްއަށް އިތުބާރު ކުރާކަމަށް ވިދާޅުވެފައެވެ.