މިދިޔަ ހަފްތާގައި މާލެ ސަރަހައްދުގައި 41 އެކްސިޑެންޓު

މާލެއާއި، ސިނަމާލެ ބްރިޖް އަދި ހައިވޭ ހިމެނޭ ސަރަޙައްދުގައި މިދިޔަ ހަފްތާގެ ތެރޭގައި ވެސް ޖުމްލަ 41 އެކްސިޑެންޓެއް ހިނގާފައިވާކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.

ފުލުހުން އާންމުކުރި މައުލޫމާތަށް ބަލާއިރު، މިދިޔަ ހަފްތާގެ ތެރޭގައި އެންމެ ގިނަ އެކްސިޑެންޓު ހިނގާފައިވަނީ ފެބުރުއަރީ މަހުގެ 21 ވަނަ ދުވަހުއެވެ. އެ ދުވަހު އެކަނިވެސް 11 އެކްސިޑެންޓު ވަނީ ހިނގާފައެވެ. މީގެ އިތުރުން 15 ފެބުރުއަރީގައި 8 އެކްސިޑެންޓު، މަހުގެ 16 ވަނަ ދުވަހު 6 އެކްސިޑެންޓު، 17 ވަނަ ދުވަހު ވެސް 6 އެކްސިޑެންޓު، 18 ވަނަ ދުވަހު 2، 19 ވަނަ ދުވަހު 6 އަދި 20 ވަނަ ދުވަހު 2 އެކްސިޑެންޓު ވަނީ ހިނގާފައެވެ.

މި އެކްސިޑެންޓުތަކުގެ ތަފްސީލަށް ބަލާއިރު، ގިނަ ހާދިސާތައް ހިނގާފައިވަނީ ދުވާލުގެ ވަގުތުތަކުގައެވެ. އެގޮތުން 33 އެކްސިޑެންޓެއް (80 އިންސައްތަ) ދުވާލު ހިނގާފައިވާއިރު، ރޭގަނޑުގެ ވަގުތުތަކުގައި ހިނގާފައިވަނީ 8 އެކްސިޑެންޓެވެ. އެއީ ޖުމްލަ ހާދިސާތަކުގެ 20 އިންސައްތައެވެ. މި ހާދިސާތަކުގައި ޖުމްލަ 45 އުޅަނދަކަށް އެކިވަރުގެ ގެއްލުން ލިބިފައިވާއިރު، 11 މީހަކަށް ވަނީ އެކިވަރުގެ އަނިޔާވެފައެވެ.

ފުލުހުން ހާމަކުރި ގޮތުގައި، މި ހަފްތާގައި ހިނގި އެކްސިޑެންޓުތަކުގެ ތެރޭގައި ހިމެނެނީ ކުދި 38 އެކްސިޑެންޓާއި ސީރިއަސް 3 އެކްސިޑެންޓެވެ.

މި ހިސާބުތަކުގައި ވާގޮތުން، އެންމެ ގިނަ ހާދިސާ ހިނގާފައިވަނީ މާލޭގެ މަގުތަކުގައެވެ. އެގޮތުން، މާލޭގައި 36 އެކްސިޑެންޓު ހިނގާފައިވާއިރު، ސިނަމާލެ ބްރިޖާއި ހައިވޭގައި ހިނގާފައިވަނީ 12 އެކްސިޑެންޓެވެ.

މި އެކްސިޑެންޓުތަކުގައި އެންމެ ގިނައިން ހިމެނެނީ ސައިކަލުތަކެވެ. އެގޮތުން ސައިކަލަކާއި ކާރެއް ޖެހިގެން 9 އެކްސިދެންޓު އަދި ސައިކަލާއި ސައިކަލެއް ޖެހިގެން 8 އެކްސިޑެންޓު ވަނީ ހިނގާފައެވެ.

މިމަހުގެ ދެވަނަ ހަފްތާގައިވެސް 43 އެކްސިޑެންޓެއް ހިނގާފައިވެއެވެ. އެހެންކަމިން މިދިޔަ ހަފްތާގައި ހިނގާފައިވަނީ މިމަހުގެ ދެވަނަ ހަފްތާއާއި އަޅާބަލާއިރު ދަށް އަދަދެއްގެ އެކްސިޑެންޓުތަކެކެވެ.

މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކަށް ފުރިހަމައަށް ބޯލަނބައި، ދުއްވާއިރު ސަމާލުކަން އިތުރުކުރުމަށް ހުރިހާ ފަރާތްތަކަށް ވެސް ފުލުހުން ވަނީ އިލްތިމާސްކޮށްފައެވެ.