ދިއްލީގައި އެއްޗެއް ގޮއްވާލުން: ކާރުގެ ވެރިފަރާތް ހައްޔަރުކޮށްފި

އިންޑިއާގެ ނިއުދިއްލީގައި އިއްޔެ ދިން ނުރައްކާތެރި ބޮމުގެ ހަމަލާ އަމާޒުކުރި ކާރުގެ ވެރިފަރާތް ހައްޔަރުކޮށްފިކަމަށް އެޤައުމުގެ މީޑިއާތަކުން ބުނެފިއެވެ.

ވެރިރަށް ދިއްލީގެ ރެޑް ފޯޓުގައި ދިން މި ހަމަލާގައި 13 މީހަކު މަރުވެ 20 މީހަކަށް ސީރިއަސް އަނިޔާތަކެއް ލިބިފައިވާކަމަށް އިންޑިއާގެ އޮފިޝަލުން ވަނީ ބުނެފައެވެ. މި ހާދިސާއާ ގުޅޭގޮތުން އިންޑިއާގެ ބައެއް ބޮޑެތި މީޑިއާތަކުން ބުނެފައިވަނީ، ގޮއްވާލި އުޅަނދުގެ ވެރިފަރާތަކީ ޖައްމޫ ކަޝްމީރުގެ ޕުލްވަމާއަށް ނިސްބަތްވާ މީހެކެވެ.

މީޑިއާތަކުން ބުނެފައިވަނީ އެ ކާރަކީ ނިރުބަވެރި ޖަމާޢަތުގެ މެންބަރެއް ކަމަށް ބެލެވޭ، ޕަލްވާމާގެ ޑޮކްޓަރެއް ކަމަށްވާ ޑރ ޢުމަރު މުޙައްމަދުގެ ކާރެއް ކަމަށެވެ. ނަމަވެސަް ކާރު ގޮއްވާލާފައި ވަނީ އެ ޖަމާޢަތަށް ނިސްބަތްވާ ދެ މީހުން ކަމަށްވާ ޑރ މުޒައްމިލް ޝަކީލާއި ޑރ އާދިލް ރަތާއެވެ. ކާރު ގޮއްވާލިއިރު އޭގައި ވަރަށް ގިނަ އަދަދެއްގެ ގޮވާތަކެތި ހުރިކަމަށް މީޑިއާތަކުން ވަނީ ރިޕޯޓްކޮށްފައެވެ.

ބައެއް މީޑިއާތަކުން ބުނެފައިވަނީ ގޮތުގައި ގޮއްވާލި ކާރަކީ އެތައް ފަހަރެއްގެ މަތިން ވިއްކާފައިވާ ކާރެކެވެ.

ދިއްލީގައި ދިން އެ ހަމަލާއާ ގުޅިގެން މުޅި މުޅި އިންޑިއާއަށް ސިހުން ގެނުވިއިރު، ސަރުކާރުން ބުނެފައިވަނީ އެ ހަމަލާދިން މީހުން ހޯދައި ހައްގު އަދަބު ދޭނޭކަމަށެވެ. މި ހަމަލާއާއެކު ދިއްލީގެ އިތުރުން ބައެއް ސިޓީތައް ވަނީ އެލާޓަށް ގެނެސްފައެވެ. މިގޮތުން ހަމަލާދިން ސަރަހައްދުގެ މާކެޓްތައް މިއަދުވެސް ބަންދެވެ. އަދި ވަރަށްގިނަ ފުލުހުންވެސް ދަނީ މަގުތަކުގައި ފޯރިމަރަމުންނެވެ. ހާއްސަކޮށް ބޮޑެތި ސިޓީތަކުގައި ދީނީ އަޅުކަންތައް ކުރުމަށް ހާއްސަކޮށްފައި ހުންނަ ތަންތަނުގެ ސަލާމަތީ ފިޔަވަޅުތައް ވަނީ ވަރަށް ވަރުގަދަކޮށްފައެވެ.