އާރުޑީސީން ގއ.ވިލިނގިލީ ފުލުހުންގެ އެކޮމަޑޭޝަން ޔުނިޓުގެ ބިންގާ އަޅައިފި

ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ހުވަދު އަތޮޅު ވިލިނގިލީ ފުލުހުންގެ މަރުކަޒުގެ އެކޮމޮޑޭޝަން ޔުނިޓްގެ ބިންގާ އަޅައިފިއެވެ.

މިކަމަށްޓަކައި ވިލިނގިލީގައި ރަސްމިއްޔާތެއް ބޭއްވިއިރު، މި ރަސްމިއްޔާތުގައި އާރުޑީސީގެ ޑެޕިއުޓީ މެނޭޖިންގ ޑިރެކްޓަރ މުޙައްމަދު އަސްބާހު އަލީ ނަސީރު އާއި ކޮމިޝަނަރ އޮފް ޕޮލިސް ޢަލީ ޝުޖާޢު ބައިވެރިވެ ވަޑައިގެންނެވިއެވެ. މީގެ އިތުރުން ފުލުހުންގެ އިސް ބައެއް އޮފިސަރުންވެސް ބައިވެރިވެވަޑައިގެންނެވިއެވެ. ސަރުކާރުން ވަނީ ހުވަދު އަތޮޅުގެ 5 ރަށެއްގރ ފުލުހުންގެ މަރުކަޒުތަކާއި ޕޯސްޓްތައް އިމާރާތްކުރުމުގެ މަސައްކަތް އާރުޑިސީއާ ހަވާލުކޮށްފައެވެ.

ހޯމްލޭންޑު ސެކިއުރިޓީ މިނިސްޓްރީން ވަނީ، މީހުން ދިރިއުޅޭ 70 އަށްވުރެ ގިނަ ރަށުގައި ފުލުހުންގެ މަރުކަޒުތައް އެޅުމަށް ނިންމާފައެވެ. މީގެ ތެރެއިން 20 ތަނެއް އިމާރާތްކުރުމަށް ދީފައިވަނީ އާރުޑީސީއަށެވެ. އާރުޑީސީން އަންނަނީ ރާއްޖޭގެ އުމްރާނީ ތަރައްޤީގެ ގިނަ މަޝްރޫޢުތަކެއް ހިންގަމުންނެވެ. މީގެ ތެރޭގައި ރަށްރަށުގެ މަގުތައް ހެދުމުގެ އިތުރުން ކުޅިވަރުގެ ވަސީލަތްތައް ޤާއިމްކުރުމަށް ހިންގާ މަޝްޜޫޢުތައް ފާހަގަކޮށްލެވެއެވެ.

ސަރުކާރުން ވަނީ ކުޅިވަރުގެ 77 މަޝްރޫއުގެ ތެރެއިން 23 ރަށެއްގައި ކުޅިވަރުގެ ވަސީލަތްތައް ޤާއިމުކުރުމަށް މިދިޔަ މާޗްމަހުގެ  މަހުގެ 30 ވަނަ ދުވަހު އާރުޑީސީއާ ހަވާލުކޮށްފައެވެ. އާރުޑީސީއާ ހަވާލުކުރެވުނު މަޝްރޫއުތަކުގެ ތެރޭގައި އައުޓްޑޯ ޖިމް، ފިޓްނަސް އެންޑް ރެކްރިއޭޝަން ސެންޓަރުތައް، ފުޓްސަލް ދަނޑުތައް، ފުޓްބޯޅަ ދަނޑުތައް، ބެޑްމިންޓަން ކޯޓު އަދި ވޮލީބޯޅަ ކޯޓުތައް ތަރައްޤީ ކުރުމުގެ މަސައްކަތް ހިމެނެއެވެ.