ހަބީބުގެ ދައުރު ހަމަވާތީ އީސީގެ މެމްބަރުކަމަށް އެސްޖީ ހަސަންގެ ނަން ފޮނުވައިފި

އިލެކްސަން ކޮމިޝަންގެ ނައިބުރައީސްކަން ކުރައްވަމުންގެންދަވާ އިސްމާއިލް ހަބީބުގެ ދައުރު އަންނަ މަހުގެ 13 ވަނަ ދުވަހަށް ހަމަވާތީވެ، އޭނާގެ ބަދަލުގައި އެކޮމިޝަންގެ ސެކްރެޓަރީ ޖެނެރަލް ،އެސްޖީ ހަސަން ޒަކަރިއްޔާގެ ނަން ރައްޔިތުންގެ މަޖިލީހަށް ފޮނުވައިވައިފި އެވެ.

އީސީގެ ނައިބުރައީސް ހަބީބުގެ މުއްދަތު ހަމަވާތީވެ ރައީސް އޮފީހުން އީސީގެ މެމްބަރުކަމަށް އިއުލާނުކުރުމުން ޝައުގުވެރިކަން ފާޅުކުރި މީހުންގެތެރެއިން ރައީސުލްޖުމުހުރިއްޔާ ފޮނުއްވި ނަންފުޅެއްގެ ގޮތުގައި މިއަދު މަޖިލިހުގެ ރިޔާސަތުން އިޢުލާން ކުރެއްވީ 2021 ވަނަ އަހަރުން ފެށިގެން އެ ކޮމިޝަންގެ އެސްޖީގެ މަޤާމު އަދާކުރައްވަމުން ގެންދަވާ ހަސަން ޒަކަރިއްޔާގެ ނަމެވެ.

މިއަދު ކުރިއަށް ދިޔަ މަޖިލިހުގެ ޖަލްސާގައި ވަނީ އިސީގެ މެމްބަރުކަމަށް އައްޔަން ކުރުމަށް ރައީސުލްޖުމުހޫރިއްޔާ ފޮނުއްވި ނަންފުޅެއްގެ ގޮތުގައި ހަސަން ޒަކަރިއްޔާގެ ނަން އިއްވާ އެމައްސަލަ  ދިރާސާކުރުމަށް މަޖިލހުގެ މިނިވަން މުއައްސަސާތަކާއި ބެހޭ ކޮމެޓީއަށް ފޮނުވުނުކަން ރިޔާސަތުން އިއުލާނު ކުރައްވާފައެވެ.

އަންނަ މަހުގެ 13 ވަނަ ދުވަހަށް ނައިބުރައީސް ހަބީބުގެ ދަޢުރު ހަމަވާއިރު އީސީން މިހާރު ތައްޔާރުވަމުން އަންނަނީ އަންނަ މަހު 17 ގައި ބޭއްވުމަށް ހަމަޖެހިފައިވާ 20 ވަނަ ރައްޔިތުން މަޖިލުހުގެ އިންތިހާބަށެވެ.

ނައިބު ރައީސް އިސްމާއިލް ހަބީބު މިހާރު އީސީގައި އަދާކުރައްވަމުން ގެންދަވަނީ އޭނާގެ ދެ ވަނަ ދަޢުރުކަމުން، ޤަނޫނު ބުނާގޮތުން ދެން އޭނާއަކަށް އީސީގެ މެމްބަރުކަމަކަށް ކުރިމައްޗެއް ނުލެވޭނެއެވެ.