ގާސިމްއާއި އަލީ ވަހީދުގެ އުދާސްތައް ވަޓްސްއެފް ގްރޫޕަށް ބަންޑުންކޮށްލައިފި

ޖުމްހޫރީ ޕާޓީގެ ލީޑަރ ގާާސިމް އިބްރާހިމާއި އެޕާޓީގެ ރައީސް އަލީ ވަހީދުގެ ހިތުގެ އުދާސްތައް، އެޕާޓީގެ ކައުންސިލް މެންބަރުން ތިއްބަވާ ވަޓްސްއެޕް ގްރޫޕަށް ބަންޑުންކޮށްލައްވައިފިއެވެ.

އެގޮތުން ގާސިމް ވިދާޅުވި ދިގު މެސެޖަށް އަލީ ވަހީދު ފޮނުއްވެވި ވަރުގަދަ ރައްދުގެ ފޮޓޯތައް ސޯޝަލް މީޑިޔާގައި ދަނީ ދައުރުވަމުންނެވެ. މި މެސެޖްތަކަކީ ސައްހަ މެސެޖްތަކެއްކަން ޖޭޕީގެ ތަރުޖަމާނު، އަލީ ސޯލިހުވެސް ވަނީ ކަށަވަރުކޮށްދެއްވާފައެވެ.

ޖޭޕީގެ ލީޑަރ ގާސިމް އިބްރާހިމް ވަޓްސްއެޕް ގްރޫޕަށް ފުރަތަމަ ފޮނުވި މެސެޖްގައި ވިދާޅުވީ ޖޭޕީ މީހުން ކުރިމަތިލާފައިވާ މަޖިލިސް ގޮނޑިތަކަށް އެބޭފުޅުން ހޮއްވޭތޯ ހުރިހާ ޖޭޕީގެ މެމްބަރުން ގަދަ އަޅާ މަސައްކަތް ކޮށްދެއްވުމަށް އެދިވަޑައިގަންނަވާ ކަމަށެވެ. އެއީ ޕާޓީގެ ފަރާތުން ވަޒީފާތަކުގައި ތިއްބެވި އެންމެހާ ބޭފުޅުން ވެސް ހިމެނޭ ގޮތަށްކަމަށް ގާސިމް ފާހަަގަކުރެއްވިއެވެ.

އެބޭފުޅާ އިތުރަށް ވިދާޅުވީ ޖުމްހޫރީ ޕާޓީގެ މެމްބަރުން އެ މަގާމުގައި ދެމިތިއްބެވުމުގެ ބޭނުމުގައި އެޕާޓީން ވަކިވުމުގެ ކުރިން ފުރަތަމަ ކުރައްވަން ވީ ކަމަކީ އެ މަގާމަކުން އިސްތިއުފާ ދެއްވުން ނޫންތޯކަމަށެވެ.

"އެއީ ނޫންތޯ ފިރިހެން ކަމަކީ ނުވަތަ އަންހެން ކަމަކީ ނުވަތަ އިންސާނިއްޔަތު ކަމަކީ،" ގާސިމް ސުވާލު އުފެއްދެވިއެވެ.

މި މެސެޖަށް ރައްދު ދެއްވަމުން އަލީ ވަހީދު ވަނީ ސަރުކާރު ވަޒީފާއަށް ދިޔަ ޖުމްހުރީ ޕާޓީގެ ކެނޑިޑޭޓުން އަބަދު ބަދުނާމު ނުކުރެއްވުމަށް އެދިވަޑައިގެންނަވާފައެވެ. އަދި

ޖޭޕީއިން ދިން ފުރުސަތާއި ކުރި އިތުބާރު ހަނދާން ނެތިގެން ނުދާކަމަށާއި އަނިޔާވެރިން ކުރި އަނިޔާވެސް ހަނދާނެއް ނުނެތޭކަމަށް ވިދާޅުވެ، ނުސީދާގޮތުން ގާސިމަށް ފާޑުވިދާޅުވެފައެވެ.

ފާހަގަކޮށްލެވޭ ގޮތުގައި ޕީޕީއެމްގެ ކެނޑިޑޭޓުންނަށް ތާއިދުކުރުމާާއި މެދު ޖޭޕީގެ އިސްވެރިންގެ މެދުގައި ވަނީ ބޮޑެތި ޚިޔާލު ތަފާތުވުންތަކެއް އުފެދިފައެވެ. އެގޮތުން އެންވަޔަރަމެންޓް މިނިސްޓަރ ޑރ.ހުސައިން ރަޝީދު، ޓުއަރިޒަމް މިނިސްޓަރ އަލީ ވަހީދު އަދި ޓްރާންސްޕޯޓް މިނިސްޓަރ އައިޝަތު ނަހުލާ ވަނީ ޕީޕީއެމްގެ ކެނޑިޑޭޓުންނަށް ތާއިދުނުކުރައްވާނެ ކަމަށް ވިދާޅުވެފައެވެ.