އެމްޑީޕީ ވެރިކަމުގައި، އެމްޑީއެން ރިޕޯޓް ހެދި މީހުން ތިބީ ބޮޑު މުސާރަ ލިބޭ ވަޒީފާގައި: ރައީސް މުޢިއްޒު

ނިމިދިޔަ އެމްޑީޕީ ވެރިކަމުގައި، ދީނަށް ފުރައްސާރަކޮށް އެމްޑީއެން ޖަމިއްޔާއިން ނެރުނު ''ޕްރީލިމިނަރީ އެސެސްމަންޓް އޮފް ރެޑިކަލައިޒޭޝަން އިން މޯލްޑިވްސްގެ'' ރިޕޯޓް ހެދި މީހުން ތިބީ ބޮޑު މުސާރަ ލިބޭ ވަޒީފާގައި ކަމަށާ އެމްޑީޕީ އަކީ އެމްޑީއެން ފިކުރުގެ ޕާޓިއެއް ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

ރޭ ނ. ހޮޅުދޫ ދާއިރާއަށް ޕީޕީއެމް/ޕީއެންސީގެ ޓިކެޓުގައި ވާދަކުރައްވާ ކެންޑިޑޭޓުގެ ކެމްޕޭނު ޖަގަހަ ހުޅުވުމަށް މާލޭގައި ބޭއްވި ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ބަރަކާތްތެރި ރަމަޟާން މަހަކީ ވަކިން ޚާއްސަކޮށް ދީނީ ކަންކަމަށް ސަމާލުކަންދީ އެކަންކަން ހަނދާން ކުރަންޖެހޭ މަހެއް ކަމަށެވެ.

އެގޮތުން ހަނދާން ކުރާއިރު ނިމިދިޔަ އެމްޑީޕީ ސަރުކާރުގައި ދީނީ ކަންކަމަށް ވެގެން ދިޔަ ގޮތަށް ވިސްނާލަންޖެހޭ ކަމަށް އެމަނިކުފާނު ވިދާޅުވިއެވެ.

އަޅުގަނޑުމެން ހަނދާނުން ކައްސާލައިގެން ނުވާނެ އެމްޑީއެން ރިޕޯޓްގެ ކަންތައް. ކީރިތި ރަސޫލާއަށް އަދި މާތް الله ސުބުޙާނަހޫ ވަތަޢާލާއަށްވެސް ފުރައްސާރަކޮށް ތައްޔާރުކުރި ރިޕޯޓެއް، އެ ހެދި ފަރާތްތައް، އެ ފަސް އަހަރު ނިމިގެން ދިޔައީ އަޅުގަނޑުމެންގެ ފައިސާއިން މުސާރަ ދީގެން. ޖަމިއްޔާ އުވާލަން ރައްޔިތުން ޕްރެޝަރ ކުރީމަ، ނަމެއްގައި ޖަމިއްޔާ އުވާލީ، އިފެކްޓްވިލީ ހިނގަމުން ދިޔައީ މިހިރީ ހަނދާނުން ކައްސަލައިގެން ދިޔަޔަސް ހަގީގަތް

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު

ރައީސް ވިދާޅުވީ އެމްޑީޕީ ވެރިކަމުގައި ހިނގައިދޔަ އެކަންކަން ހަނދާނުން ކައްސާލައިގެން ދިޔަ ނަމަވެސް އެއީ ހަގީގަތެއް ކަމަށެވެ. އަދި އެމްޑިޕީ އަކީ އެމްޑީއެން ފިކުރުގެ ބައެއް ކަމަށާ، ކުރިއަށް އޮތް ފަސް އަހަރަށް މަޖިލިސް މެޖޯރިޓީ ބޭނުންވަނީވެސް އެ ފިކުރު ކުރިއަރުވަން ކަމަށް އެމަނިކުފާނު ވަނީ ތުހުމަތު ކުރައްވާފައެވެ.

އެ ފިކުރުގައި (އެމްޑީއެން ފިކުރުގައި) ތިބި ބަޔަކަށް، އެހެންވެ ކަންނޭގެ އެހާވަރަކުން އެ ބޭނުންވާނީ އަނެއްކާވެސް މަޖިލީހުގެ ބާރު އަނެއްކާވެސް ފަސް އަހަރަށް އިތުރުކުރަން. އެ ފިކުރުގައި ތިބި ބަޔަކަށް އަޅުގަނޑުމެން ޖާގަ ދޭން ޖެހޭ ވިސްނުމެއް ނިކަން ދައްކަވަން އެބަޖެހޭ. ދީން ދެކެ ލޯބިވާ އަޅުގަނޑުމެންގެ ލޮބުވެތި ދިވެހި ރައްޔިތުން ޖަވާބުދޭން ޖެހޭ ސުވާލެއް މިއީ. އެމްޑިޕީ ވިޔަސް އެހެން ޕާޓީއެއްގެ ވިޔަސް ވިސްނާލަންޖެހޭ. އެމްޑީއެންގެ ރިޕޯޓްހެދި މީހުންނަށް އަޅުގަނޑުމެންގެ ފައިސާއިން ފަސް އަހަރުވަނދެން ފައިސާދީ މުސާރަދީ، ބޮޑެތި މަގާމްތަކުގައި ބޭތިއްބި ބަޔަކު އަނެއްކާވެސް އެ މަޖިލީހުގެ ގޮނޑިތަކަށް ފަސް އަހަރަށް ދޭންވީ ސަބަބެއް އޮންނަންވާނެ. އަޅުގަނޑަކަށް ނުފެނޭ އެއްވެސް ސަބަބެއް.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު

ރައީސް އިތުރަށް ވިދާޅުވީ ދިވެހިންނަކީ އިސްލާމްދީން ދެކެ ލޯބިވާ، އިސްލާމްދީނަށް ނަސްރުދޭ ބައެއް ކަމަށެވެ. އަދި އިސްލާމްދީނުގެ ރުކުނެއް ކަމުގައިވާ ފަރުޟު ފަސް ނަމާދު އަދާކުރުމަށް އެމަނިކުފާނު ބާރު އަޅުއްވާތީ އިދިކޮޅު ފަރާތްތަކުން ފުރައްސާރަ ކުރާ ކަމަށާ އެހެން ނަމަވެސް އެވާހަކަ ދައްކަވަން އެމަނިކުފާނު ފަޚުރުވެރިވެ ވަޑައިގަންނަވާ ކަމަށް ރައީސް މުއިއްޒު ވިދާޅުވިއެވެ.

އެހެންވީމާ މިސްރާބު ކައްސާލަިއގެން ގޮސް، އިގްތިސޯދު އަނދަވަޅަކަށް ވެއްޓި، ދީން ހަލާކުވެގެން ގޮސް، އަޅުގަނޑުމެންގެ މިނިވަންކަން އޮޔާ ގޮއްސަ އޮއްވާ ދިވެހިންގެ ރާއްޖެއަށް އަޅުގަނޑުމެން ފަށާފައި މިއޮތް މަސައްކަތް ފުރިހަމަވާން އޮތީ، އެ މަސައްކަތް މަޖިލީހަށްވެސް ގެންގޮސްދީގެން.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒު

ރައީސުލްޖުމްހޫރިއްޔާ މިފަދައިން ވިދާޅުވެފައި ވާއިރު، ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައި، އިސްލާމްދީނަށާއި، ރަސޫލާ (ޞޢވ) އަށް ފުރައްސާރަކޮށް އެމްޑީއެން އިން ރިޕޯޓް ނެރުމާއި ގުޅިގެން އެ ޖަމިއްޔާ އުވާލި ނަމަވެސް އޭގެ ފަހުންވެސް އެ ޖަމިއްޔާގެ ނަމުގައި ބަޔާންތައް ނެރެފައި ވެއެވެ. ދީނަށް ފުރައްސާކޮށް ރިޕޯޓް ލިޔުނު ފަރާތްތަކަށް ރައީސް އޮފީހުންނާއި ސަރުކާރުގެ މަތީ މަގާމްތައް ދީފައިވާ ކަން ފާހަގަ ކޮށްލަންޖެހެއެވެ.