ރާއްޖޭގެ ދާޚިލީ ކަންކަމާއި ޑރ.ޝަހީމް ބެހޭކަމަށްބުނެ މަޖިލީހަށް މައްސަލައެއް!

އޯއައިސީގެ ސެކްރެޓަރީ ޖެނެރަލްގެ އެޑްވައިޒަރގެ މަގާމުގައި ހުންނަވައިގެން ދިވެހިރާއްޖޭގެ ދާޚިލީ ކަންކަމާއި މަޝްހޫރު ދީނީ އިލްމުވެރިޔާ ޑރ.މުހައްމަދު ޝަހީމް އަލީ ސައީދު ބެހެމުންދާކަމަށްބުނެ ރައްޔިތުންގެ މަޖިލީހަށް މައްސަލައެއް ހުށައަޅައިފިއެވެ.

މި މައްސަލަ ހުށައަޅުއްވާފައި ވަނީ ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު އަދި އެމްޑީޕީގެ ޕީޖީ ގްރޫޕްގެ ލީޑަރ އަލީ އާޒިމެވެ.

ރައްޔިތުންގެ މަޖިލީހުގެ ރައީސަށް އެޑްރެސްކޮށް ފޮނުވި ސިޓީއެއްގައި އާޒިމް ވިދާޅުވީ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ސެކްރެޓަރީ ޖެނެރަލްގެ އެޑްވައިޒަރަކަށް ހުންނަވައިގެން ޝަހީމް ރާއްޖޭގެ ދާޚިލީ ކަންކަމަށް ފާޑު ވިދާޅުވަމުން ގެންދަވަނީ އޯއައިސީގެ ސެކްރެޓަރީ ޖެނެރަލް ވިދާޅުވެގެންތޯ ބައްލަވައިދެއްވުމަށް އެދިވަޑައިގަންނަވާކަމަށެވެ.

މި މައްސަލަ ބެލުމަށް މަޖިލީހުގެ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީއަށް މިހާރުވަނީ ފޮނުވާފައެވެ.

ރާއްޖޭގެ ދާޚިލީ ކަންކަމާއި ބެހޭކަމަށް ކުރެއްވި ތުހުމަތުތަކަށް ރައްދު ދެއްވަމުން ޑރ.ޝަހީމް ވިދާޅުވީ ކޮންމެ މަގާމެއްގައި ހުރި މީހަކަށް ވެސް އެމީހެއްގެ އަމިއްލަ ހައިސިއްޔަތުން ވާހަކަ ދެއްކޭނެ ކަމަށާއި އެމްޑީއެންގެ ރިޕޯޓް ކުށްވެރިކުރުމަކީ ކޮންމެ ދިވެހި ރައްޔިތަކު ކުރަން ޖެހޭ ކަމެއް ކަމަށެވެ.

"މަޖިލީހުން މީހުންނަށް ބިރުދައްކަން އުޅޭނެކަމެއް ނެތް"، ޝަހީމް ވިދާޅުވިއެވެ.