ތިލަދުންމަތި ފަޚުރުވެރިވާފަދަ މެންބަރަކަށް ވާނަން - ޘަގީފް

ކުރިއަށް އޮތް މަޖިލިސް އިންތިޚާބުގައި ވައިކަރަދޫ ދާއިރާގެ މަޖިލިސް މެެންބަރކަމަށް ހޮވިއްޖެނަމަ ތިލަދުންމަތި ފަޚުރުވެރިވާފަދަ މެންބަރަކަށް ވާނެކަމަށް އެދާއިރާއަށް އަދާލަތު ޕާޓީގެ ޓިކެޓްގައި ވާދަކުރައްވާ ހުސައިން ޘަގީފް އިހުސާން ވިދާޅުވެއްެޖެއެވެ.

ޘަގީފް މިހެން ވިދާޅުވީ ޕީއެސްއެމްއިން ބޭއްވި މަޖިލިސް ބަހުސްގައި ވާހަކަފުޅު ދައްކަވަމުންނެވެ.

ޘަގީފް ވިދާޅުވީ މަޖްލިސް އިންތިހާބު ކާމިޔާބު ކުރެވިއްޖެނަމަ މުޅި ތިލަދުންމަތި ފަޚުރުވެރިވާނެ ފަދަ ގޮނޑިއަކަށް ވައިކަރަދޫ ދާއިރާގެ ގޮނޑި ހަދައިދޭނެކަމަށާއި، މުޅި ތިލަދުންމަތި ފަޚުރުވެރިވާނޭ ފަދަ މެންބަރަކަށް ވެވަޑައިގަންނަވާނެކަމަށެވެ.

އެބޭފުޅާ ވަނީ ރާއްޖޭގެ އެހެން ސަރަހައްދުތަކާއި އަޅާބަލާއިރު ތިލަދުންމައްޗަކީ ދައުލަތުން ވަރަށް ބޮޑަށް އިހުމާލުވެފައިވާ ސަރަހައްދެއް ކަމަށް ފާހަގަކުރައްވައި ތިލަދުންމަތީގެ ރައްޔިތުން މާލެއަށް ހިޖުރަކޮށްގެން މާލޭގައި ދިރިއުޅެނީ ވަރަށް ދަތި ހާލުގައި ކަމަށް ވިދާޅުވެފައެވެ.

މިއަދުގެ ބަހުސްގައި ޘަގީފް ވަނީ އަތޮޅު ކައުންސިލްގެ ރައީސްކަމުގެ ދައުރުގައި ކުރެއްވި މަސައްކަތާއި މެދު އަލިއަޅުއްވާލައްވާފައެވެ.

އެގޮތުން ޘަގީފް ވިދާޅުވީ އަތޮޅު ކައުންސިލްގައި މަސައްކަތް ކުރީ އަމާނާތްތެރިކަމާއި އިޙްލާސްތެރިކަމާއެކު ކަމަށާއި ލާމަރުކަޒީ ގާނޫނުގެ ދަށުން ކައުންސިލްތަކަށް ދިމާވެފައިވާ ގޮންޖެހުންތައް ވަރަށް ގާތުން ތަޖުރިބާކުރެއްވިކަމަށް ވިދާޅުވެފައެވެ.

އަދި ކައުންސިލްގެ ރައީސްކަމުގެ މަގާމުން އިސްތިއުފާ ދެއްވީ އެކަމުގެ ގޮންޖެހުންތަކާއި އެޅިފައިހުރި ތަޅުތަކާއި މެދު އިހްތިޖާޖްކުރުމުގެ ގޮތުން ކަމަށް އެބޭފުޅާ ހާމަކުރެއްވިއެވެ.